ބީއެމްއެލް ގިފްޓް ކާޑް ކަސްޓަމަރުން ބޭނުން ގޮތަކަށް ޑިޒައިން ކޮށްލުމުގެ ފުރުސަތު!

ބޭންކް އޮފް މޯލްޑިވްސް (ބީއެމްއެލް) އިން ގިފްޓް ކާޑް އަމިއްލައަށް ޑިޒައިން ކުރުމުގެ ފުރުސަތު ހުޅުވާލައިފިއެވެ.

ބީއެމްއެލް އިން ބުދަ ދުވަހު ބޭއްވި ރަސްމިއްޔާތުގައި މި ގިފްޓް ކާޑް ލޯންޗުކޮށްދެއްވީ ބީއެމްއެލްގެ ޑެޕިއުޓީ ސީއީއޯ އައިޝަތު ނޫރައްދީންއެވެ.

ގިފްޓް ކާޑް ލޯންޗުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ބީއެމްއެލްގެ ޑެޕިއުޓީ ސީއީއޯ މުޙައްމަދު ޝަރީފް ވިދާޅުވީ ކޮންމެ މުނާސަބަތަކާ ގުޅިގެން ވެސް މި ގިފްޓް ކާޑް ބޭނުންކުރެވޭނެ ކަމަށާއި މި ގިފްޓް ކާޑް ކަސްޓަމައިޒްކޮށް އޯޑަރުކުރާތާ ތިން ދުވަސް ތެރޭގައި ލިބޭނެ ކަމަށެވެ.

ގިފްޓް ކާޑަކީ މުނާސަބަތުތަކާ ގުޅޭ ގޮތުން ލޯބިވާ ފަރާތްތަކަށް ފައިސާގެ ގޮތުގައި ދެވޭ ހަދިޔާއެކެވެ. ކާޑުގައި ހުންނަ ފައިސާ ހުސްވަންދެން ޕީއޯއެސް މެޝިން ބޭނުންކޮށްގެން ވިޔަފާރި ކުރެވުނު ނަމަވެސް، އޭޓީއެމް ބޭނުންކޮށްގެން ކާޑުން ފައިސާއެއް ނުނެގޭނެއެވެ.

ބީއެމްއެލް އިން ބުނީ ގިފްޓް ކާޑް ތައާރަފުކުރުމުގެ ރަސްމިއްޔާތަކީ ބީއެމްއެލް އިން މި މަހުގެ ފުރަތަމަ ދުވަހުން ފެށިގެން ކުރިއަށްގެންދާ އަހަރެންގެ ބޭންކުގެ އެންމެ ފަހު ހަރަކާތް ކަމަށެވެ.

ބީއެމްއެލް އިން ފުރަތަމަ ގިފްޓް ކާޑް ތައާރަފްކުރީ މީގެ ދެ އަހަރު ކުރިންނެވެ.