ސާފުތާހިރުކަން ކުޑަވުމުގެ ސަބަބުންނާއި ރަޖިސްޓްރީ ނުކޮށް، ހދ. ކުޅުދުއްފުށީގައި އާންމުންނަށް ހިދްމަތް ދެމުންދިޔަ ހަތް ތަނެއް ބަންދުކޮށްފި އެވެ.

އާންމުނަށް ކާބޯތަކެތީގެ ހިދްމަތް ދޭ ފަރާތްތައް ޕަބްލިކް ހެލްތު ޔުނިޓްގައި ރެޖިސްޓްރީ ކުރަންޖެހޭއިރު، އެކަން ނުކޮށް، ހިދްމަތް ދޭއިރު، ރަޖިސްޓްރީ ކޮށްގެން ކާބޯތެކެތީގެ ހިދްމަތް ފޯރުކޮށްދޭ ފަރާތްތަކުން ހިދްމަތް ފޮރުކޮށްދޭއިރު، ސާފުތާހިރު ކަމަށް ބަލަންޖެހެ އެވެ. އަދި ޕަބްލިކް ހެލްތުން ވަނީ ސާފުތާހިރު ކަމުގެ މިންގަނޑުތަކެއްވެސް ކަނޑައަޅާފަ އެވެ. އަދި އެތަނުން ކަނޑައެޅިފައިވާ އުސޫލްގެ ދަށުން މޮނީޓަރ ކުރަމުންދެ އެވެ. 

ހދ އަތޮޅު ހެލްތް ސާވިސަސް އިން ބަންދުކުރި މި ހަތް ތަނުގެ ތެރޭގައި ހިމެނެނީ ފަސް ރެސްޓޯރެންޓާއި ދެ ބޭކަރީ އެވެ.

ކުޅުދުއްފުށި އޮންލައިންއިން ރިޕޯޓް ކޮށްފައިވާގޮތުން ބަންދުކޮށްފައި ވަނީ ކޮއްތުރޮށި ކެފޭ، ހާބަރ ޓައުން ކޮފީ ޝޮޕް، ފުޑްޕާރކް ރެސްޓޯރެންޓް، ރިއަލް ފުޑް ކެފޭ، ސަހާމާ ޕެލަސް ރެސްޓޯރެންޓް، އެޗް.އޭ ބޭކަރީ އަދި ބްރެޑް ޕީސް ބޭކަރީ އެވެ.

ހދ އަތޮޅު ހެލްތް ސާވިސަސް އާ ހަވާލާދީ ކުޅުދުއްފުށި އޮންލައިން އިން ބުނެފައިވާގޮތުގައި އެތަންތަން ބަންދުކޮށްފައި ވަނީ ކާބޯތަކެތީގެ ހިދުމަތްދިނުމުގައި ހުންނަށް ޖެހޭ ސާފުތާހިރުކަމުގެ މިންގަނޑުތައް ބަޔާންކުރާ ގަވައިދުގެ ދަށުން، ބަލާފާސްކުރާއިރު މި ގަވައިދުގެ ބުނާ ކަންތައްތަކާ ހިލާފުވުން ނުވަތަ ހުންނަން ޖެހޭ މިންގަނޑުތަކާ ހިލާފު ވުމުގެ ސަބަބުން ކަމަށެވެ. އަދި ޕަބުލިކް ހެލްތް ޔުނިޓްގައި ރަޖިސްޓްރީނުކޮށް އާންމުންނަށް ކާބޯތަކެތީގެ ހިދުމަތް ދޭތީ ބައެއް ތަންތަން ބަންދުކޮށްފައިވާ ކަމަށްވެސް އެތަނުން ބުނެފައި ވެއެވެ. 

އެތަންތަން ބަންދުކޮށްފައި ވަނީ މިމަހުގެ 26 ވަނަ ދުވަހުން ފެށިގެން ކަމަށް ވެއެވެ.

ބަންދުކުރި ތަންތަނާ ގުޅޭގޮތުން ފާހަކޮށްފައިވާ އަދި ރަނގަޅު ކުރަން ބުނެފައިވާ ކަންކަން ރަނގަޅު ކުރުމުން، ޕަބުލިކް ހެލްތް ޔުނިޓަށް ހުށަހެޅުމުން ތަން ބަލާ ޗެކްކޮށް، ގަވާއިދުގެ މިންގަނޑަށް ހުރިނަމަ އެތަނެއް އަލުން ހުޅުވުމުގެ ހުއްދަދެވޭނެ ކަމަށް ހދ އެޓޯލް ހެލްތް ސާވިސަސް ބުނެ އެވެ.

ކުޅުދުއްފުއްޓަކީ ރާއްޖޭގެ އުތުރުގެ އެންމެ ހިދްމަތްތައް ރަނގަޅަށް ދެމުން އަންނަ އާބާދީގެ ގޮތުންވެސް އެންމެ ބޮޑު އާބާދީއެއް އޮންނަ ރަށެވެ.

މާލެ ސިޓީގައި ކާބޯތަކެތި ވިއްކާ ބައެއް ތަންތަން މީގެކުރިން ބަންދުކޮށްފައިވީނަމަވެސް، ޖުމްލަކޮށް ރާއްޖޭގެ މީހުން ދިރިއުޅޭ ރަށްރަށުގައި ހިންގާ ކެފޭ ރެސްޓޯރަންޓް ތަކަކީ އެހާ ސާފު ތާހިރު ތަންތަން ގޮތުގައި ފާހަގައެއް ނުކުރެވެ އެވެ. ހާއްސަކޮށް މާލޭގައި ހިންގާ ކެފޭ ރެސްޓޯރަންޓްތަކަކީ ސާފުތާހިރު ކަމުގެ މިންގަނޑުގެ ތެރޭގައި ހިންގާ ތަންތަނުގެ ގޮތުގައި ފާހަގައެއް ނުކުރެވެ އެވެ.