ކިމް ކާޑޭޝިއަންގެ ތިންވަނަ ދަރިފުޅުގެ ފޮޓޯ ފުރަތަމަ ފަހަރަށް ދައްކާލައިފި

ރިއަލިޓީ ޝޯ "ކީޕިން އަޕް ވިތު ކާޑޭޝިއަންސް"އިން މަޝްހޫރުކަން ހޯދާފައިވާ ކިމް ކާޑޭޝިއަން އަދި މަޝްހޫރު ލަވަކިޔުންތެރިޔާ ކާންޔޭ ވެސްޓަށް ތިންވަނަ ދަރިފުޅަކު ލިބިފައިވަނީ މިދިޔަ ޖެނުއަރީ މަހުގެ 15 ވަނަ ދުވަހުގައެވެ.

ސަރޮގޭޓެއް މެދުވެރިކޮށް ހޯދާފައިވާ ތިންވަނަ ދަރިފުޅަށް ކިމްއާއި ކާންޔޭ ކިޔާފައިވަނީ ޝިކާގޯއެވެ. އެކުއްޖާގެ ފޮޓޯއެއް ފުރަތަމަ ފަހަރަށް ކިމް ވަނީ އޭނާގެ އިންސްޓަރގްރާމް މެދުވެރިކޮށް އާންމު ކޮށްފައެވެ.

ކިމްއަކީ އެމެރިކާގެ މަޝްހޫރު ރިއަލިޓީ ތަރިއެކެވެ. އޭނާ އާއި އާއިލާ ފެނިގެންދަނީ އީ-ނެޓްވަރކުން ގެނެސްދޭ ރިއަލިޓީ ޝޯވ "ކީޕިންގ އަޕް ވިތު ދަ ކާޑޭޝިއަންސް" އިންނެވެ. ޝޯވގައި ކިމްގެ މަންމަ ކްރިސް ޖެނަރގެ އިތުރުން އޭނާގެ ދައްތަ ކޯޓްނީ ކާޑޭޝިއަން އާއި ކޮއްކޮމެން ކަމަށްވާ ކްލޯއީ އަދި ރޮބް ކާޑޭޝިއަންގެ އިތުރުން ކެންޑަލް އަދި ކައިލީ ޖެނަރ ފެނިގެންދެއެވެ.

ދާދި ފަހުން ކްލޯއީ, 33, ވަނީ އޭނާގެ ފުރަތަމަ ދަރުފުޅަށް ބަލިވެއިންކަން އިއުލާން ކޮށްފައެވެ. މީގެ އިތުރުން، އެ މީހުންގެ އެންމެ ހަގު ކޮއްކޮ ކައިލީ, 20, އަށް ވެސް ވަނީ ދާދިފަހުން އަންހެން ކުއްޖަކު ލިބިފައިވެއެވެ.