ކުއްލި ނުރައްކަލުގެ ޙާލަތު އިޢުލާނުކޮށް ރައީސުލްޖުމްހޫރިއްޔާ ނެރުއްވި ޤަރާރާއި، އެ ޤަރާރަށް އިސްލާޙު ގެނެސް، އޭގެ ފަހުން އިޢުލާނުކުރި އިސްލާޙުތައް ފާސްކުރަން އަންގާރަ ދުވަހު މަޖިލީހުގައި ނެގި ވޯޓާ މެދު ސުޕްރީމް ކޯޓުން ގޮތެއް ނިންމެންދެން މަޖިލީހުން ނިންމި ނިންމުންތަކަށް އަމަލު ކުރަމުން ގެންދިޔުމަށް ސުޕްރީމް ކޯޓުން ވަގުތީ އަމުރެއް ނެރެފިއެވެ.

ބުދަ ދުވަހުގެ އިރުއޮއްސުނު އިރު ސުޕްރީމް ކޯޓުން ނެރުނު އަމުރުގައި ބުނެފައިވަނީ، ރައްޔިތުން މަޖިލީހުގެ ޤަވާއިދުގެ 38 ވަނަ މާއްދާގައި ރައްޔިތުން އެ މައްޗަށް އަމަލުކުރުން ލާޒިމުކުރާ އެއްވެސް ކަމެއް ރައްޔިތުންގެ މަޖިލީހުން ފާސްކުރުމަށްޓަކައި ވޯޓަށް އަހަންވާނީ، އެ މަޖިލީހުގެ ޖުމްލަ މެމްބަރުންގެ ދެބައިކުޅަ އެއްބަޔަށްވުރެ ގިނަ މެމްބަރުން އެ ވޯޓެއް ނަގާ ޖަލްސާއެއްގައި ހާޒިރުވެ ތިބޭ ވަގުތެއްގައިކަމަށް ޤާނޫނު އަސާސީގެ 87 ވަނަ މާއްދާގެ (ށ) ގައި ބަޔާންކޮށްފައިވާ މާއްދާގައިވާ އިބާރާތްބޭނުންކޮށް، އެ ހާލަތުގައި ވޯޓަށް އަހަންޖެހޭ ކަންކަން ބަޔާން ކުރިއިރު، ކުއްލި ނުރައްކަލުގެ ހާލަތު އިޢުލާނުކުރާ ޤަރާރު އެ މާއްދާގައި ހިމެނިފައިނުވާ ކަމަށެވެ. އަދި އެކަމަށްވެސް ރިޢާޔަތްކޮށް، ކުއްލި ނުރައްކަލުގެ ހާލަތާ ގުޅޭގޮތުން ރައީސުލްޖުމްހޫރިއްޔާ އިޢުލާނުކޮށްފައިވާ ޤަރާރާއި (އެ ޤަރާރުގެ އިސްލާހުގައި ހިމެނޭ ގޮތުން) އެ ޤަރާރުގެ މުއްދަތު އިތުރުކުރުމާއި ގުޅޭގޮތުން، ރައްޔިތުން މަޖިލީހުން ގޮތެއް ނިންމާއިރު، އެ މަޖިލީހުގެ ޤާނޫނީ އަދަދަކީ މި ހާލަތުގައި ޤާނޫނު އަސާސީގެ 86 ވަނަ މާއްދާގައި ބަޔާންކޮށްފައިވާ ޤާނޫނީ އަދަދުކަމަށް، އެ މަޖިލީހަށް ފެންނަކަމަށެވެ.

ޙުކުމުގައި ވަނީ މަޖިލީހަށް އެހެން އެކަން ފެނުމުން، އެކަން އެގޮތަށް އެ މަޖިލީހުން ކުރިއަށް ގެންގޮސްފައިވާ ކަމަށާއި އެހެންނަމަވެސް އެކަމާ ގުޅޭގޮތުން އެ މަޖިލީހުގެ ބައެއް މެމްބަރުން ސުވާލު އުފައްދަވާ ކަމަށެވެ.

އެހެންކަމުން ޤާނޫނު އަސާސީގެ 95 ވަނަ މާއްދާގެ ދަށުން ސުޕްރީމް ކޯޓުގެ ލަފަޔަކަށް އެދި ރައްޔިތުން މަޖިލީހުން ސުޕްރީމް ކޯޓަށް ހުށަހެޅުމާއި ގުޅިގެން، ރައްޔިތުން މަޖިލީހުން އެ މައްސަލާގައި ހުށަހަޅާފައިވާ ހުށަހެޅުމުގެ މައްޗަށާއި ދިވެހި ރާއްޖޭގެ ޤާނޫނު އަސާސީއަށާއި، މި ބާވަތުގެ މައްސަލަތަކުގައި ވަގުތީ އަމުރު ނެރުމުގައި އަމަލުކުރަންޖެހޭ ދުސްތޫރީ އަދި ޝަރުޢީ އުސޫލުތަކުގެ މައްޗަށާއި އެ މައްސަލައިގެ ބާވަތައް ބަލައި ވިސްނުމަށްފަހު، ޤާނޫނު އަސާސީގެ 95 ވަނަ މާއްދާގައިވާ ގޮތުގެ މަތިން ސުޕްރީމް ކޯޓުން ރައްޔިތުން މަޖިލީހަށް ދޭންޖެހޭ ލަފާ އެ މަޖިލީހަށް ފޮނުވަންދެން، ކުއްލިނުރައްކަލުގެ ހާލަތު އިއުލާނުކުރުމާ ގުޅޭ ރައީސުލްޖުމްހޫރިއްޔާގެ ނަންބަރު 3/2018 ޤަރާރު (އެ ޤަރާރު އިސްލާހުކުރުމަށް އިއުލާނުކޮށްފައިވާ 2 ޤަރާރު ހިމެނޭގޮތުން) ގައި ހިމެނިފައިވާ ޤާނޫނު އަސާސީގެ 100 ވަނަ މާއްދާއާއި 101 ވަނަ މާއްދާއާއި 113 ވަނަ މާއްދާއާއި 228 ވަނަ މާއްދާ އުނިކޮށް، އެ ޤަރާރުގެ މުއްދަތުގެ އިތުރަށް، 30 ދުވަހުގެ މުއްދަތު އިތުރުކުރުމަށް 20 ފެބްރުއަރީ 2018 ވަނަ ދުވަހު ބޭއްވުނު ރައްޔިތުން މަޖިލީހުގެ 2018 ވަނަ އަހަރު ދައުރުން ބޭރުގައި ބޭއްވި ދެވަނަ ހާއްސަ ޖަލްސާގައި ރައްޔިތުން މަޖިލީހުން ފާސްކޮށްފައިވާ ނިންމުންތަކަށް އަމަލުކުރަމުން ގެންދިއުމަށް، ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 141 ވަނަ މާއްދާއާއި 144 ވަނަ މާއްދާގެ (ށ) އާއި (145) ވަނަ މާއްދާގެ (ނ) ގެ މައްޗަށް ރިޢާޔަތްކޮށް، ރައްޔިތުން މަޖިލީހާއި ދައުލަތުގެ ކަމާބެހޭ އެންމެހައި ފަރާތްތަކަށް އަންގައި އަމުރުކުރާ ކަމަށްވެސް މި ވަގުތީ އަމުރުގައިވެއެވެ.

ސުޕްރީމް ކޯޓުން މިހެން ބުނެފައިވަނީ، ޤާނޫނީ ގޮތުން ސުވާލު އުފެދޭ ޖަލްސާއެއްގައި، ޤާނޫނީ ގޮތުން ސުވާލު އުފެދޭ އަދަދަކަށް މެންބަރުން ތިއްބަވައިގެން، ކުއްލި ނުރައްކަލުގެ ހާލަތު އިތުރު 30 ދުވަހަށް ހިންގުމަށް ރައްޔިތުންގެ މަޖިލީހުގެ ބައެއް މެންބަރުން ވަނީ ފާސްކޮށްފައެވެ.

ކުއްލި ނުރައްކަލުގެ ހާލަތުގެ މުއްދަތު އިތުރު ކުރުމާއި ގުޅިގެން ސަރުކާރުން އަދިވެސް ރައްޔިތުންގެ އަސާސީ ގިނަ ޙައްޤުތަކެއް ހިފަހައްޓާފައިވާއިރު، ޤާނޫނީ ދާއިރާގައި މަސައްކަތްކުރައްވާ ގިނަ އަދަދެއްގެ ފަރާތްތަކުން ދަނީ މިހާރު ރާއްޖޭގައި ކުއްލި ނުރައްކަލުގެ ހާލަތެއް ނެތްކަމަށާއި، އެ ހާލަތު އިޢުލާނުކުރި ޤަރާރު ބާތިލް ވެފައިވާ ކަމަށް ބުނަމުންނެވެ.