ރައްޔިތުންގެ މަޖިލީހުގެ ފުރަތަމަ ޖަލްސާ ބާއްވަންޖެހޭނެ ކަމަށް ގަވާއިދުގައި ބުނާ ތާރީޚު ފަހަނަ އަޅައި ދިޔަ ފަހުން، މިރޭ ބާއްވާ މަޖިލީހުގެ މިއަހަރުގެ ފުރަތަމަ ޖަލްސާގައި އިދިކޮޅު ޕާޓީތަކުގެ މެމްބަރުން ބައިވެރިވެވަޑައިގަތުމާ މެދު މިއަދު ހަވީރު ގޮތެއް ނިންމަވާނެ ކަމަށް، އެމްޑީޕީގެ ޕާލިމެންޓަރީ ގްރޫޕްގެ ލީޑަރު އިބްރާހިމް މުހައްމަދު ސޯލިހް ވިދާޅުވެއްޖެއެވެ.

ރާއްޖެއެމްވީއާ ވާހަކަ ދައްކަވަމުން އިބޫ ވިދާޅުވީ ފެބްރުއަރީ 5 ވަނަ ދުވަހު ރައްޔިތުންގެ މަޖިލިސް ހުޅުވުމަށާއި ރިޔާސީ ބަޔާން އިއްވުމަށް ބާއްވަން ތާވަލުކޮށްފައި އޮތް ޖަލްސާގައި އިދިކޮޅު މެމްބަރުން ބައިވެރިވެވަޑައި ނުގަތުމަށް ކުރިން ނިންމާފައި އޮތް ކަމަށެވެ. ނަމަވެސް، އަލުން އެކަމާ މަޝްވަރާކުރައްވާނެ ކަމަށް އޭނާ ވިދާޅުވިއެވެ.

ފެބްރުއަރީ 5 ގައި ބޭއްވަން ތާވަލްކުރި މަޖިލިސް ހުޅުވުމުގެ ޖަލްސާގައި އިދިކޮޅު ފަރާތްތަކުން ބައިވެރި ނުވަން ނިންމީ، ގޮނޑި ގެއްލިފައިވާ ކަމަށް ބުނާ 12 މެމްބަރުންނަށް މަޖިލީހަށް ނުވައްދާތީއެވެ. އެ މެމްބަރުންގެ ގޮނޑި ނުގެއްލޭ ކަމަށް ސުޕްރީމް ކޯޓުން ފެބްރުއަރީ 1 ގައި ނިންމި ނަމަވެސް، އެ މެމްބަރުން މަޖިލީހަށް ވަދަވަޑައިގަތުމަށް، އަސްކަރިއްޔާ އިން ފުރުސަތެއް ނުދެއެވެ.

ގާނޫނާ ހިލާފަށް ގޮނޑި ގެއްލުވާލާފައިވާ 12 މެމްބަރުންގެ ގޮނޑި ނުގެއްލޭ ކަމަށާއި ސިޔާސީ ހައްޔަރީން މިނިވަންކުރުމަށް ސުޕްރީމް ކޯޓުން ނިންމި ނިންމުމަށް ފަހު، އަސްކަރިއްޔާ އިން ސުޕްރީމް ކޯޓް ހިސޯރުކޮށް، އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު ވަނީ ހައްޔަރުކޮށްފައެވެ. އެ ދެ ބޭފުޅުންގެ މައްޗަށް ވެސް ސަރުކާރު ބަދަލުކުރަން އުޅުނު ކަމުގެ ތުހްމަތާއި ރިޝްވަތުގައި ހިފިކަމުގެ ތުހްމަތު ވަނީ ތުހްމަތުކޮށްފައެވެ.  

ރައްޔިތުންގެ މަޖިލީހުގެ ޖަލްސާތައް މިރޭ ފަށާއިރު، މަޖިލީހުގެ ގަވާއިދުގައި ބުނެފައި ވަނީ ކޮންމެ އަހަރެއްގެ ވެސް ފުރަތަމަ ދައުރު ފަށަންވާނީ ފެބްރުއަރީ މަހުގެ ފުރަތަމަ ހޯމަ ދުވަސް ނުވަތަ ބުރާސްފަތި ދުވަހު ކަމަށެވެ. ނަމަވެސް މަޖިލިސް ފެށުން ފަސްކުރީ ސަލާމަތީ ސަބަބުތަކަށްޓަކައި ކަމަށް ބުނެފައެވެ. 

މަޖިލީހުގެ ޖަލްސާތައް ފަށާއިރު، ކުއްލި ނުރައްކަލުގެ ހާލަތު ދިގު ދަންމާލުމަށް އަންގާރަ ދުވަހު މަޖިލީހުން ފާސްކުރި ގަރާރުގައި ބުނެފައި ވަނީ އަދި ވެސް ކުއްލި ހާލަތު އިއުލާނުކުރި ސަބަބުތައް ނެތިގެން ނުދާ ކަމަށެވެ.