މަޝްވަރާގެ ވަފުދެއް ފޮނުވުމަށް އިނގިރޭސިވިލާތުން ވިސްނަނީ
ސްވަޔާ ވަނީ ރާއްޖެއަށް މަޝްވަރާގެ ވަފުދެއް ފޮނުއްވުމަށް އެ ގައުމުގެ ސަރުކާރަށް ގޮވާލައްވާފައި
ކޮންޒަވޭޓީވް ޕާޓީގެ މެމްބަރު ހޫގޯ ސްވަޔާ
ރާއްޖޭގައި މިހާރު ހިނގަމުންދާ ކަންކަމާއި ގުޅިގެން މަޝްވަރާ ކުރުމަށް ވަފުދެއް ފޮނުވުމަށް ވިސްނަމުންދާ ކަމަށް އިނގިރޭސިވިލާތުގެ މިނިސްޓަރ އޮފް ސްޓޭޓް ފޯރ އޭޝިއާ އެންޑް ދަ ޕެސިފިކް މާކް ފީލްޑް ވިދާޅުވެއްޖެއެވެ.
މާކް ފީލްޑް މިހެން ވިދާޅުވެފައިވަނީ އިނގިރޭސިވިލާތުގެ ގާނޫނު ހަދާ މަޖިލީހުގައި އެމަނިކުފާނަށް އެ މަޖިލީހުގެ މެމްބަރު ހޫގޯ ސްވަޔާ ކުރެއްވި ސުވާލުތަކަށް ޖަވާބު ދެއްވަމުންނެވެ. ސްވާޔާ ވަނީ ރާއްޖޭގައި މިހާރު އިއުލާނުކޮށްފައިވާ ކުއްލި ނުރައްކަލުގެ ހާލަތާއި ސުޕްރީމް ކޯޓުގެ ދެ ފަނޑިޔާރެއްގެ އިތުރުން ރައީސް މައުމޫން ހައްޔަރުކޮށް ރާއްޖޭގެ އެކިއެކި ބާރުތަކަށް ރައީސް ޔާމީން އަތްގަދަކޮށް، ކުރައްވަމުން ގެންދަވާ ކަންކަމާއި ގުޅިގެން އެ ގައުމުގެ ސެކްރެޓަރީ އޮފް ސްޓޭޓް ރާއްޖެއަށް މަޝްވަރާގެ ވަފުދެއް ފޮނުއްވުމަށް ނުވަތަ އދ އަށް މަޝްވަރާގެ ވަފުދެއް ފޮނުއްވުމަށް ބާރުއެޅުއްވުމުގެ ވިސްނުމެއް ގެންގުޅުއްވާތޯ ސުވާލު އުފައްދަވާފައެވެ.
މި ސުވާލުތަކަށް ޖަވާބުދެއްވަމުން ފީލްޑް ވިދާޅުވީ ރާއްޖޭގައި މިހާރު އިއުލާނުކޮށްފައިވާ ކުއްލި ނުރައްކަލުގެ ހާލަތާއި އަދި އެ ހަލަތާއެކު ހިފެހެއްޓިފައިވާ އަސާސީ ހައްގުތަކާއި މެދު އިންތިހާއަށް ކަންބޮޑުވެ ވަޑައިގަންނަވާ ކަމަށެވެ. ހަމައެހެންމެ ސްވަޔާ ވިދާޅުވިފަދައިން ރާއްޖެއަށް މަޝްވަރާގެ ވަފުދެއް ފޮނުއްވުމުގެ މަސައްކަތް ކުރައްވަމުންދާނެ ކަމަށް ފީލްޑް ވިދާޅުވިއެވެ. ހަމައެހެންމެ މި ހާލަތު އުވާލުމަށް ތަކުރާރުކޮށް ރައީސް ޔާމީންއަށް ގޮވާލައްވަމުންދާނެ ކަމަށް ފީލްޑް ފަހުން ކުރެއްވި ޓްވީޓެއްގައި ވިދާޅުވެފައިވެއެވެ.
އިނގިރޭސިވިލާތުން އަންނަނީ ރާއްޖޭގެ ހާލަތު ވަރަށް ގާތުން ބަލަމުންނެވެ. ރައީސް ޔާމީން ވަނީ ކުއްލި ނުރައްކަލުގެ ހާލަތު 30 ދުވަހަށް އިތުރުކުރައްވާފައެވެ. ރައްޔިތުންގެ މަޖިލީހުން ވެސް ވަނީ ގާނޫނާ ހިލާފަށް މި ގާރާރު ފާސްކުރައްވާފައެވެ.
