ޔާމީން ރަޝީދުގެ މަރުގެ ތަހުގީގަކީ އިތުބާރު ހިފޭ، މިނިވަން ތަހުގީގަކަށް ވާންޖެހޭ
ޔާމީން ރަޝީދު
އަނިޔާވެރިކޮށް މަރާލާފައިވާ ބްލޮގަރ ޔާމީން ރަޝީދުގެ މަރުގެ ތަހުގީގަކީ އިތުބާރު ހިފޭ، މިނިވަން ތަހުގީގަކަށް ވާންޖެހޭ ކަމަށާއި އެފަދަ ތަހުގީގަކަށް އިގިރޭސިވިލާތުން ތާއީދުކުރާކަމަށް އެގައުމުން ބުނެފިއެވެ.
އެގައުމުން މިހެން ގޮވާލާފައިވަނީ މިހާރު ޖެނީވާގައި ކުރިއަށްދާ އިންސާނީ ހައްގުތަކާއި ބެހޭ ކައުންސިލްގެ 35 ވަނަ ބައްދަލުވުމުގައެވެ.
އިގިރޭސިވިލާތުން ބުނީ ޔާމީން ރަޝީދަކީ އިންސާނީ ހައްގުތަކަށް ކެނޑިނޭޅި ހިތްވަރު ދޫނުކޮށް ވަކާލާތު ކުރަމުންދިޔަ ފަރާތެއް ކަމަށެވެ. އަދި އޭނާގެ މަރުގެ ތަހުގީގަކީ މިނިވަން އަދި އިތުބާރު ހިފޭ ތަހުގީގަކަށް ވާން ޖެހޭ ކަމަށްވެސް އެގައުމުން ވަނީ ބުނެފައެވެ.
މިއަހަރުގެ ކައުންސިލް ބައްދަލުވުމުގައި ޔާމީން ރަޝީދުގެ ބައްޕަ ހުސައިން ރަޝީދު ވަނީ ބައިވެރިވެފައެވެ.
އިގިރޭސިވިލާތް އިސްވެ، 30 ގައުމަކުން ތާއީދުކޮށް ދިވެހިރާއްޖޭގެ މުއައްސަސާތަކާއި ޖުޑީޝަރީ މިނިވަންކުރުމަށް ގޮވާލާ ނެރެފައިވާ ބަޔާނުގައިވެސް ވަނީ ޔާމީންގެ މަރަށް އިންސާފު ހޯދުމަށް ގޮވާލާފައެވެ.
