ސުޕްރީމް ކޯޓުގެ ނަމުގައި ނެރޭ އަމުރުތަކަކީ ސިފައިން ހިންގަމުންދާ، ޤާނޫނު އަސާސީއާ ހިލާފު ކަންކަން އޮޅުވާލުމަށް ނެރޭ އަމުރުތަކެއް: ޑރ. ޖަމީލް
މުޅި ދުނިޔެ އަށް ވެސް އެނގެންވީ ކަމަކީ ސުޕްރީމް ކޯޓު އޮތީ ސިފައިންގެ ބެލުމުގެ ދަށުގައި ކަން
ކުރީގެ ނާއިބު ރައީސް ޑރ. މުހައްމަދު ޖަމީލް އަހްމަދު
ދިވެހިރާއްޖޭގެ ސުޕްރީމް ކޯޓުގެ ނަމުގައި ނެރޭ އަމުރުތަކަކީ ސިފައިން ހިންގަމުންދާ ޤާނޫނު އަސާސީއާ ހިލާފުކަންކަން އޮޅުވާލުމަށް ނެރޭ އަމުރުތަކެއް ކަމަށް ކުރީގެ ނާއިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ސުޕްރީމް ކޯޓުން އަދިއްތަ ދުވަހުގެރޭ ނެރުނު އަމުރަށް އިޝާރަތްކުރައްވައި ކުރެއްވި ޓްވީޓެއްގައި ޑރ. މުހައްމަދު ޖަމީލް އަހުމަދު ވިދާޅުވީ މުޅި ދުނިޔެ އަށް ވެސް އެނގެންވީ ކަމަކީ ސުޕްރީމް ކޯޓު އޮތީ ސިފައިންގެ ބެލުމުގެ ދަށުގައި ކަމާއި، އުއްތަމަ ފަނޑިޔާރާއި، އިސް އިތުރު ފަނޑިޔާރެއް ހައްޔަރުކޮށްފައިވާކަންކަމަށެވެ. އަދި ސުޕްރީމް ކޯޓުގެ ނަމުގައި ނެރެމުންގެންދާ އަމުރުތަކަކީ ސިފައިން ހިންގަމުންގެންދާ ޤާނޫނު އަސާސީ އާއި ޤާނޫނުތަކާ ހިލާފު ކަންތައްތައް އޮޅުވާލުމަށް ނެރެމުންދާ އަމުރުތަކެއް ކަމަށް ޑރ. ޖަމީލް ވިދާޅުވެފައި ވެއެވެ.
ޑރ. ޖަމީލް އެފަދަ އިން ވިދާޅުވިއިރު، ސުޕްރީމް ކޯޓުގެ އުއްތަމަ ފަނޑިޔާރާއި، ފަނޑިޔާރު އަލީ ހަމީދު ހައްޔަރުކޮށް ސުޕްރީމް ކޯޓުން އަންނަނީ ތިން ފަނޑިޔަރުންގެ ބެންޗަކުން އަމުރުތަކެއް ނެރެމުންނެވެ. އަދި ސުޕްރީމް ކޯޓުގެ އުއްތަމަ ފަނޑިޔާރު ހައްޔަރުކުރުމަށް ސިފައިން ސުޕްރީމް ކޯޓަށް ވަދެފައި ވަނީ ކޯޓު އިމާރާތުގެ ފުރާޅު މަތިންނެވެ. އޭގެ އިތުރުން ވަކީލުން ވިދާޅުވެފައިވާ ގޮތުގައި އުއްތަމަ ފަނޑިޔާރު ހައްޔަރުކޮށްގެން ގެންގޮސްފައި ވަނީ ބިންމަތީގައި ދަމާފައެވެ.
