ކުރެއްވި ދެ ޓްވީޓަކާ ގުޅިގެން މާދަމާ ދެ ގަޑިއަކަށް މަހްލޫފް ފުލުސް އޮފީހަށް ހާޒިރުވުމަށް އަންގައިފި
ފުރަތަމަ މައްސަލާގައި ހުކުރު ދުވަހު 14:30 އަށް
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް
ކުރެއްވި ދެ ޓްވީޓަކާއި ގުޅިގެން ދެ މައްސަލައެއްގައި ދެ ގަޑިއަކަށް ހުކުރު ދުވަހު މެންދުރު ފަހު ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް ފުލުސް އޮފީހަށް ހާޒިރުވުމަށް އަންގައިފި އެވެ.
މިތަނުން އެއް ޓްވީޓަކާއި ގުޅިގެން ފުލުސް އޮފީހަށް ހާޒިރު ވުމަށް މަހްލޫފަށް އެންގުމުން މަހްލޫފް ވަނީ ބުރާސްފަތި ދުވަހު 15:00 އަށް ފުލުސް އޮފީހަށް ވަޑައިގަންނަވައިފި އެވެ.
ނަމަވެސް މަހްލޫފް ގާނޫނީ ވަކީލެއްގެ އެހީތެރިކަން ބޭނުންވާ ކަމަށް އެދިލެއްވުމުން ހުކުރު ދުވަހު 14:30 ގާނޫނީ ވަކީލަކާއެކު ވަޑައިގެންނެވުމަށް އެންގެވި ކަމަށް މައުލޫމާތު ލިބިފައިވެއެވެ. މީގެ އިތުރުން މަހްލޫފް ވިދާޅުވީ އިތުރު ޓްވީޓެއްގެ މައްސަލައެއްގައި އިތުރު ޗިޓެއް ހަވާލު ކޮށްފައިވާ ކަމަށެވެ. އެޗިޓަށް ފުލުހަށް ހާޒިރު ވުމަށް އަންގާފައި ވަނީ ހުކުރު ދުވަހުގެ ހަވީރު 17:00 އަށެވެ.
މަފްލޫފްގެ މައްޗަށް ފުލުހުން ކުރާ ފުތަރަމަ ތުހުމަތަކީ 2017 ޑިސެމްބަރު 03 ވަނަ ދުވަހުގެ ވަގުތެއްގައި މަހްލޫފްގެ ޓްވީޓަރ އެކައުންޓު މެދުވެރިކޮށް، އެސިސްޓެންޓް ކޮމިޝަނަރ އޮފް ޕޮލިސް މުހައްމަދު ޖަމްޝީދު ޑީމޯޓް ކުރުމާ ގުޅޭގޮތުން މޯލްޑިވްސް ޕޮލިސް ސާރވިސްއަށް ދޮގު މައުލޫމާތު ދީފައިވާ ކަމަށް ބުނެއެވެ.
ދެވަނަ މައްސަލައަކީ މި އަހަރުގެ ޖެނުއަރީ މަހުގެ 20 ވަނަ ދުވަހު ކުރެއްވި ޓްވީޓަކާއި ގުޅިގެން ފުލުހުން ހިންގާ ތަހުގީގެކެވެ.
މަފްލޫފްއަކީ މިސަރުކާރުގެ ގިނަ ސިއްރުތަކެއް ސޯސަލް މީޑީއާގައި ފަޅާއަރުވަމުން ގެންދަވާ މަޖިލީހުގެ އެންމެ ޖެހިލުންކުޑަ އެއް މެމްބަރެވެ.
ގިނަ ދުވަސްތަކެއް ވަންދެން މަހްލޫފް ރާއްޖޭން ބޭރުގައި އުޅުއްވުމަށް ފަހު ރާއްޖެ ވަޑައިގެންނެވީ ބުދަ ދުވަހު އެވެ.
