ރައީސް ޔާމީންގެ މަންދޫބެއްގެ ހައިސިއްޔަތުން މިނިސްޓަރ މުއިއްޒު ރައީސް މައުމޫނާއި، އުއްތަމަ ފަނޑިޔާރާއި، ފަނޑިޔާރު އަލީ ހަމީދާއި ބައްދަލުކުރައްވައިފި
14 ފެބުރުއަރީ 2018 | ބުދަ 14:36ތިން ބޭފުޅުންގެ ހާލުބެއްލެވި
މިނިސްޓަރ މުއިއްޒު، ކުރީގެ ރައީސް މައުމޫން ޢަބްދުލްޤައްޔޫމާއި، އުއްތަމަ ފަނޑިޔާރު ޢަބްދުﷲ ސައީދާއި، ފަނޑިޔާރު އަލީ ހަމީދު
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ޚާއްސަ މަންދޫބެއްގެ ޙައިސިއްޔަތުން މިނިސްޓަރ އޮފް ހައުސިންގ އެންޑް އިންފްރާސްޓްރަކްޗަރ ޑރ. މުޙައްމަދު މުޢިއްޒު، ކުރީގެ ރައީސް މައުމޫން ޢަބްދުލްޤައްޔޫމާއި، އުއްތަމަ ފަނޑިޔާރު ޢަބްދުﷲ ސައީދާއި، ފަނޑިޔާރު އަލީ ހަމީދާއި ބައްދަލުކުރައްވައިފިއެވެ.
ޤާނޫނީ ގޮތުން އުފެދިފައިވާ ސަރުކާރު ޤާނޫނާ ޚިލާފަށް ބަދަލުކުރުމަށް މަސައްކަތް ކުރުމާއި ރިޝްވަތާ ގުޅޭ އެކި މައްސަލަތަކުގެ ތުޙުމަތުކޮށް، ކުއްލި ނުރައްކަލުގެ ޙާލަތުގެ ނިވަލުގައި، ކޯޓު އަމުރަކާ ނުލައި ހައްޔަރުކޮށްފައިވާ މި ތިން ބޭފުޅުންނާ ބައްދަލުކުރެއްވުމަށް ފަހު މިނިސްޓަރ މުޢިއްޒު ކުރެއްވި ޓްވީޓެއްގައި ވިދާޅުވީ، އެ ބޭފުޅުންގެ ހާލު އޮޅުންފިލުއްވާފައިވާ ކަމަށެވެ.
މުޢިއްޒު އިތުރަށް ވިދާޅުވީ މި ބައްދަލުކުރެއްވުންތަކުގައި އެ ތިން ބޭފުޅުންގެ ސިއްޙީ ހާލުކޮޅާއި، އެބޭފުޅުން ތިއްބަވާ ތަންތަނާ ބެހޭ މައުލޫމާތު ފަދަ ކަންކަން އޮޅުން ފިލުއްވާފައިވާފައިވާ ކަމަށެވެ.
ރައީސް ޔާމީންގެ ޚާއްސަ މަންދޫބެއްގެ ހައިސިއްޔަތުން މި ތިން ބޭފުޅުންނާއި މިނިސްޓަރ މުއިއްޒު ބައްދަލުކުރެއްވިކަން ހާމަކުރެއްވިއިރު، މި ބައްދަލުވުންތަކުގައި އެ ބޭފުޅުންގެ ޤާނޫނީ ވަކީލުން ބައިވެރި ކުރިކަން އަދި ޔަޤީނެއް ނުވެއެވެ.
ދޫނިދޫ އާއި މާފުށީ ޖަލުގައި ތިއްބެވި މި ތިން ބޭފުޅުންނާއި ރައީސް ޔާމީންގެ މަންދޫބަކު ބައްދަލުކުރެއްވިއިރު، އެބޭފުޅުންނާއި އެބޭފުޅުންގެ ޤާނޫނީ ޓީމުތަކާއި ބައްދަލުކުރެއްވުމަށް ސަރުކާރުން ދަނީ އެކި ކަހަލަ ހުރަސްތައް ކުރިމަތިކުރަމުންނެވެ.
