ބެންގަލޫރު އަތްދަށުވެ ޓީސީއަށް އިތުރު ގޮންޖެހުމެއް

އޭއެފްސީ ކަޕްގެ ޕްލޭއޮފްގައި އިންޑިއާގެ ބެންގަލޫރު އެފްސީ އަތުން ބަލިވެ އެ މުބާރާތުގެ ގްރޫޕް ސްޓޭޖަށް ކޮލިފައިވުމަށް ރާއްޖޭގެ ޓީސީ ސްޕޯޓްސް ކްލަބްއަށް އިތުރު ގޮންޖެހުންތަކަކާއި ކުރިމަތިވެއްޖެއެވެ.

ގަލޮޅު ދަނޑުގައި ކުޅުނު މި މެޗުން ޓީސީ ބަލިވީ ވާދަވެރި ކުޅުމަކަށްފަހު 3-2 ގެ ނަތީޖާއަކުންނެވެ. މި މެޗުގައި ޓީސީގެ ފަރާތުން ރަނގަޅު ކުޅުމެއް ފެނިގެންދިޔައިރު އެ ޓީމުން ވަނީ ލަނޑު ޖެހުމަށް ހުސް ގިނަ ފުރުސަތުތަކެއް ތަނަވަސްކޮށްފައެވެ. އެހެން ނަމަވެސް އެ ޓީމަށް ލިބުނު ފުރުސަތުތަކުގެ ބޭނުން އެންމެ ފުރިހަމަ ގޮތުގައި ހިފިފައިނުވާއިރު ބެންގަލޫރުން ވަނީ ވިސްނައިގެން ކުޅެ ލަނޑުތަކެއް ކާމިޔާބުކޮށްފައެވެ.

ފުރަތަމަ ހާފު ފެށިގެން ޓީސީއިން ވަނީ ބެންގަލޫރުގެ ގޯލަށް ނުރައްކާ ކުރުމަށް މަސައްކަތްކޮށްފައެވެ. އެ ޓީމުގެ އެންމެ ކުރިޔަށް ކުޅެމުންދިޔަ އިބްރާހިމް މަހުދީ ހުސައިން (ފޭދޫ އިއްބެ) އަށް ވަނީ ލަނޑު ޖެހުމަށް ރަނގަޅު ފުރުސަތުތަކެއް ލިބި ބޭކާރުވެފައެވެ. މި ހާފުގައި ބެންގަލޫރުގެ ކީޕަރު ރަލްޓޭ މާވިއާ އަދި އެ ޓީމުގެ ޑިފެންޑަރުން ވަނީ ޓީސީގެ ހަމަލާތައް ހުއްޓުވުމަށް ގިނަ މަސައްކަތްތަކެއް ކޮށްފައެވެ.

ޓީސީ އަދި ބެންގަލޫރު ބައްދަލުކުރި މެޗުގެ ތެރެއިން

ދެ ޓީމު އެއްވަރުވެއޮވެ ފުރަތަމަ ހާފު ނިމިގެންދިޔައިރު ދެވަނަ ހާފުގައި މެޗުގެ ކުޅުން އިތުރަށް ފޯރިގަދަ ވެގެން ގޮސްފައިވެއެވެ. މި މެޗުގެ ފުރަތަމަ ލަނޑު މެޗުގެ 51 ވަނަ މިނެޓުގައި ބެންގަލޫރަށް ޖަހައިދިނީ ސެމްބޯއިއެވެ. އެ ޓީމުގެ ދެވަނަ ލަނޑު މެޗުގެ 70 ވަނަ މިނެޓުގައި ޖަހައިދިނީ އެރިކް ޕާޓަލޫއެވެ. އެހެން ނަމަވެސް އޭގެ ކުޑައިރުކޮޅެއް ފަހުން ޓީސީގެ އެނަޓޮލީ ވްލަޝިޗޭވް ވަނީ އެ ޓީމަށް ލަނޑެއް ޖަހައިދީ މެޗުގެ ނަތީޖާ ހަމަހަމަކޮށްދީފައެވެ. މިއީ އޭނާ މިއަހަރުގެ އޭއެފްސީ ކަޕްގައި މިހާތަނަށް ކާމިޔާބުކުރި ފަސްވަނަ ލަނޑެވެ.

ޓީސީއަށް މެޗުގެ ނަތީޖާ ހަމަހަމަވެގެންދިޔައީ މެޗުގެ 73 ވަނަ މިނެޓުގައި ފޭދޫ އިއްބެ ޖަހައިދިން ލަނޑުންނެވެ. ޓީސީއިން މި ދެ ލަނޑަށްފަހު އެ ޓީމުގެ ކުޅުން އިތުރަށް ވަރުގަދަކުރި ނަމަވެސް ބެންގަލޫރުގެ ސެމްބޯއި ވަނީ 77 ވަނަ މިނެޓުގައި ލަނޑެއް ޖަހައިދީ ބެންގަލޫރަށް ފުރަތަމަ ލެގުގެ އެޑްވާންޓޭޖް ކަށަވަރުކޮށްދީފައެވެ.

ޓީސީ އަދި ބެންގަލޫރު ބައްދަލުކުރި މެޗުގެ ތެރެއިން

މި މުބާރާތުގެ ގްރޫޕް ސްޓޭޖުގެ ޖާގައެއް ކަށަވަރުކުރަން ބޭނުންވާނަމަ ދެވަނަ ލެގުގެ މެޗު ދެ ލަނޑުގެ ތަފާތުން ކާމިޔާބުކުރުން ޓީސީއަށް ވަނީ މަޖުބޫރުވެފައެވެ. ދެވަނަ ލެގު އެއްވަރުވިނަމަވެސް ނުވަތަ އެއް ލަނޑުގެ ތަފާތުން ޓީސީ މޮޅުވިޔަސް ގްރޫޕް ސްޓޭޖުގެ ޖާގަ ލިބޭނީ ބެންގަލޫރަށެވެ. މި ދެ ޓީމު ބައްދަލުކުރާ ދެވަނަ ލެގުގެ މެޗު އޮންނާނީ މި މަހުގެ 20 ވަނަ ދުވަހު އިންޑިއާގައެވެ.