އެންދެރިގަސްގެ ޑްރައިވަރު ހައްޔަރުކޮށް، ވަކީލެއްގެ އެހީތެރިކަމުން މަހުރޫމްކޮށްފައިވަނީ ވަކި ގޮތަކަށް ބަޔާންތައް ހޯދުމަށް: ވަކީލް
12 ފެބުރުއަރީ 2018 | ހޯމަ 02:33ވަކީލު ނެތި ގޮޅިން ނެރެ ސުވާލުކޮށްފައިވޭ
މ. އެންދެރިމާގެ ސަރަހައްދުގައި ފުލުހުންތަކެއް ހަރަކާތްތެރިވަނީ، މ. އެންދެރިގަސްގެ ޑްރައިވަރު ހުރީ ފުލުހުންގެ ހައްޔަރުގައި
މ. އެންދެރިގަހުން ހައްޔަރުކުރި، ސްރީލަންކާގެ ރައްޔިތެއް ކަމަށްވާ ޕޮނިއާ ސުދާގަރު ޤާނޫނީ ވަކީލެއްގެ އެހީތެރިކަމުން މަހުރޫމް ކޮށްފައިވާކަމަށާއި، އެކަން އެގޮތަށް ކުރަނީ ފުލުހުން ބޭނުންވާ ވަކިގޮތަކަށް ބަޔާންތައް ހޯދުމަށް ކަމަށް އޭނާގެ ޤާނޫނީ ވަކީލް ވިދާޅުވެއްޖެ އެވެ.
ސުދާގަރުގެ ޤާނޫނީ ވަކީލުންގެ ފަރާތުން ނެރުނު ބަޔާނުގައި ވަކީލް މުހައްމަދު ފައްވާޒް ވިދާޅުވީ، ސްރީލަންކާގެ ރައްޔިތެއް ކަމަށްވާ ސުދާގަރުގެ މައްޗަށް ތުހުމަތު ކޮށްފައިވާ ކުށަކީ ޤާނޫނާ ޚިލާފަށް ދިވެހިރާއްޖޭގައި އުފެދިފައިވާ ޤާނޫނީ ވެރިކަން ވައްޓާލުމަށް ރައްޔިތުންގެ މަޖިލީހުގެ މެންބަރުން ތަކަކަށް ރިޝްވަތުގެ ގޮތުގައި ފައިސާދީ، އަދި އިތުރު މެންބަރުން ތަކަކަށް ރިޝްވަތުގެ ގޮތުގައި ފައިސާ ދޭން އުޅުމުގެ ތުހުމަތު ކަމަށެވެ. އޭގެއިތުރުން، ޓެރަރިޒަމް މަނާކުރުމުގެ ޤާނޫނުގެ ދަށުން ޓެރަރިޒަމްގެ ޢަމަލެއް ހިންގުމަށް އުޅުމުގެ ކުށުގެ ތުހުމަތު ވެސް ކޮށްފައިވާ ކަމަށެވެ.
ވަކީލް ވިދާޅުވީ ޕޮނިއާ ސުދާގަރު ހައްޔަރު ކުރުމަށް ފަހު، އޭނާއާ ބައްދަލު ކުރުމަށް ޤާނޫނީ ވަކީލު ދިޔައިރު، އެރޭގެ ދަންވަރުގެ ވަގުތެއްގައި، ޕޮނިއާ ސުދާގަރު ބަންދު ކޮށްފައިވާ ގޮޅިންނެރެ، ތަޙުޤީޤަށް ސުވާލު ކޮށްފައިވާ ކަމަށް އޭނާ ވަނީ ވަކީލަށް މަޢުލޫމާތު ދީފައި ކަމަށެވެ. އަދި ވަކީލެއްގެ ފުރުޞަތު ބޭނުންވާކަމަށް ބުނުމުން، ތަޙުޤީޤު ކުރިއަށް ގެންދިއުމުގައި ވަކީލަކު ހުރުން މުހިންމު ނޫންކަމުގައި ތަހުޤީޤުކުރި ފުލުހުން ސުދާގަރު ކައިރިގައި ބުނެފައިވާކަމަށް ވަކީލް ވިދާޅުވި އެވެ.
ކޯޓުން ޕޮނިއާ ސުދާގަރު 15 ދުވަހުގެ މުއްދަތަށް ބަންދުކުރަން އަމުރު ކުރުމުން، ބަންދުކުރެވޭ އެހެން މީހުންނާ ޚިލާފަށް ޕޮނިއާ ސުދާގަރު ބަންދުކުރެވުނީ ވިލިމާލޭގައި ހުންނަ ފުލުހުންގެ މަރުކަޒުގައިކަން ފާހަގަކޮށް ވަކީލް ފައްވާޒް ވިދާޅުވީ ޕޮނިއާ ސުދާގަރުގެ ޤާނޫނީ ވަކީލު އެމައްސަލައިގެ ތުހުމަތުކުރެވޭ އެހެން މީހެއްގެ ވަކީލެއްގެ ގޮތުގައި ޢައްޔަނުވެފައިވާތީ ޕޮނިއާ ސުދާގަރުގެ ވަކީލުކަމުން ފަހުން ވަނީ ތަނާޛުލުވެފައި ކަމަށެވެ. އަދި ޕޮނިއާ ސުދާގަރުގެ ޤާނޫނީ ވަކީލެއްގެ ގޮތުގައި ޢައްޔަނުވުމަށް، އޭނާ ހުށަހެޅުމުން، އޭނާ ޤާނޫނީ ވަކީލެއްގެ ފުރުޞަތު ބޭނުން ނުވާ ކަމަށް މިހާރު ބުނެފައިވާ ކަމަށް ބުނެ ވަކީލެއްގެ ގޮތުގައި ޢައްޔަނު ނުވެވޭނޭ ކަމަށް މޯލްޑިވްސް ޕޮލިސް ސަރވިސްއިން ބުނެފައިވާ ކަމަށް ފައްވާޒް ވިދާޅުވި އެވެ. ނަމަވެސް އެއީ އެކަން އޮންނަ އުސޫލު ނޫން ކަމަށް އޭނާ ވިދާޅުވި އެވެ.
"ޤާނޫނީ ވަކީލުންގެ އެހީތެރިކަން ދިނުމުގެ ދާއިރާއަކީ ހަމައެކަނި ތަޙުޤީޤު ހިންގުން ކަމުގައިނުވާއިރު، މައްސަލައެއްގެ ތަޙްޤީޤަށް ޤާނޫނީ ވަކީލަކު ބޭނުންނުވާ ކަމަށް ބުނެފައިވުމަކީ ވަކީލެއްގެ އެހީތެރިކަން ލިބުމުގެ ޙައްޤު އެއްކޮށް ގެއްލިގެން ދިއުމެއް ނޫނެވެ. އެއީ މީގެ ކުރިން ޢަމަލުކުރާ އުޞޫލެއްވެސް ނޫނެވެ." ޤާނޫނީ ވަކީލުގެ ބަޔާނުގައި ބުނެފައިވެއެވެ.
ވަކީލް ވިދާޅުވީ ޕޮނިއާ ސުދާގަރު ހައްޔަރުކޮށް، އެކަހެރިކޮށްގެން، ޤާނޫނީ ވަކީލެއްގެ ފުރުޞަތު ވެސް ނުދީ ހިފަހައްޓާފައިވަނީ އޭނާގެ ފަރާތުން ވަކި ގޮތަކަށް ބަޔާން ހޯދައި، ހިނގަމުންދާ މައްސަލައެއްގެ ތަޙުޤީޤު ވަކި ދިމާލަކަށް އަނބުރާލުމުގެ ބޭނުމުގައި ކަމުގައި ދެކޭ ކަމަށެވެ. އަދި ޕޮނިއާ ސުދާގަރު ހައްޔަރުކުރެވުނު ވަގުތުން ފެށިގެން އޭނާގެ މައްޗަށް ތުހުމަތުކުރެވޭ މައްސަލަ ތަޙްޤީޤު ކުރުމުގައާއި، އޭނާގެ ޙައްޤުތައް ލިބިދިނުމުގައި މޯލްޑިވްސް ޕޮލިސް ސަރވިސްއިން އޭނާއަށް ޙަޤީޤަތް އޮޅުވަލައި، އަދި އޭނާއަށް ލިބިގެންވާ ޤާނޫނީ ވަކީލެއްގެ އެހީތެރިކަން ލިބިގަތުމުގެ ފުރުޞަތަށް ހުރަސް އަޅަމުންދިއުމަކީ އޭނާގެ ޤާނޫނީ ވަކީލުންގެ ޙައިސިއްޔަތުން ކަންބޮޑުވާކަމެއް ކަމަށް ބަޔާނުގައި ބުނެފައިވެއެވެ.
