އިނގިރޭސި ވިލާތާއި އިންޑިޔާގެ ނޫސްވެރިއަކު ހައްޔަރުކޮށް ޑިޕޯޓްކޮށްލަނީ
9 ފެބުރުއަރީ 2018 | ހުކުރު 15:27ފުލުހުން ބުނީ އެމީހުން އުޅެމުންދިޔައީ ގާނޫނާ ހިލާފަށް ކަމަށް
ހައްޔަރުކުރި އެއް ނޫސްވެރިއަކު ފުލުހުންނާއެކު --- ފޮޓޯ/ ޓްވިޓާ
ރާއްޖެ އައިސް އުޅުނު އިނގިރޭސި ވިލާތާއި އިންޑިޔާގެ ނޫސްވެރިއަކު ހައްޔަރުކޮށް އިމިގްރޭޝަނާ ހަވާލުކޮށްފައިވާ ކަމަށް ފުލުހުން ބުނެފިއެވެ.
ފުލުހުން މިކަން ހާމަކުރީ މިއަދެވެ. ނަމަވެސް އެމީހުން ހައްޔަރުކުރީ ކޮންއިރަކު ކަމެއް ފުލުހުން ނުބުނެއެވެ.
އެ ދެ މީހުން އިމިގްރޭޝަނާ ހަވާލުކުރީ ރާއްޖޭގެ އިމިގްރޭޝަން ގާނޫނާއި ގަވައިދާއި ހިލާފުވެފައި ވާތީ އެމީހުންނާ މެދު ފިޔަވަޅުއެޅުމަށް ކަމަށް ވެސް ފުލުހުން ބުނެފައި ވެއެވެ. ނަމަވެސް އެމީހުން ހައްޔަރުކުރީ ކޮން ކަމަކާ ގުޅިގެން ކަމެއް އަދި ކުރީ ކޮން ކުށެއް ކަމެއް ފުލުހުން ނުބުނެއެވެ. މައުލޫމާތު ލިބިފައިވާ ގޮތުގައި އެއީ އޭފްޕީގެ ދެ ނޫސްވެރިންނެވެ. އޭގެ ތެރެއިން އެކަކީ އިންޑިއާގެ އޭއެފްޕީގެ ފޮޓޯގްރާފަރެއް ކަމަށްވާ މަނީ ޝަރްމާ ކަމަށް އެނގިފައި ވެއެވެ.
މި ދެ ނޫސްވެރިން ހައްޔަރުކޮށްފައިވާ އިރު މިއަދު ހަވީރު އެމްޑީޕީގެ ހަރުގެ ސަރަހައްދު ޗައިނާގެ ނޫސްވެރިންތަކެއް އެއްވެސް ހުރަހެއް ނެތި ހަރަކާތްތެރިވަމުން ދިޔަތައް ފެނިފައި ވެއެވެ. އަދި އެމީހުން ފޮޓޯތައް ސޯޝަލް މީޑިއާގައި ވަނީ އާންމުވެފައެވެ.
