އިންޒާރުތަކާއި ގުޅިގެން ރާއްޖެޓީވީގެ އާންމު ކޮންޓެންޓް ބްރޯޑްކާސްޓް ކުރުން މެދުކަނޑާލައިފި
8 ފެބުރުއަރީ 2018 | ބުރާސްފަތި 23:30އާއްމު ކޮންޓެންޓް ބްރޯޑްކާސްޓް ކުރުން މެދުކަނޑާލީ ބިރުވެރިކަމެއް ނެތި ނޫސްވެރިންނަށް މަސައްކަތް ކުރެވޭނެ މާހައުލެއް ރާއްޖޭގައި މިހާރު އޮތް ކަމަށް ގަބޫލު ނުކުރެވޭތީ
ރާއްޖެޓީވީގެ ކޮންޓްރޯލް ރޫމް
ރާއްޖެޓީވީ އަށް ލިބެމުންދިޔަ އިންޒާރުތަކާއި ގުޅިގެން، ބިރުވެރިކަމެއް ނެތި ނޫސްވެރިންނަށް މަސައްކަތް ކުރެވޭނެ މާހައުލެއް ރާއްޖޭގައި މިހާރު އޮތް ކަމަށް ގަބޫލު ނުކުރެވޭތީ ރާއްޖެޓީވީގެ އާންމު ކޮންޓެންޓް ބްރޯޑްކާސްޓް ކުރުން މެދުކަނޑާލައިފި އެވެ.
ރާއްޖެޓީވީގެ އާންމު ކޮންޓެންޓް ބްރޯޑްކާސްޓް ކުރުން މެދުކަނޑާލިކަން ހާމަކޮށް އެ ސްޓޭޝަނުން ބުރާސްފަތި ދުވަހުގެރޭ އާއްމު ކުރި ބަޔާނުގައި ވަނީ، އެ ސްޓޭޝަނުން އާއްމުކޮށް ގެނެސްދޭ ކޮންޓެންޓް މެދުކަނޑާލަން މަޖުބޫރުވީ، މިނިވަން ނޫސްވެރިކަމުގެ މާހައުލެއް ނެތުމާއި، ރާއްޖެޓީވީ އާ އެ ސްޓޭޝަންގެ މުވައްޒަފުންގެ ސަލާމަތާއި ރައްކާތެރިކަން ކަށަވަރު ކޮށްދިނުމަށް ދައުލަތުގެ ކަމާއިބެހޭ މުއައްސަސާތަކުން އެއްބާރުލުން ދެމުންނުދާތީ ކަމަށެވެ.
ފެބްރުއަރީ މަހުގެ އެއްވަނަ ދުވަހުގެރޭ ސުޕްރީމް ކޯޓުން ނެރުނު އަމުރަށްފަހު ރާއްޖޭގައި ހިނގަމުންދާ ކަންތައްތަކުގެ ތަފްސީލް ހިމަނައިގެން ކުރިއަށް ގެންދިޔަ 24 ގަޑިއިރުގެ ކަވަރޭޖް އާ ގުޅިގެން އެ ސްޓޭޝަނަށް ތަފާތު އިންޒާރުތައް ލިބެމުންދިޔަ ކަމަށް ރާއްޖެޓީވީ އިން ބުނެއެވެ.
އެގޮތުން ސަރުކާރަށް ތާއީދު ކުރާ ބަޔަކު ރާއްޖެޓީވީ ހުންނަ އިމާރާތުގެ ކައިރިއަށް ގޮސް ސްޓޭޝަން ރޯކޮށްލުމަށް ގޮވުމާއި، ސޯޝަލް މީޑިއާގައި ތަފާތު އިންޒާރުތައް ދީފައިވާ ކަމަށާއި، އެހެންނަމަވެސް އެއިން އެއްވެސް ކަމަކަށް ދައުލަތުގެ ފަރާތުން އެއްވެސް ފިޔަވަޅެއް އަޅާފައިނުވާ ކަން ރާއްޖެޓީވީގެ ބަޔާނުގައި ފާހަގަކޮށްފައިވެއެވެ. އަދި ކުއްލި ނުރައްކަލުގެ ހާލަތު އިއުލާން ކުރުމާއި ގުޅިގެން ރާއްޖެޓީވީ އަށާއި ރާއްޖެޓީވީގެ މުވައްޒަފުންނަށް ދެމުންދިޔަ އިންޒާރުތައް އިތުރުވެގެން ދިޔަ ކަމަށް އެސްޓޭޝަނުން ނެރުނު ބަޔާނުގައިވެއެވެ.
"ކުއްލި ނުރައްކަލުގެ ހާލަތު އިއުލާނު ކުރުމާއި ގުޅިގެން ރާއްޖެޓީވީ އަށާއި ރާއްޖެޓީވީގެ މުވައްޒަފުންނަށް ދެމުން ދިޔަ އިންޒާރުތައް އިތުރުވެގެން ދިޔަކަން ފާހަގަ ވެއެވެ. މިފަދަ ބިރުވެރި އުނދަގޫ ހާލަތުގައިވެސް ރާއްޖެޓީވީގެ ނޫސްވެރިން ހުއްޓުމެއް ނެތި ސައުވީސް ގަޑީއިރު މަސައްކަތް ކުރަމުން ދިޔައީ ދިވެހި ރައްޔިތުންނަށް ހިނގަމުންދާ ކަންކަމުގެ މައުލޫމާތު އެންމެ ފުރިހަމަ އަށް ވަކި ފަރާތަކަށް ބުރަވުމެއް ނެތި ގެނެސް ދިނުމުގައެވެ."
ރާއްޖެޓީވީގެ ކަވަރޭޖް ކުރިއަށް ގެންދަނިކޮށް، އިންޒާރެއް ދިނުމެއް ނެތި ބްރޯޑްކާސްޓަރުންނާއިމެދު ފިޔަވަޅު އަޅާނެކަން ބުރާސްފަތި ދުވަހުގެ އިރާކޮޅު މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން އެންގުމާއެކު، މިނިވަން ކަމާއެކު މީޑީއާ ހަރާކާތްތެރިވާނެ މާހައުލެއް ނެތްކަން ކަށަވަރު ވެގެން ހިނގައްޖެ ކަމަށް އެ ސްޓޭޝަނުން ދެކޭ ކަމަށާއި، އެފަދަ ފިޔަވަޅެއް އަޅައިފިނަމަ އެކަން ހައްލު ކުރުމަށް ޝަރުއީ ގޮތުން އޮތް ހައްގުތައް ގެއްލިފައިވާކަންވެސް އެބަޔާނުގައި ފާހަގަކޮށްފައިވެއެވެ.
ރާއްޖެޓީވީ އަށް ބިރުދެއްކުމާއި، ރޯކޮށްލާނެ ކަމަށް ބުނެ އިންޒާރު ދެމުން ދަނިކޮށް، ފުލުހުންގެ ފަރާތުން ރާއްޖެޓީވީ އަށް ދެމުންދިޔަ ރައްކާތެރިކަމާއި ހިމާޔަތް ކަނޑާލާފައިވާ ކަމަށް އެސްޓޭޝަންގެ ބަޔާނުގައިވެއެވެ. އަދި ރާއްޖޭގައި ފެތުރިފައިވާ ބިރުވެރި ޙާލަތު އަވަހަށް ރަނގަޅުވެ، ނޫސްވެރިންނަށް މިނިވަންކަމާއެކު މަސައްކަތް ކުރެވޭނެ މާހައުލެއް އަވަހަށް ތަނަވަސް ވެގެންދާނެ ކަމަށް އުއްމީދު ކުރާ ކަމަށް ރާއްޖެޓީވީގެ ބަޔާނުގައިވެއެވެ.
"ރާއްޖެޓީވީ އަކީ ރާއްޖޭގެ އެންމެ ގިނަ މީހުން ބަލާ ޗެނެލް ކަމަށް ވުމާއެކު، ޚިދުމަތް މެދުކަނޑާލުމުން ޚަބަރާއި މައުލޫމާތު ލިބުމުގައި ރައްޔިތުންނަށް ކުރިމަތިވާ ދަތިތަކަށް ނިހާޔަތައް މާފަށް އެދެމެވެ. އަދި ރާއްޖެޓީވީން އުއްމީދު ކުރަނީ ރާއްޖޭގައި ފެތުރިފައިވާ ބިރުވެރި ޙާލަތު އަވަހަށް ރަނގަޅުވެ، ނޫސްވެރިންނަށް މިނިވަންކަމާއެކު މަސައްކަތް ކުރެވޭނެ މާހައުލެއް އަވަހަށް ތަނަވަސް ވެގެން ދިއުމެވެ."
ސިޔާސީ ކުށްވެރިން މިނިވަންކޮށް، ރައްޔިތުންގެ މަޖިލީހުގެ 12 މެމްބަރެއްގެ ގޮނޑި ނުގެއްލޭ ކަމަށް ސުޕްރީމް ކޯޓުގެ ފަސް ފަނޑިޔާރުންގެ އިއްތިފާގުން ފެބްރުއަރީ މަހުގެ 1 ވަނަ ދުވަހު ކުރި އަމުރާއި ގުޅޭ ކަވަރޭޖް ފެށިފަހުން ވެރިކަން ކުރާ ޕީޕީއެމްގެ އިސް ބައެއް ބޭފުޅުން ވަނީ ދައުލަތުގެ މީޑިއާ އާއި އަމިއްލަ ބައެއް މީޑިއާތައް މެދުވެރިކޮށް ރާއްޖެޓީވީ ބަންދު ކުރުމަށް ގޮވާލާފައެވެ. މީގެ އިތުރުން ވެރިކަން ކުރާ ޕާޓީ އަށް ނިސްބަތްވާ ބައެއް ބޭފުޅުން ސޯޝަލް މީޑިއާ މެދުވެރިކޮށް، އަދި މަގުމަތީގައިވެސް ރާއްޖެޓީވީ ނައްތާލުމަށް ގޮވާލާފައިވެއެވެ.
މީގެ ކުރިންވެސް ރާއްޖެޓީވީ އަށް ތަފާތު އެކި އިންޒާރުދީ، ސްޓޭޝަން ހުއްޓުވުވާލުމަށް ގިނަ މަސައްކަތްތަކެއް ކޮށްފައިވެއެވެ. އެގޮތުން ރާއްޖެޓީވީގެ ތަކެއްޗަށް ގެއްލުން ދިނުމާއި، މުވައްޒަފުންގެ ފުރާނަ އަށް ނުރައްކާވާފަދަ ހަމަލާތައް ދިނުމާއި، ސްޓޭޝަންގައި ހުޅުޖަހާ ރޯކޮށްލުމުގެ އިތުރުން ނޫސްވެރިން ހައްޔަރުކޮށް ނުހައްގު ދައުވާ އުފުލުމާއި، ބޮޑެތި އަދަދުތަކުން ޖޫރިމަނާ ކުރުން ހިމެނެއެވެ.
