އިސްކުރަންވީ އިންސާފެވެ. ހަމަހަމަ ކަމެވެ. އަދުލަށް އިހްތިރާމް ކުރުމަކީ ހަމަޖެހުމުގެ އަސްލެވެ. ނަމަވެސް އަންގާރަ ދުވަހުގެ ރޭ ފެނިގެން ދިޔަ މަންޒަރު ރައްޔިތުންނަށް ފެންނާނެއެވެ. ރައީސް އަބްދުﷲ ޔާމީން ބައިވެރިވެވަޑައިގެންނެވި ސިޔާސީ ރެލީއަށް ސަލާމަތީ ހިދުމަތްތަކުން ދެމުން ގެންދިޔައީ ރައްކާތެރި ކަމެވެ. ހިމާޔަތެވެ. ބަޑި ހިފައިގެން ތިބީ ރައީސް ޔާމީން ބައިވެރިވެވަޑައިގެންނެވި ޖަލްސާގެ ހިމާޔަތުގައެވެ. އަޑުއުފުލުގައި މިނެއް ނެތް މިންވަރަށް އެ ފުރުސަތު ދިނީ ސިފައިންނާއި ފުލުހުންނެވެ. ރައީސް ޔާމީން ވަޑައިގެންނެވި ޖަލްސާ ކުރިއަށް ދިޔަ ރުމާލު 2 ޖަގަހަ ހިމެނޭ ސަރަހައްދުގެ މަގުތަކަށް މީހުން އެއްވެ، އަޑުއުފުލޭނެ އިންތިޒާމް ފަހިކޮށްދިނީ ރައްޔިތުންގެ ފައިސާއިން މުސާރަ ދެމުންދާ ފުލުހުންނާއި ސިފައިންނެވެ.

ނަމަވެސް ގުޅިފައިވާ ޕާޓީތަކުގެ ސިޔާސީ ހަރަކާތް ފެށުމަށް ތައްޔާރުވެފައި ވަނިކޮށް، އެމްޑީޕީ ހަރުގެ ހިމެނޭ ސަރަހައްދު ބަންދުކުރިއެވެ. ހަރުގެ ކުރިމަތީގައި ޖަހާފައިވާ ބެރިކޭޑުތަކުގެ ކުރިމަތީގައި ފުލުހުން އެތުރިގަތެވެ. އެއްވާ މީހުން ދުރަށް ޖެއްސި އެވެ. ދެކޮޅު ހަދާ މީހުން އެތަނުން ފައްސާލިއެވެ. ހިޔާލު ފާޅުކުރުމުގެ މިނިވަންކަމަށް ހުރަސްއެޅިއެވެ. އެއްވެ އުޅުމުގެ މިނިވަންކަމަށް ހުރަސްއެޅިއެވެ. ގުޅިފައިވާ ޕާޓީތަކުން ސަރުކާރު ޖަވާބުދާރީ ކުރުވުމަށް ފެށި ހަރަކާތް ހުއްޓުވިއެވެ. ގާނޫނުއަސާސީން މުތުލަގަށް ކަށަވަރުކޮށްދީފައިވާ ހަމަހަމަކަން ކޮބައިތޯއެވެ. ރައްޔިތުން ބަލައިގެންފައިވާ ނިޒާމުގައި މުއައްސަސާތައް ފާރަވެރިވުމަށް ބާރުދީފައިވާ ކަންކަން ކޮބައިތޯއެވެ.

ހަމަހަމަ ކަމެއް ނެތެވެ. އިންސާފެއް ނެތެވެ. އަދުލެއް ނެތްކަން ސާބިތުކޮށްދިނީ ސިފައިންނާއި ފުލުހުންނެވެ. ސިޔާސީ ދެ ފިކުރުގެ މީހުންނަށް ތަފާތު ކުރުމުގައި އިންތިހާ ފެނިގެން އެ ދިޔައީއެވެ. ރުމާލު 2 ޖަގަހާގައި ބޭއްވި އެއްވުމަށް ހިމާޔަތް ދީ، އަޑު އުފުލުމަށް ފުރުސަތު ދިންއިރު، ގުޅިފައިވާ ޕާޓީތަކުން ހިންގި ހަރަކާތަށް އެޅީ ހުރަހެވެ. ހަމަގޮތް ރައްޔިތުންނަށް ފެންނާނެއެވެ.

ވަކި ބަޔަކަށް ފުރުސަތު ދިންއިރު، ކުއްލި ނުރައްކަލުގެ ހާލަތު އިއުލާން ކުރުމަށް ނެރުނު ގަރާތުގައި ހަޅުތާލު ކުރުމާއި އެއްވެ އުޅުމުގެ މިނިވަންކަން ލިބިދޭ މާއްދާތައް ވަނީ ސަސްޕެންޑްކޮށްފައެވެ. ކުއްލި ނުރައްކަލުގެ ހާލަތުގައި ވެސް ސުލްހަވެރި ހަރަކާތް ހިންގޭނެ ކަމަށް ގާނޫނުއަސާސީން ވަނީ ބާރުދީފައެވެ. ނަމަވެސް އެ ފުރުސަތު ނުދިނެވެ. ސުލްހަވެރި ހަރަކާތް ހިންގައި، ޖަވާބުދާރީ ކުރުވުމަށް ދީފައިވާ ފުރުސަތު އިދިކޮޅަކަށް ވެސް ނުލިބުނެވެ.

މި ހުރިހާ ކަމެއް ނިއުޅި، އެނބުރެމުން މި ދަނީ ރައްޔިތުންގެ ކުރިމަތީގައެވެ. ހާލަތު ބަދަލުވެގެން ދިޔަ ގޮތާއި އަސްލަށް ރުޖޫއަވުމުގައި ކަން ވެގެންދިޔަ ގޮތް ރައްޔިތުން ދެކޭނެއެވެ. ހަމަ އާއި އިންސާފު މިނެ ކިރާނީ ރައްޔިތުންނެވެ. ޣައްދާރުވުމުން ފަސާދަ އާއި ކޮރަޕްޝަން ފެތުރިގެންދިޔަ ގޮތް ވެސް ރައްޔިތުންނަށް ފެނުނެވެ. ގޯސް މައްޗަށް ގޯސް ހަދައި، ވަކިކުރެވިފައިވާ ބާރުތައް މުށުތެރަށް ލީ މަންޒަރު ވެސް ފެންނާނެއެވެ. އެބައެއްގެ ހާލަތު ބަދަލު ކުރާނީ އެބައެކެވެ.