ކުއްލި ހާލަތުގެ ގަރާރު ބާތިލްކުރަން ސުޕްރީމް ކޯޓަށް ހުށަހަޅައިފި

ކުއްލި ނުރައްކަލުގެ ހާލަތު އިއުލާނުކުރަން ނެރުއްވި ގަރާރު ބާތިލްކުރަން ސުޕްރީމް ކޯޓަށް ހުށަހަޅައިފިއެވެ.

ގައުމީ ސަލާމަތަށް ނުރައްކާވާ ކަމަށް ބުނެ ކުއްލި ހާލަތު އިއުލާނުކުރީ ހޯމަ ދުވަހުގެ އިރާކޮޅުގައެވެ. މިއީ ރައީސް އަބްދުﷲ ޔާމީންގެ ވެރިކަމުގައި ކުއްލި ނުރައްކަލުގެ ހާލަތު އިއުލާނުކުރި ދެވަނަ ފަހަރެވެ. މީގެ ކުރިން، 2015 ވަނަ އަހަރުގެ ނޮވެމްބަރުގައި ވެސް ކުއްލި ނުރައްކަލުގެ ހާލަތު އިއުލާނުކުރިއެވެ.

ރައީސުލްޖުމްހޫރިއްޔާ ހޯމަ ދުވަހު ނެރުއްވި ގަރާރުގައި ގާނޫނުއަސާސީގެ 20 މާއްދާއަކުން ރައްޔިތުންނަށް ކަށަވަރުކޮށް ދޭ ހައްގުތަކާއި މުއައްސަސާތަކަށް ލިބިގެންވާ ބާރުތައް ވަނީ ހިފަހައްޓާފައެވެ. ހިފަހައްޓާފައިވާ ހައްގުތަކުގެ ތެރޭގައި ޒާތީ ދިރިއުޅުމުގެ ހައްގާއި މައުލޫމާތު ހޯދައި ލިބިގަތުމުގެ ހައްގާއި އެއްވެ އުޅުމުގެ ހައްގާއި ސުޕްރީމް ކޯޓުގެ ބާރުތައް ހިފެހެއްޓުން ހިމެނެއެވެ.

ގަރާރު ބާތިލްކުރަން ހޯމަ ދުވަހުގެ ރޭ 10:30 ހާއިރު ހުށަހަޅާފައިވަނީ، ރައީސް މައުމޫން އަބްދުލްގައްޔޫމްގެ ދަރިކަނބަލުން ޔުމްނާ މައުމޫންގެ ފަރާތުންނެވެ.

އެ މައްސަލައިގައިވާ ގޮތުގައި، ކުއްލި ނުރައްކަލުގެ ހާލަތު އިއުލާނުކުރަންޖެހޭ ފަދަ ހާލަތަކަށް ގައުމު ގޮސްފައިނުވާ ކަމަށް ބުނެއެވެ. އަދި، ކުއްލި ނުރައްކަލުގެ ހާލަތެއްގައި ވެސް ސުޕްރީމް ކޯޓުގެ ބާރުތައް ނުހިފަހެއްޓޭނެ ކަމަށް ސުޕްރީމް ކޯޓަށް ހުށަހެޅި ދުސްތޫރީ މައްސަލައިގައި ވެއެވެ.