ސުޕްރީމް ކޯޓަށް އަބްދުއްރަހީމްގެ އިންޒާރެއް: ކޮންމެ އަމުރެއް ނެރުނަސް ހެޔޮ، ބޭނުންހާ އެއްޗެއް ނުހެދޭނެ!
ގައުމު ހަލާކުގެ ތެރެއަށް ވައްޓާލަންދެން ކުރަންޖެހޭ ކަންތައްތައް ނުކޮށް ނުހުންނާނަން
އަބްދުއްރަހީމް
ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)ގެ ނާއިބު ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު އަބްދުރަހީމް އަބްދުﷲ ރާއްޖޭގެ ސުޕްރީމް ކޯޓަށް އިންޒާރު ދެއްވައިފިއެވެ.
ހޯމަދުވަހު ބޭއްވި ޕީޕީއެމްގެ ނޫސްވެރިންގެ ބައްދަލުކުރެއްވުމެއްގައި އަބްދުއްރަހީމް ވަނީ އުއްތަމަ ފަނޑިޔާރު އަބްދުﷲ ސައީދަށާއި ސުޕްރީމް ކޯޓަށް ފާޑު ވެސް ވިދާޅުވެފައެވެ. އަބްދުއްރަހީމް ވިދާޅުވީ ހަމައެކަނި ސުޕްރީމްކޯޓަށް "މިގައުމުގެ ދުވަސް ދުއްވައެއް ނުލެވޭނެ" ކަމަށާއި "ސުޕްރީމްކޯޓުން ބޭނުންހާ އެއްޗެއް ހަދަންދެނ" އެބޭފުޅުން މަޑުން ނުތިއްބަވާނެ ކަމަށެވެ. މިއީ ހަމައެކަނި ފަސް މީހެއްގެ ގައުމެއް ނޫން ކަމަށް ސުޕްރީމް ކޯޓުގެ ފަސް ފަނޑިޔާރުންނަށް އިޝާރަތް ކުރައްވައި އަބްދުއްރަހީމް ވިދާޅުވިއެވެ.
އުއްތަމަ ފަނޑިޔާރު އަބްދުﷲ ސައީދަށް އިޝާރާތް ކުރައްވައި އަބްދުއްރަހީމް ވިދާޅުވީ އަބްދުﷲ ސައީދުގެ ބާރު މުޅިގައުމުގެ ތެރެއަށް ހިންގައި، "މުޅި ގައުމު ހަލާކުގެ ތެރެއަށް ވައްޓާލަންދެން ކުރަންޖެހޭ ކަންތައް ނުކޮށް ނުހުންނާނެ" ކަމަށެވެ.
"ވަރަށް ކެރިގެން މިވާހަކަ މިދައްކަނީ. އަޅުގަނޑުމެންގެ މައްޗަށް ކޮންމެ އަމުރެއް ނެރުނަސް ހެޔޮކަމަށް. ތިމާ ތަންތަނުން ފްލެޓް ގަނެފައި، ތިމާ ތަންތަނަށް ދަތުރުކޮށްފައި، ތިމާގެ ޖީބު މުއްސަނދިކޮށްފައި ނަގާފައި ހުރި ފްލެޓްތަކާއި ހޯދާފައި ހުރި ފައިސާތަކާއި ހިންގާފައި ހުރި ކަރަޕްޝަނުގެ އަމަލުތަކުގެ ތަހުގީގު ފެނިދާނެތީ ކަންބޮޑުވެގެން މިއުޅެނީ. އިސްތިއުފާ ދީފައި ވަޑައިގަންނަވަން ވީ ނޫންތޯ ހިމާޔަތްދީފައި ތިބި މީހުން ކައިރިއަށް،" އުއްތަމަ ފަނޑިޔާރަށް ނިސްބަތްކުރައްވައި އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ "ވަކި ބައެއްގެ ކަރަޕްޝަން ހުއްޓާލުމަށްޓަކައި"މުޅި ދިވެހި ދައުލަތް ހަލާކު ކޮށްލާފައިވާކަމަށާއި ގާނޫނު އަސާސީގެ ބާރު ކަނޑުވާލާފައިވާކަމަށެވެ. އަދި ގާނޫނު އަސާދީގެ ބާރު ކަނޑުވާލުމަށްވުރެ ބޮޑު ކަރަޕްޝަންގެ އަމަލެއް ނެތް ކަމަށް އޭނާ ވިދާޅުވިއެވެ.
"ބައެއްގެ ކަރަޕްޝަން އަމަލުތައް ހުއްޓުވުމަށްޓަކައި މުޅި ދިވެހި ދައުލަތް ފުނޑާލައިފިއޭ. ގާނޫނުއަސާސީގެ ބާރު ކަނޑުވާލައިފިއޭ. ގާނޫނު އަސާސީގެ ބާރު ކަނޑުވާލުމަށް ވުރެ ބޮޑު ކަރަޕްޝަންގެ އަމަލެއް ނެތް. ގާނޫނު އަސާސީއަކީ ތިންބާރު ވަކިކުރުމަށް ހަދާފައި އޮތް ގާނޫނު އަސާސީއެއް،" އަބްދުއްރަހީމް ވިދާޅުވިއެވެ.
މިވާހަކަ މިދައްކަނީ އެއްވެސް ހާލެއްގައި ޝަރުއީ ދާއިރާއަށް އިހުތިރާމު ނުކުރާތީ ނޫން ކަމަށާއި ކޮންމެ އިދާރާއަކުން ކަމުގައި ވިއަސް ގާނޫނު އަސާސީގެ ބާރު ކަނޑުވާލުމުން އެވާހަކަ ދައްކަން ޖެހޭ ކަމަށް އަބްދުއްރަހީމް ވިދާޅުވިއެވެ.
"އަޅުގަނޑުމެން ދުލެއް ނުކުރާނަން. އަޅުގަނޑުމެންނަށް ކުރެވުނު ހުރިހާ ކަމެއް ކުރާނަން. ދިވެހި ރައްޔިތުންނަށް ޔަގީންކަން މިއަރުވަނީ އަޅުގަނޑުމެންގެ ސަރުކާރެއް ފަހަތަކަށް ވެސް ނުޖެހޭނަން. ޕީޕީއެމްގެ ސަރުކާރެއް ބައްޔެއް ވެސް ނުކުރެވޭނެ. ރައީސް ޔާމީން އިސްތިއުފާއެއް ވެސް ނުދެއްވާނެ. ރައީސް ޔާމީން މިގައުމުގެ ހައްގުގައި އަޅުއްވަންޖެހޭ ހުރިހާ ފިޔަވަޅެއްވެސް އަޅުއްވާނެ،" އޭނާ ވިދާޅިވިއެވެ.
އަބްދުއްރަހީމްގެ އިތުރުން ނިހާން ވެސް ވަނީ ސުޕްރީމް ކޯޓަށް އިންޒާރު ދެއްވާފައެވެ. އެ ގޮތުން އުއްތަމަ ފަނޑިޔާރާއި ސުޕްރީމް ކޯޓުގެ ފަނޑިޔާރު އަލީ ހަމީދު އިންދަޖައްސާލާނެ ކަމަށް ވިދާޅުވިއެވެ.
