ސުޕްރީމް ކޯޓުގެ އަމުރާއެކު އަދީބާއި ފާރިސް މިނިވަންކޮށް މާލެ ގެންނަން ލޯންޗަށް ވެސް އެރުވި
ލޯންޗަށް އެރުވުމަށްފަހު ބޭލީ ކޮންމެވެސް މީހެއްގެ އަމުރަށް
ފާރިސް ހައްޔަރުކޮށްގެން ދޫނިދޫއަށް ގެންދަނީ
ސިޔާސީ ބައެއް ބޭފުޅުން މިނިވަން ކުރުމަށް ސުޕްރީމް ކޯޓުން މިދިޔަ ބުރާސްފަތި ދުވަހުގެ ރޭ ނެރުނު އަމުރާއެކު ދޫނިދޫގައި އޭރު ހައްޔަރުކޮށްފައި ތިއްބެވި ދިއްގަރު ދާއިރާގެ މެމްބަރު އަހްމަދު ފާރިސް މައުމޫނާއި ކުރީގެ ނާއިބު ރައީސް އަހްމަދު އަދީބު މިނިވަން ކުރުމަށްފަހު މާލެ ގެނައިމަށް ލޯންޗަށް ވެސް އެރުވިކަން އެނގިއްޖެ އެވެ.
ފާރިސް މައުމޫނުގެ ގާނޫނީ ވަކީލުންގެ ޓީމުން ހޮނިހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ފާރިސްގެ ގާނޫނީ ވަކީލުންގެ ތެރޭގައި ހިމެނިވަޑައިގަންނަވާ އިބްރާހިމް ޝަމީލް ވިދާޅުވީ މި މަހުގެ އެއް ވަނަ ދުވަހުގެ ރޭ ސުޕްރީމް ކޯޓުން ނެރުނު އަމުރާއެކު ފާރިސް މިނިވަން ކުރެއްވި ކަމަށެވެ. މިހާތަނަށް ސާފު ނުވެ އޮތް މި މައުލޫމާތު ޝަމީލް ހާމަ ކުރެއްވީ ފާރިސްއާ ބައްދަލުކުރެއްވުމަށްފަހު އެވެ.
ޝަލީމް ވިދާޅުވި ގޮތުގައި ފާރިސް އާއި އަދީބު މާލެ ގެންނެވުމަށް ލޯންޗަށް އެރުވުމަށްފަހު އަނބުރާ ދޫނިދޫއަށް ބާލާފައިވަނީ ކުއްލި ގޮތަކަށް އެހެން މީހަކު ދިން އިރުޝާދެއްގެ މަތިން ކަމަށެވެ.
މީގެ އިތުރުން ފާރިސް ލޯންޗުން ބާލައިގެން ގެންގޮސް ގޮޅިއަށް ނުލައިވެސް ގިނައިރުތަކެއް ވަންދެން ބެހެއްޓިކަން ވަނީ އެނގިފަ އެވެ. އެގޮތުން ފާރިސް ލޯންޗުން ބާލައިގެން ގެންގޮސް އެ ވަގުތުން ފެށިގެން ހުކުރު ދުވަހުގެ ރޭ 8:30 ވަންދެން ފާރިސް ބެހެއްޓެވީ ދޫނިދޫއަށް ޒިޔާރާތްކުރާ މީހުން ތިބުމަށް ހާއްސަކޮށްފައި ހުންނަ ބައިގައި ކަމަށް ވެސް ޝަމީލް ވަނީ ފާހަގަ ކުރައްވާފަ އެވެ.
ފާރިސް އަލުން ހައްޔަރުގައި ހުރި ކަމަށް ފުލުހުން ހުކުރު ދުވަހުގެ ރޭ ބުނުމުން އެކަމަށް ފާރިސް އިއުތިޒާރު ކުރައްވަމުން ގެންދަވަނިކޮށް ގެންގޮސް ގޮޅިއަށްލީ ކަމަށް ވެސް ޝަމީލް ވަނީ ހާމަ ކުރައްވާފަ އެވެ.
ބުރާސްފަތި ދުވަހުގެ ރޭ ސުޕްރީމް ކޯޓުން ނުވަ ބޭފުޅަކު މިނިވަން ކުރުމަށް ސުޕްރީމް ކޯޓުން އަމުރު ކުރިއިރު ފުލުހުންގެ ބެލުމުގެ ދަށުގައި ތިއްބެވީ ފާރިސް އާއި އަދީބެވެ. ނަމަވެސް އޭރު ޕޮލިސް ކޮމިޝަނަރުގެ މަގާމުގައި ހުންނެވީ އަހްމަދު އަރީފު އެ އަމުރު ތަންފީޒު ކުރައްވަން މަސައްކަތް ފެއްޓެވުމާކު ރައީސް ޔާމިން ވަނީ އޭނާ ވަޒީފާއިން ވަކި ކުރައްވާފަ އެވެ.
