ނާދިރާ ހައްޔަރުކޮށް ދަބަސް ވެސް ފުލުހުންގެ ބެލުމުގެ ދަށަށް
3 ފެބުރުއަރީ 2018 | ހޮނިހިރު 21:32އިތުރު ދެ މީހަކު ވެސް ހައްޔަރުކުރި
އައިމިނަތު ނާދިރާ
ސުޕްރީމް ކޯޓުގެ އަމުރު ތަންފީޒު ކުރުމަށް ގޮވާލައި ރައްޔިތުން ކުރިޔަށް ގެންދާ އެއްވުމުގެ ތެރެއިން ޕީޕީއެމްގެ ކުރީގެ ކައުންސިލް މެމްބަރު އައިމިނަތު ނާދިރާ ހައްޔަރުކޮށް އޭނާގެ ދަބަސް ވެސް ފުލުހުންގެ ބެލުމުގެ ދަށަށް ގެންގޮސްފިއެވެ.
މި އެއްވުމުގެ ތެރެއިން ނާދިރާގެ އިތުރުން އިތުރު ދެ މީހަކު ވެސް ވަނީ ހައްޔަރުކޮށްފައެވެ. ނާދިރާ ހައްޔަރުކޮށްފައިވަނީ ސަލްސާ ރޯޔަލް ކުރިމަތިންނެވެ. އެ ސަރަހައްދުގައި ހަރަކާތްތެރިވަމުން އަންނަ ރާއްޖެޓީވީގެ ނޫސްވެރިޔާ ބުނީ ފުލުހުން އައީ ސީދާ ނާދިރާއަށް އަމާޒުކޮށް އޭނާ ހައްޔަރުކުރަން ކަމަށާއި ހައްޔަރުކުރި ވަގުތު އޭނާގެ ދަބަސް މީހަކާއި ހަވާލުކުރުމުން އެ ދަބަސް ގެންދިޔުމަށް ވެސް ފުލުހުން މަސައްކަތްކޮށްފައިވާ ކަމަށެވެ.
މި އެއްވުމުގެ ތެރެއިން ރައްޔިތުންގެ މަޖިލީހުގެ ވިލިގިލި ދާއިރާގެ މެމްބަރު ސައުދު ހުސައިން އަދި މެދުހެންވޭރު ދާއިރާގެ މެމްބަރު އަލީ އާޒިމްގެ މޫނަށް އަމާޒުކޮށް ޕެޕާ ސްޕްރޭ ވެސް ވަރަށް ބޮޑަށް ޖަހާފައިވެއެވެ. ފުލުހުންގެ ހައްޔަރަށް ނާދިރާ ގެންދެވިފައިވާއިރު ގިނަ އަދަދެއްގެ ބަޔަކު އަންނަނީ މާލޭގެ މަގުތަކަށް ނުކުމެ ސުޕްރީމް ކޯޓުގެ އަމުރު ތަންފީޒު ކުރުމަށް ސަރުކާރަށް ގޮވާލަމުންނެވެ.
