އެމެރިކާ އިން އެގައުމުގެ ރައްޔިތުންނާ ދެކޮޅަށް އިންސާނީ ހައްގުތަކާ ފުށުއަރާ އެތައް އަމަލުތަކެއް ހިންގަމުންދޭ: އުތުރު ކޮރެއާ
31 ޖެނުއަރީ 2018 | ބުދަ 17:17އުތުރު ކޮރެއާ އިން މިހެން ބުނެފައި ވަނީ އެގައުމުން، އެމެރިކާއާ ބެހޭ ގޮތުން ނެރުނު ހާއްސަ ރިޕޯޓެއްގައި
އުތުރު ކޮރެއާ އިން ދަނީ އަސްކަރީ ބާރުދައްކާލުމުގެ ގިނަ ހަރަކާތްތަކެއް ހިންގަމުން
އެމެރިކާއަކީ އެގައުމުގެ ރައްޔިތުންނާ ދެކޮޅަށް އިންސާނީ ހައްގުތަކާ ފުށުއަރާ އެތައް އަމަލުތަކެއް ހިންގަމުންދާ ގައުމެއް ކަމަށް އުތުރު ކޮރެއާ އިން ބުނެފިއެވެ.
އުތުރު ކޮރެއާގެ ޑީޕީއާރްކޭ އިންސްޓިޓިއުޓް އޮފް އިންޓަނޭޝަނަލް ސްޑަޒީޒް އިން ނެރެފައިވާ ހާއްސަ ރިޕޯޓެއްގައި ބުނީ އެމެރިކާއަކީ ނަސްލީ ތަފާތުކުރުންތައް ގެންގުޅޭ ގައުމެއް ކަމަށާއި އަދި އެގައުމަކީ މިނިވަން ނޫސްވެރިކަމަށް ވެސް އޮތް ފުރުސަތު ގެއްލެމުންދާ ގައުމެއް ކަމަށެވެ. އަދި ޖިންސީ ތަފާތުކުރުންތައް ވެސް އޮންނަ ގައުމެއް ކަމަށެވެ.
ރިޕޯޓުގައި އިތުރަށް ބުނީ އެމެރިކާ ސަރުކާރު އަމަލުތަކުގެ ސަބަބުން އެގައުމުގެ ވަޒީފާ ނެތް މީހުންގެ އަދަދު އިތުރުވަމުންދާ ކަމަށާއި އަދި ގައުމުގައި ބޭހަށް ކުރަން ޖެހޭ ޚަރަދު އަންނަނީ އިތުރުވަމުން ކަމަށެވެ.
އުތުރު ކޮރެއާ އިން އެމެރިކާ އަށް ބޮޑެތި ފާޑުކިޔުންތައް އަމާޒުކޮށް ނެރުނު ރިޕޯޓު ނެރެފައި ވަނީ އެމެރިކާގެ ރައީސްއަކަށް ހުންނަވާ ބޭފުޅަކު އެގައުމުގެ ގާނޫނު ހަދާ މަޖީލީހަށް އަހަރަކު އެއް ފަހަރު ދެއްވާ ހާއްސަ ތަގުރީރު ނުވަތަ "ސްޓޭޓް އޮފް ދަ ޔޫނިއަން"، އަންގާރަ ދުވަހު ރައީސް ޑޮނަލްޑް ޓްރަމްޕް ދެއްވުމުގެ ކުޑަ ވަގުތުކޮޅެއް ކުރިންނެވެ.
އެމެރިކާގެ ރައީސް އެގައުމުގެ ގާނޫނު ހަދާ މަޖީލީހަށް ދެއްވި ތަގުރީރުގައި ވަނީ އުތުރު ކޮރެއާ އަށް އަނެއްކާ ވެސް ފާޑުވިދާޅުވެފައެވެ. އެގޮތުން އެމަނިކުފާނު ވިދާޅުވީ އުތުރު ކޮރެއާގެ ޚުދުމުޚުތާރު ސަރުކާރު ފިޔަވާ ގައުމެއްގެ ސަރުކާރުން އެގައުމެއްގެ ރައްޔިތުން "އޮބަހައްޓައިގެން އަދި ފިއްތައިގެން ގެންގުޅޭ ސަރުކާރެއް" ނެތް ކަމަށެވެ. އަދި އުތުރު ކޮރެއާ އިން ތަރައްގީ ކުރަން މަސައްކަތް ކުރާ ނިއުކްލިއާ ހަތިޔާރުގެ ބިރުވެރިކަން އެމެރިކާ އަށް ވަރަށް އަވަހަށް ފޯރަފާނެ ކަމަށް ވެސް ރައީސް ޓްރަމްޕް ވިދާޅުވިއެވެ.
ބައިނަލްއަގްވާމީ ދުނިޔެއިން ތަކުރާރުކޮށް އުތުރު ކޮރެއާ އަށް އަންގަމުން ދަނީ ނިއުކްލިއާ ހަތިޔާރު ފައްކާކުރުމުގެ ޕްރޮގްރާމް ހުއްޓާލުމަށާއި އަދި މިސައިލް ޓެސްޓްތައް ކުރުން ހުއްޓާލުމަށެވެ. އެހެން ނަމަވެސް އުތުރު ކޮރެއާ އިން ބައިނަލްއަގްވާމީ ދުނިޔޭގެ ގޮވުންތަކަށް ދަނީ ބީރުކަންފަތެއް ދެމުންނެވެ. މިހާތަނަށް އދ. އާއި އެމެރިކާ އިން ވެސް ވަނީ އުތުރު ކޮރެއާއާ ދެކޮޅަށް ދަތިކުރުމުގެ ފިޔަވަޅު އަޅާފައެވެ. އެހެން ނަމަވެސް އުތުރު ކޮރެއާގެ އަމަލުތަކަކަށް ބަދަލެއް ނާދެއެވެ.
އުތުރު ކޮރެއާ އިން ވަނީ 2017 ވަނަ އަހަރު އެކަނި ވެސް 20 ބެލިސްޓިކް މިސައިލް ޓެސްޓްކޮށްފައެވެ. އޭގެ ތެރޭގައި ތިން އިންޓަކޮންޓިނެންޓަލް ބެލިސްޓިކް މިސައިލް ޓެސްޓް ހިމެނެއެވެ.
