ބާސާގެ އާ ކޮންޓްރެކްޓްގައި ޕީކޭ ސޮއިކޮށްފި

ސްޕެއިންގެ ބާސެލޯނާއަށް ކުޅެމުން އަންނަ އިތުބާރު ޑިފެންޑަރު ޖެރާޑް ޕީކޭ އެ ޓީމާ އެކު އާ ކޮންޓްރެކްޓެއްގައި ސޮއިކޮށްފިއެވެ.

ޕީކޭ ސޮއިކުރި އާ ކޮންޓްރެކްޓާ އެކު 2022 ވަނަ އަހަރުގެ ނިޔަލަށް އޭނާ ބާސާގައި ދެމިހުންނާނެއެވެ. ހަމައެހެންމެ އެ ކްލަބުން ވަނީ އޭނާގެ ރިލީސް ފީ ވެސް 500 މިލިއަން ޔޫރޯއަށް ބޮޑުކޮށްފައެވެ. ބާސާގެ ރަސްމީ ވެބްސައިޓް މެދުވެރިކޮށް އެ ޓީމުން ވަނީ އޭނާ ކޮންޓްރެކްޓް އާކުރިކަން ކަށަވަރު ކޮށްދީފައެވެ.

ކޮންޓްރެކްޓްގައި ސޮއިކުރުމަށް ފަހު ވާހަކަ ދައްކަމުން ޕީކޭ ބުނީ ބާސާއަކީ އޭނާގެ އަމިއްލަ ޓީމެއްގެ ގޮތުގައި ދެކޭ ޓީމެއް ކަމަށާއި އުއްމީދުކުރަނީ ބާސާގައި ކެރިއަރު ނިންމާލުމަށް ކަމަށެވެ. އޭނާ ބުނީ އެހެން ކްލަބެއްގެ ޖާޒީ އިން އޭނާ ނުފެންނާނެ ކަމުގެ ފުރިހަމަ ޔަގީންކަން އެބައޮތް ކަމަށާއި ކޮންޓްރެކްޓްގައި ސޮއިނުކުރި ނަމަ އޭނާ ފުޓްބޯޅައިން ރިޓަޔާ ކުރާނެ ކަމަށެވެ. ޕީކޭ ބުނީ އޭނާ ފުޓްބޯޅަ ކުޅެނީ ބާސާއަށްޓަކައި ކަމަށާއި އޭނާ އެ ކްލަބްގައި ދެމިހުރުމަށް އެއްބާރުލުން ދެމުންދާ ހުރިހާ ފަރާތްތަކަށް ޝުކުރު އަދާކުރަން ބޭނުންވާ ކަމަށެވެ.

ބާސާގެ ރައީސް ޖޯސެފް މާރިއާ ބާޓޮމޯ ވިދާޅުވީ ޕީކޭއަކީ ފެށުނީއްސުރެ ބާސާގެ ސަޕޯޓަރެއް ކަމަށާއި އަމާޒަކީ އޭނާއާ އެކު ގިނަ ތަށިތަކެއް ކާމިޔާބުކުރުން ކަމަށެވެ. ބާޓޮމޯ ވިދާޅުވީ ޕީކޭއަކީ ވަރަށް ތަޖުރިބާކާރު ކުޅުންތެރިޔެއް ކަމަށާއި އާ ކޮންޓްރެކްޓެއްގައި އޭނާ ލައްވައި ސޮއިކުރުވުން ވެގެންދިޔައީ ވަރަށް ފަސޭހަ ކަމެއް ކަމަށެވެ.

މި ސީޒަނުގައި ޕީކޭ އަންނަނީ އާނެސްޓޯ ވަލްވާޑޭގެ އިރުޝާދުގެ ދަށުން މޮޅު ކުޅުމެއް ދައްކަމުންނެވެ. އެގޮތުން އޭނާ ވަނީ މިހާތަނަށް މި ސީޒަނުގައި ބާސާއަށް 26 މެޗު ކުޅެދީފައެވެ. އެ ޓީމުގެ ޑިފެންސްގެ މައި ތަނބުގެ ގޮތުގައި ގިނަ ބަޔަކު ދެކޭ ޕީކޭއަކީ ދަނޑުމަތީގައި ކެޕްޓަނެއްގެ ރޯލު ވެސް އަދާ ކުރާ ކުޅުންތެރިޔެކެވެ. އޭނާ ބާސާއާ އެކު ކުރިން ހަދާފައި އޮތް އެއްބަސްވުން މި ހޫނު މޫސުމުގެ ނިޔަލަށް ހަމަވާނެއެވެ. އާ ކޮންޓްރެކްޓްގައި ހިމެނިފައިވާ ރިލީސް ފީއާ އެކު އޭނާ ވެގެން ގޮސްފައި ވަނީ ލިއޮނެލް މެސީގެ ފަހަތުން ބާސާގެ އެންމެ އަގުމަތި ކުޅުންތެރިޔާއަށެވެ.

އުމުރުން 14 އަހަރުން ފެށިގެން ބާސާގެ ޔޫތު ސިސްޓަމުން ތަމްރީނުވި ޕީކޭ ވަނީ މީގެ ކުރިން މެންޗެސްޓާ ޔުނައިޓެޑަށް ވެސް ކުޅެފައެވެ. އެގޮތުން 2008 ވަނަ އަހަރު އަލުން އެނބުރި ބާސާއާ ގުޅުމަށް ފަހު އޭނާ ވަނީ މިހާތަނަށް 421 މެޗު ކުޅެދީ 37 ލަނޑު ޖަހައިދީފައެވެ. ހަމައެހެންމެ އޭނާ ވަނީ އެ ޓީމާއެކު ކްލަބް ފެންވަރުގައި ކާމިޔާބުކުރެވެން ހުރި ހުރިހާ މުބާރާތެއް ކާމިޔާބު ކޮށްފައެވެ. އޭގެ ތެރޭގައި ތިން ޔުއެފާ ޗެމްޕިއަންސް ލީގާއި ހަ ސްޕެނިޝް ލަލީގާ ކާމިޔާބުކޮށްފައި ވެއެވެ. އޭނާއަކީ ފީފާ އިން ކޮންމެ އަހަރަކު ހޮވާ އެންމެ މޮޅު ކުޅުންތެރިންގެ ޓީމުގައި 2010، 2011، 2012، 2015 އަދި 2016 ވަނަ އަހަރު ހިމެނުނު ކުޅުންތެރިޔެކެވެ.