ޒެފްރޯލް އާއި ކްލަބް ޕީކޭ ގެ ކުރިމަތިލުމަށް ހަމަހަމަ ނިމުމެށް

ދެވަނަ ޑިވިޝަން ފުޓުބޯޅަ މުބާރާތުގައި ކްލަބް ޒެފްރޯލް އާއި ކްލަބް ޕީކޭ ބައްދަލުކުރި މެޗް ފޯރިގަދަ ކުޅުމަކައްފަހު އެއްވަރުވެގެން ނިމިއްޖެއެވެ.

ހޯމަދުވަހު ހަވީރު ހެންވޭރު ޓާފް ދަނޑުގައި މި ދެޓީމް ބައްދަލުކުރި މެޗް ނިމުނީ 2-2 ގެ ނަތީޖާއަކުންނެވެ. މެޗުގައި ދެޓީމުގެ ފަރާތުންވެސް ފެނިގެންދިޔައީ ވަރަށް ވާދަވެރި ކުޅުމެކެވެ.

މެޗުގައި ފުރަތަ ލަނޑުޖަހާ ލީޑުނެގީ ކްލަބް ޒެފްރޯލް އިންނެވެ. މެޗުގެ 11 ވަނަ މިނެޓުގައި މި ލަނޑު އެޓީމަށް ކާމިޔާބުކޮއްދިނީ މުހަންމަދު ރިފާއު އެވެ. ނަމަވެސް ޒެފްރޯލްއަށް މާ ގިނަ ވަގުތު ލީޑުގައި އޮވެވޭގޮތެށް ނުވިއެވެ. އެގޮތުން ޕީކޭއިން ވަނީ ކުޅުން ވަރުދަގަކޮށް 14 ވަނަ މިނެޓުގައި ނަތީޖާ ހަމަހަމަ ކޮއްފައެވެ. މި ލަނޑު އެޓީމަށް ކާމިޔާބުކޮއްދިނީ އިބްރާހިމް ރަޝީދް އެވެ. މި ލަނޑައް ފަހުގައި ދެޓީމަށްވެސް ރަނގަޅު ފުރުސަތުތަކެށް ލިބި ވަނީ ބޭކާރު ވެފައެވެ. ފުރަތަމަ ހާފު ނިމުނީ 1-1 އިން ނަތީޖާ އެއްވަރު ވެގެންނެވެ.

ދެވަނަ ހާފު ފެށިގެން ޕީކޭގެ ފަރާތުން ވަނީ ރަނގަޅު ކުޅުމެށް ފެނިގެން ގޮސްފައެވެ. އެޓީމުން ވަނީ ފުރަތަމަ ހާފާ ހިލާފަށް ގިނަ ވަގުތު ބޯޅަ ހިފަހައްޓައިގެން ކުޅެފައެވެ. ނަތީޖާއެއްގެ ގޮތުން 52 ވަނަ މިނެޓުގައި ޕީކޭއިން ލަނޑެށް ކާމިޔާބުކޮށް ލީޑު އަތުލިއެވެ. މި ލަނޑު އެޓީމަށް ކާމިޔާބުކޮއްދިނީ އެޓީމުގެ ބިދޭސީ ކުޅުންތެރިޔާ އޮންވުމެއްލޫ އެވެ. ޕީކޭއިން ލީޑުގައި ކުޅެމުން ދަނިކޮށް ޒެފްރޯލްއިން ވަނީ މެޗު ނިމެންވެފައި ވަނިކޮށް ނަތީޖާ އެއްވަރުކޮއްފަ އެވެ. މި ލަނޑު އެޓީމަށް ކާމިޔާބުކޮއްދިނީ އިބްރާހިމް ޝިޔާމް އެވެ.

މިފަހަރުގެ މުބާރާތުގައި ޖުމްލަ 9 ޓީމަކުން ބައިވެރި ވެފައި ވާއިރު މިއީ މުބާރާތުގައި ކުޅެވުނު 3 ވަނަ މެޗެވެ. ފުރަތަމަ މެޗުގައި މަހިބަދޫ ސްޕޯޓަސް ކުލަބް ވަނީ މެކާނޯގެ މައްޗަށް 2-0 އިން ކުރިހޯދާފައެވެ. ދެވަނަ މެޗުގައި ޖޭޖޭ ސްޕޯޓްސް ކުލަބުން ވަނީ 3-1 ގެ ނަތީޖާއަކުން ދަ ގްރާންޑޭ އަމީގޯސް ނިއު ޖެނެރޭޝަން ސްޕޯޓަސް ކުލަބު ބަލިކޮއްފަ އެވެ.