ރޫމޭނިއާގެ ޤާނޫން ހަދާ މަޖިލީހުން އެޤައުމުގައި 13 މަސްތެރޭ އެކުލަވާލާ 3 ވަނަ ސަރުކާރަށް ރުހުންދީ، އެސަރުކާރުގެ ބޮޑުވަޒީރުކަމަށް ރޫމޭނިއާގެ ފުރަތަމަ އަންހެން ބޮޑުވަޒީރު ވިއޮރީޒާ ޑަންސިލާއަށް ރުހުންދީފިއެވެ.

ޑަންސިލާ ބޮޑުވަޒީރުގެ މަޤާމަށް އައްޔަންކޮށް، އަލުން ސަރުކާރު އެކުލަވާލަން ޖެހުނީ ވެރިކަންކުރާ ސޯޝަލް ޑިމޮކްރެޓިކް ޕާޓީގެ ލީޑަރު ލިވިއޫ ޑްރެގްނިއާ އާއި ދެމެދު އުފެދުނު ޚިޔާލުތަފާތުންތަކެއްގައި ބޮޑުވަޒީރުކަމުގެ މަޤާމުން މިހާއީ ޓިއުޑޯސް އިސްތިއުފާ ދެއްވުމާއި ގުޅިގެންނެވެ. ޓިއުޑޯސްގެ ކުރިން ބޮޑުވަޒީރުކަމުގައި ހުންނެވި ސޯރިން ގްރިންޑެނޯވެސް މަޤާމުން އިސްތިއުފާ ދެއްވީ ޑްރެގްނިއާ އާއި ދެމެދު އުފެދުނު ޚިޔާލުތަފާތުންތަކުގެ ސަބަބުންނެވެ.

މިމަހުގެ ކުރީކޮޅު މަޤާމަށް އައްޔަންކުރެވުނު ޑަންސިލާއަށް ރުހުން އޮތްކަމަށް ޤާނޫން ހަދާ މަޖިލީހުގެ 282 މެމްބަރުންގެ ވޯޓު ލިބިވަޑައިގަތެވެ. އެކަމަނާއަށް އިދިކޮޅު ބައެއް މެމްބަރުންގެ ވޯޓުވެސް ލިބިވަޑައިގަތެވެ.

ރޫމޭނިއާއާއި ވިލާތުގެ އިއްތިޙާދުގެ މައި އޮފީހާއި ދެމެދު އޮންނަ ގުޅުން ގޯސްވެފައިވާއިރު، ވިލާތުގެ އިއްތިހާދުން ދޭ ފައިސާއާއި އެހެނިހެން އެހީތައް ބެލެހެއްޓުމަށް ވަކި ވުޒާރާއެއް އެކަމަނާ ވަނީ އެކުލައްވާލައްވާފައެވެ. އެމަޤާމަށް އައްޔަންކޮށްފައިވަނީ ސޯޝަލް ޑިމޮކްރެޓިކް ޕާޓީއަށް ނިސްބަތްވާ ރޮވާނާ ޕްލަމްބެވެ. ޕްލަމްބް އަކީ ރިޝްވަތުގެ މައްސަލައެއްގައި ރޫމޭނިއާގެ ކަމާއި ބެހޭ ފަރާތްތަކުން ތަހުޤީޤުކުރަން ބޭނުންވާ ފަރާތެކެވެ. އެހެންނަމަވެސް އޭނާއާއި ދެކޮޅަށް ކުރެވޭ ތުހުމަތުތައް ތަހުޤީޤްކުރުމަށް ޤާނޫން ހަދާ މަޖިލީހުން ވަނީ ހުއްދަ ދޭން ދެކޮޅު ހަދާފައެވެ. ޕްލަމްބްއަކީ ކުރީގެ ބޮޑުވަޒީރު ޓިއުޑޯސްގެ ސަރުކާރުގައިވެސް ވަޒީރެކެވެ. އެހެން ނަމަވެސް ރިޝްވަތުގެ ތުހުމަތުތަކާއިއެކު އޭނާ އާއި އިތުރު 2 ވަޒީރަކު އޭރު ޓިއުޑޯސްވަނީ މަޤާމުން ދުރުކޮށްފައެވެ.

ރިޝްވަތާއި ކޮރަޕްޝަންގެ މައްސަލަތަކެއްގެ ސަބަބުން އީޔޫ އާއި ރޫމޭނިއާގެ ގުޅުން ގޯސްވެފައިވަނިކޮށް އީޔޫއިން ދޭ އެހީތައް ބެލެހެއްޓުމަށް ހަވާލުކުރި ވުޒާރާއަށް ރިޝްވަތުގެ ތުހުމަތުކުރެވޭ ބޭފުޅަކު އައްޔަންކުރުމަކީ ރިޝްވަތާއި ދެކޮޅަށް ރޫމޭނިއާ ސީރިއަސް ނޫންކަން ދޭހަވާކަމެއްކަމަށް ފާޑުކިޔާ ފަރާތްތަކުން ބުނެއެވެ.

ޑަންސިލާ އުފެއްދެވި ސަރުކާރުގައި ކުރީގެ ސަރުކާރުގައި ހިމެނިވަޑައިގަތް ބައެއް ވަޒީރުންވެސް ހިމެނެއެވެ.

ރޫމޭނިއާގެ އައު ސަރުކާރަށް ޤާނޫން ހަދާ މަޖިލީހުން ރުހުން ދިންނަމަވެސް އެޤައުމުގެ ރައީސް މިސަރުކާރާއިމެދު މާ ހިތްހަމަޖެހިވަޑައިގަންނަވާ ކަމަކަށް ނުވެއެވެ. އެހެންނަމަވެސް ރޫމޭނިއާގައިވެސް އޮންނަނީ ބަރުލަމާނީ ނިޒާމެއްކަމުން ޤާނޫން ހަދާ މަޖިލީހުގެ މެޖޯރިޓީއިން ހުށަހަޅާ ސަރުކާރަކަށް ރުހުން ދޭން ރައީސަށް މަޖުބޫރުވެއެވެ.

13 މަސް ދުވަހުގެ ތެރޭގައި 3 ވަނަ ސަރުކާރެއް އެކުލަވާލިނަމަވެސް، ސޯޝަލް ޑިމޮކްރެޓުންގެ ސާފު އަޣުލަބިއްޔަތު ޤާނޫން ހަދާ މަޖިލީހުގައި އޮތުމުން އަވަސް އިންތިޚާބެއް އެޤައުމުގައި ނުބައްވާނެއެވެ.