މި އަހަރު އެކި ފެއަރތަކުގައި ބައިވެރިވާ، ފަތުރުވެރިކަމުގެ ދާއިރާގައި ހަރަކާތްތެރިވާ ފަރާތްތަކާއި އެމްއެމްޕީއާރްސީ އިން ހޯމަ ދުވަހު ބައްދަލު ކޮށްފިއެވެ.

މި ބައްދަލުވުމުގެ މަޤްސަދަކީ މި އަހަރު ބޭއްވުމަށް ހަމަޖެހިފައިވާ ފަތުރުވެރިކަމުގެ ދާއިރާ އަށް ހާއްސަ އެކި ފެއަރތަކުގެ މައުލޫމާތު އެ ފަރާތްތަކާއި ފޯރުކޮށްދިނުމާއި އެފަރާތްތަކުގެ ވިޔަފާރި ފުޅާކުރުމަށް ކުރެވިދާނެ ކަންތައްތަކަކީ ކޮބައިކަން އަންގައިދިނުން ކަމަށް އެ ކުންފުނިން ބުނެއެވެ.

ޖަރުމަންވިލާތް، އިންޑިއާ، ސުވިޒަލޭންޑް، ތުރުކީ އަދި ސްޕެއިންގެ ވިޔަފާރީގެ މާރުކޭޓުތަކަކީ ރާއްޖެއަށް މުހިންމު މާރކޭޓުތަކެއް ކަމަށް އެމްއެމްޕީއާރްސީ އިން ވަނީ ބުނެފައެވެ.

އެގޮތުން 2017 ވަނަ އަހަރުގެ ނޮވެމްބަރު މަހުގެ ފަހުކޮޅު ރާއްޖޭގެ ފަތުވެރިކަމުގެ ދާއިރާ އަށް ޖަރުމަންވިލާތުން 4.7 ފަސަންޓުގެ ކުރިއެރުމެއް ލިބިފައިވާއިރު އިންޑިއާއިން ލިބުނީ 22.9 ފަސަންޓުގެ ކުރިއެރުމެކެވެ.

މީގެ އިތުރުން ސުވިޒަލޭންޑުން ރާއްޖޭގެ ފަތުރުވެރިކަމުގެ ދާއިރާ އަށް 2.4 ފަސަންޓުގެ ކުރިއެރުމެއް ލިބިފައިވާއިރު ތުރުކީ އިން ލިބުނީ 11.0 ޕަސަންޓުގެ ކުރިއެރުމެކެވެ. އަދި ސްޕެއިންގެ ފަރާތުން ލިބުނީ 9.2 ޕަސަންޓުގެ ކުރިއެރުމެކެވެ.

ފަތުރުވެރިކަމުގެ ދާއިރާ އަށް ހާއްސަ ގިނަ ފެއަރތަކެއް މި އަހަރު ރާއްޖޭން ބޭރުގައި ބޭއްވިގެންދާއިރު އެ ފެއަރތަކުގައި ބައިވެރިވުމުން އެ ފަރާތްތަކާއި ގުޅުން ބަދަހިވެ ރާއްޖޭގެ ޓުއަރިޒަމް ދާއިރާ އަށް ގިނަގުނަ ފައިދާތަކެއް ކުރާނެ ކަމަށް އެމްއެމްޕީއާރްސީ އިން ދެކެއެވެ.