އޮސްޓްރޭލިއަން އޯޕަންގެ ފިރިހެން ސިންގަލްސް އިވެންޓުގެ ޗެމްޕިއަންކަން ހޯދައި ސްވިޓްޒަލޭންޑުގެ ރޯޖާ ފެޑެރާ ތާރީހުން ޖާގަ ހޯދައިފިއެވެ.

މި މުބާރާތުގެ ފައިނަލް މެޗުގައި އޭނާ ވަނީ ކްރޮއޭޝިއާގެ މަރިން ސިލިޗް ތިން ސެޓު ދެ ސެޓުން ބަލިކޮށްފައެވެ. މި މެޗުގެ ފުރަތަމަ ސެޓު 6-2 އިން ފެޑެރާ ގެންދިޔައިރު ވާދަވެރި ކުޅުމަކަށް ފަހު ސިލިޗް ވަނީ ދެވަނަ ސެޓު 7-6 އިން ގެންގޮސްފައެވެ. ތިންވަނަ ސެޓު 6-3 ފެޑެރާ ގެންދިޔައިރު ސިލިޗް ވަނީ ހަތަރު ވަނަ ސެޓު 6-3 އިން ގެންގޮސް ތަށި ކާމިޔާބުކުރުމުގެ އުއްމީދު ދަމަހައްޓާފައެވެ. އެހެން ނަމަވެސް މެޗުގެ ނަތީޖާ ނެރުމަށް ކުޅުނު ފަސްވަނަ ސެޓު 6-1 އިން ގެންގޮސް ފެޑެރާ ވަނީ މި މުބާރާތުގެ ތަށި އޭނާގެ ކެރިއަރުގައި ހަވަނަ ފަހަރަށް އުފުލާލާފައެވެ.

އުމުރުން 36 އަހަރުގެ ފެޑެރާ ވެގެން ގޮސްފައިވަނީ މާގަރެޓް ކޯޓް އާއި ސެރޭނާ ވިލިއަމްސް އަދި ސްޓެފީ ގްރާފްގެ ފަހަތުން 20 ގްރޭންޑް ސްލޭމް ކާމިޔާބުކުރި ހަތަރުވަނަ ކުޅުންތެރިޔާއަށެވެ. ހަމައެހެންމެ އޭނާ ވަނީ މި އަހަރުގެ ޗެމްޕިއަންކަމާއެކު މި ތަށި ކާމިޔާބުކަމާއެކު ދިފާއުކޮށްފައެވެ. އޭނާ ވެގެން ގޮސްފައިވަނީ އޯޕެން އެރާގައި ގްރޭންޑް ސްލޭމް މުބާރާތެއް ކާމިޔާބުކުރި ދެވަނައަށް އެންމެ އުމުރުން ދުވަސްވީ ކުޅުންތެރިޔާއަށެވެ. ހަމައެހެންމެ އޭނާ ވަނީ ރޯއި އެމާސަން އަދި ނޮވަކް ޖޮކޮވިޗް މި މުބާރާތް ހަފަހަރު ކާމިޔާބުކޮށްގެން ހަދާފައިވާ ރެކޯޑާއި އަރާ ހަމަކޮށްފައެވެ.

މި މެޗުން މޮޅުވުމަށްފަހު ވާހަކަ ދައްކަމުން ފެޑެރާ ބުނީ ވޭތުވެދިޔަ 12 މަސް ދުވަހުގެ ތެރޭގައި ތިން ގްރޭންޑް ސްލޭމް ކާމިޔާބުކުރެވުމަކީ ގަބޫލުކުރަން ދަތި ކަމެއް ކަމަށެވެ. އޭނާ ބުނީ އުމުރުން ދުވަސްވުމަކީ މައްސަލައެއް ނޫން ކަމަށާއި އަބަދުވެސް ފަރިތަކުރުންތަކަށް އިސްކަންދޭ ކަމަށެވެ. އޭނާ ބުނީ އޭނާގެ ކާމިޔާބުގެ ހުރިހާ ވެސް ސިއްރަކީ އޭނާގެ ޓީމު ކަމަށާއި އެ ޓީމާއި ނުލައި އެއްވެސް މުބާރާތެއް ކާމިޔާބު ނުކުރެވޭނެ ކަމަށެވެ.

މި މެޗުން ބަލިވި ސިލިޗް ބުނީ ފެޑެރާއަކީ ތާރީހުގައި ވެސް އުފެދުނު އެންމެ މޮޅު ކުޅުންތެރިންގެ ތެރޭގައި ހިމެނޭ ކުޅުންތެރިޔެއް ކަމަށާއި ނަފްސާނީ ގޮތުން މި މެޗު ވެގެންދިޔައީ އޭނާގެ ކެރިއަރުގައި ވެސް ކުޅުނު އެންމެ އުނދަގޫ މެޗަށް ކަމަށެވެ. މެޗުގެ ކުރީކޮޅު ދަތިތަކަކާއި ކުރިމަތިވި ކަމަށާއި އެހެން ނަމަވެސް ވަކި ހިސާބަކުން އެއްވެސް އުނދަގުލެއް ކުރިމަތިނުވާ ކަމަށެވެ. އޭނާ ބުނީ ފަސްވަނަ ސެޓުގައި ފެޑެރާގެ ފަރާތުން ފެނިގެންދިޔައީ އާދަޔާ ހިލާފު ކުޅުމެއް ކަމަށެވެ.

މި މުބާރާތް ކާމިޔާބުކުރުމާއެކު ފެޑެރާ ވެގެން ގޮސްފައިވަނީ އޯޕެން އެރާގައި 20 ގްރޭންޑް ސްލޭމް ކާމިޔާބުކުރި އެންމެ ފުރަތަމަ ފިރިހެން ކުޅުންތެރިޔާއަށެވެ.