އަންނާން ހައްޔަރުކޮށްފައިވަނީ އަސްކަރީ ޖަލެއްގައި

މިސްރުގެ ރިޔާސީ އިންތިޚާބުގައި ވާދަކުރައްވާނެކަން އިއުލާން ކުރެއްވުމާއިއެކު ހައްޔަރުކުރި މިސްރުގެ އަސްކަރިއްޔާގެ ކުރީގެ ވެރިޔާ ޖެނެރަލް ސާމީ އަންނާން ބަންދު ކޮށްފައިވަނީ އަސްކަރީ ޖަލެއްގައިކަމަށް އޭނާގެ ވަކީލުން ބުނެފިއެވެ.

އަނާންގެ ވަކީލު ނާސިރު އަމީން ބުނީ އަނާންގެ އަރިހަށް ހޮނިހިރު ދުވަހު ޒިޔާރަތް ކުރެވުނު ކަމަށެވެ.

އަނާންގެ ރިޔާސީ ކެމްޕޭންގެ އެގްޒެކެޓިވް ޑިރެކްޓަރ އަހްމަދު އަބްދުރައްބު ބުނީ އަނާން ހައްޔަރު ކޮށްފައިވަނީ ސިޔާސީ ބޭނުމެއްގައި ކަމަށާއި، ރައީސް އަބްދުލްފައްތާޙް ސީސީ މަސައްކަތް ކުރައްވަނީ ރިޔާސީ އިންތިޚާބު ވާދަވެރިިޔަކާއި ނުލައި ކާމިޔާބު ކުރެއްވުމަށް ކަމަށެވެ.

އަސްކަރިއްޔާގެ ކުރީގެ ވެރިޔާ އަނާން ހައްޔަރު ކޮށްފައިވަނީ ރިޔުާސީ އިންތިޚާބުގައި ވާދަކުރައްވާނެކަން އިއުލާން ކުރެއްވިތާ 3 ދުވަސްފަހުން، ޖެނުއަރީ މަހުގެ 23 ވަނަ ދުވަހުއެވެ.

މިސްރުގެ އަސްކަރިއްޔާއިން އަނާން ހައްޔަރުކޮށްފައިވަނީ އޭނާ އިންތިޚާބުގައި ވާދަކުރައްވަން އަސްކަރިއްޔާގެ ހުއްދަ ހޯދާފައިނުވާ ކަމަށާއި، އިންތިޚާބުގައި ވާދަކުރެއްވުމަށް ހުށަހެޅުއްވި ކަރުދާސްތައް އޮޅުވާލާފައިވާ ކަމަށް ބުނެއެެވެ. އަދި މިސްރުގެ އަސްކަރިއްޔާ އާއި މިސްރުގެ ރައްޔިތުން ބައިބައިކޮށްލަން އުޅުއްވާކަމުގެ ތުހުމަތުވެސް އޭނާގެ މައްޗަށް އަސްކަރިއްޔާއިން ކުރެއެވެ.

މިސްރުގެ ރިޔާސީ އިންތިޚާބު އޮންނާނީ މާޗް މަހުގެ 26 އިން 28 އަށެވެ. އަދި އިންތިޚާބުގައި ވާދަކުރުމަށް ހުށަހެޅުމުގެ ފުރުސަތު މިއަދު ބަންދުވާނެއެވެ. އިންތިޚާބުގައި ވާދަކުރުމަށް މިހާތަނަށް ނަން ހުށަހަޅުއްވާފައިވަނީ ހަމައެކަނި ރައީސް ސީސީއެވެ.

އިންތިޚާބުގައި ވާދަކުރައްވާނެ ކަމަށް އިއުލާންކުރެއްވި އަނާން ހައްޔަރު ކޮށްފައިވާއިރު، އިންތިޚާބުގައި ވާދަކުރައްވާނެ ކަމަށް އިއުލާން ކުރެއްވި އިންސާނީ ހައްޤުތަކާއި ބެހޭ ވަކީލު ޚާލިދު އަލީ ވަނީ ވާދަނުކުރައްވާނެކަން އިއުލާންކުރައްވާފައެވެ. އަދި ކުރީގެ ބޮޑުވަޒީރު އަހުމަދު ޝަފީޤް ވެސް ވަނީ އިންތިޚާބުގައި ވާދަކުރައްވަން ނިންމަވައި، ފަހުން ޚިޔާލު ބަދަލުކުރައްވާފައެވެ. އޭނާގެ ވަކީލުންނާއި ހަވާލާދީ އަރަބި މީޑިއާތައް ބުނާ ގޮތުގައި ޝަފީޤް ނަން އަނބުރާ ގެންދެވީ ސީސީގެ ސަރުކާރުގެ ފިއްތުންތަކާއި ބިރު ދެއްކުމުގެ ސަބަބުންނެވެ.

2017 ވަނަ އަަހަރުގެ ޑިސެމްބަރު މަހު އަސްކަރިއްޔާގެ ކާނަލެއް ކަމަށްވާ އަހުމަދު ކޮންސޯވާ ވެސް އިންތިޚާބުގައި ވާދަކުރަައްވާނެކަން އިއުލާންކުރެއްވިއެވެ. އެއާއިއެކު އޭނާ 6 އަހަރު ދުވަހަށް ޖަލަށް ލެވުނެވެ.

މިސްރުގެ އަސްކަރިއްޔާ އާއި ސަރުކާރު ބޭނުން ކޮށްގެން ސީސީ އިންތިޚާބަށް ނުފޫޒު ފޯރުވަމުންދާ ކަމަށް މިސްރުގެ ގިނަ ބަޔަކު ތުހުމަތުކުރެއެވެ. އަދި ވާދަކުރަން ތިިބި ކެންޑިޑޭޓުންގެ އިތުރުން ކެންޑިޑޭޓުންނަށް ތާޢީދުކުރާ ފަރާތްތަކަށް ވެސް ބިރު ދައްކަމުންދާ ކަމަށް ރިޕޯޓްތައް ބުނެއެވެ. އެގޮތުން މިހާރު ހައްޔަރުކޮށްފައިވާ އަނާންއަށް ތާޢިދުކުރާ މީހަކަށް ވެސް ހޮނިހިރު ދުވަހު ވެރިރަށް ޤާހިރާގައި ޙަމަލާދީ ވަރަށް ބޮޑަށް ޒަޚަމް ކޮށްލާފައިވެއެވެ.

މިސްރުގެ ރިޔާސީ އިންތިޚާބުގައި ވާދަކުރަން ފޯމު ހުށަހަޅަން ޖެހެނީ ތާޢީދުކުރާ 25 ހާސް މީހުންގެ ސޮޔާއި އެކުގައެވެ. އޭގެ ތެރޭގައި މިސްރުގެ 15 ގަަވަރނޭޓްގެ ތެރެއިން ކޮންމެ ގަވަރނޭޓަކުން މަދުވެގެން 1000 ސޮއެ ހޯދަން ޖެހެއެވެ. ނުވަތަ ޤާނޫްން ހަދާ މަޖިލީހުގެ 20 މެމްބަރެއްގެ ސޮޔާއިއެކުއެވެ.

ސީސީ 4 އަހަރުގެ ދެވަނަ ދައުރަކަށް ވާދަކުރައްވާނެކަން އިއުލާންކުރެއްވީ ޖެނުއަރީ 20 ވަަނަ ދުވަހުއެވެ. އިންތިޚާބުގެ ފުރަތަމަ ބުރުގައި ސީސީއަށް 50 އިންސައްތަ ވޯޓު ލިބިވަޑައިނުގެންފިނަމަ ދެވަނަ ބުރުގެ ވޯޓުލުން އޮންނަނީ އެޕްރީލް މަހުއެވެ.