ސަރުކާރުން ޝަރުއީ ނިޒާމަށް ނުފޫޒު ނުފޯރުވާނެ
ފުނަދޫ ދާއިރާގެ މެމްބަރު އަބްދުއްރަހީމް އަބްދުﷲ
ވަކި އާއިލާއަކަށް ނިސްބަތް ވުމުން ގާނޫނަށް ވުރެ ބާރު ގަދައެއް ނުވެވޭނެ ކަމަށް ރައްޔިތުންގެ މަޖިލީހުގެ ފުނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވިދާޅުވެއްޖެއެވެ. ޕީޕީއެމްގެ ނާއިބު ލީޑަރުކަން ވެސް ކުރައްވާ އަބްދުއްރަހީމް ހޮނިހިރު ދުވަހު މި ގޮތަށް ވިދާޅުވީ ކުރީގެ ރައީސް މައުމޫން އަބްދުﷲ ގައްޔޫމްގެ ދަރިކަލުން އަދި ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އަހްމަދު ފާރިސް މައުމޫން ހައްޔަރުކުރުމާ ގުޅިގެން ކުރެއްވި ޓްވީޓެއްގައެވެ.
އަބްދުއްރަހީމް ކުރެއްވި ޓްވީޓެއްގައި ވިދާޅުވީ ރައީސް އަބްދުﷲ ޔާމީންގެ ސަރުކާރުން ގާނޫނާ ހިލާފަށް އެއްވެސް މީހަކު ހިފާ ހައްޔަރު ނުކުރާނެ ކަމަށެވެ. ވަކި އާއިލާއަށް، ވަކި ނަސަބަކަށް ނިސްބަތް ވިޔަސް، ގާނޫނަށް ވުރެ ބާރުގަދަ ނުވެވޭނެ ކަމަށް އަބްދުއްރަހީމް ވިދާޅުވިއެވެ.
ރައީސް ޔާމީންގެ ސަރުކާރުން ޝަރުއީ ދާއިރާއަށް ނުފޫޒު ނުފޯރުވާނެކަން ފާހަގަކުރައްވަމުން އަދުއްރަހީމް ވިދާޅުވީ ގާނޫނޫ ތަންފީޒުކުރުމުގައި ވަކި ފަންތިއަކަށް ސަރުކާރުން ނުބަލާނެ ކަމަށެވެ. އަދި ރައީސް ޔާމީންގެ ސަރުކާރަކީ ހަމަހަމަކަމާ އެކު ގާނޫނު ތަންފީޒުކުރުމުގެ ފުދުންތެރިކަން ހުންނާނެ ސަރުކާރެއް ކަމަށް އަދުއްރަހީމް ވިދާޅުވިއެވެ.
މީގެ އިތުރުން އަދުއްރަހީމް ވިދާޅުވީ "ބޮޑު ކެކުރި އާއި ކުޑަ ކެކުރި ޒަމާން މިހާރު ފާއިތުވެއްޖެ" ކަމަށާއި ރައީސް ޔާމީންގެ ސަރުކާރަކީ ގާނޫނުގެ ބާރު ދެމެހެއްޓުމުގެ ގާބިލްކަން ހުރި ސަރުކާރެއް ކަމަށެވެ.
ޖަލުގައި ހައްޔަރުކޮށްފައި ހުންނަތާ ހަ މަސް ފަހުން ބުރާސްފަތި ދުވަހު ކޯޓުން މިނިވަންކުރި ފާރިސް އަލުން ހައްޔަރުކުރީ ސަރުކާރު ވައްޓާލަން އުޅޭ ކަމުގެ ތުހްމަތާއި ރައްޔިތުންގެ މަޖިލީހުގެ މެމްބަރުންނަށް ފައިސާ ބެއްސެވިކަމުގެ ތުހްމަތުގައެވެ. ފާރިސްގެ އެޕާޓްމެންޓް ބަލައި ފާސްކުރުމަށް ނެރެފައިވާ ކޯޓް އަމުރުގައި ބުނެފައި ވަނީ ރައްޔިތުންގެ މަޖިލީހުގެ މެންބަރުންތަކަކަށް ފައިސާ ބެހި ކަމަށް ތުހުމަތު ކުރެވޭތީ އާއި ރައްޔިތުންގެ މަޖިލީހުގެ މެންބަރުންތަކަކާ ގުޅިގެން ދިވެހިރާއްޖޭގައި އުފެދިފައިވާ ގާނޫނީ ވެރިކަން ވައްޓާލުމަށް ގާނޫނާ ހިލާފަށް މަސައްކަތްތަކެއް ކުރަން ރާވާފައިވާ ކަމަށް ތުހުމަތު ކުރެވޭތީ ކަމަށެވެ. އަދި ފާރިސްގެ ބައްޕާފުޅު މައުމޫން ދިރިއުޅުއްވާ މ. އެންދެރިމާގެ ވެސް ފުލުހުން ވަނީ ފާސްކޮށްފައެވެ.
