2017 ވަނަ އަހަރުގެ ފަހު ކުއާޓަރގައި ބީއެމްއެލް އަށް ބޮޑު ފައިދާއެއް!
ފަހު ކުއާޓަރގައި ޓެކްސްއަށް ކެނޑުމަށްފަހު ފައިދާގެ ގޮތުގައި ބީއެމްއެލް އަށް ލިބިފައިވަނީ 350 މިލިއަން ރުފިޔާ
ބޭންކް އޮފް މޯލްޑިވްސްގެ ސީއީއޯ އެންޑްރޫ ހީލީ
2017 ވަނަ އަހަރުގެ ފަހު ކުއާޓަރގައި ބީއެމްއެލް އަށް ބޮޑު ފައިދާއެއް ލިބިއްޖެއެވެ.
ފަހު ކުއާޓަރގައި ޓެކްސްއަށް ކެނޑުމަށް ފަހު ފައިދާގެ ގޮތުގައި ބީއެމްއެލް އަށް ލިބިފައިވަނީ 350 މިލިއަން ރުފިޔާއެވެ.
އަހަރެންގެ ބޭންކް 28 ހަރަކާތްތަކާ ގުޅޭގޮތުން މައުލޫމާތު ދިނުމަށް ބުރާސްފަތި ދުވަހު ބޭއްވި ހާއްސަ ހަފްލާގައި ބޭންކް އޮފް މޯލްޑިވްސް އިން ބުނީ މިއީ ކުރީ ކުއާޓަރ އާ އަޅާ ބަލާއިރު 42 ޕަސަންޓްގެ ކުރިއެރުމެއް ކަމަށެވެ. މިދިޔަ އަހަރުގެ މާލީ ހިސާބުތައް އޮޑިޓް ކުރުމުގެ މަސައްކަތްކުރިއަށް ދާތީވެ، މުޅި އަހަރުގެ ނަތީޖާ ބޭންކުން އަދި ހާމަކޮށްފައެއް ނުވެއެވެ.
މި ހަފްލާގައި ވާހަކަ ދައްކަވަމުން ސީއީއޯ އެންޑްރޫ ހީލީ ވިދާޅުވީ މިދިޔަ އަހަރުގެ ނަތީޖާ އާއެކު ބޭންކުގެ އަމާޒަށް ވާސިލްވުމަށް ކުރަމުންދާ މަސައްކަތަށް ބޮޑު އިތުބާރެއް ލިބިފައިވާ ކަމަށެވެ. އަދި ބޭންކްގެ މަސައްކަތްތައް ހަރުދަނާ ކުރުމަށް ދިވެހި މުޖުތަމައު އަށް ކުރަމުންދާ އިންވެސްޓްމަންޓް ކުރިއަށް ގެންދިޔުމަށާއި ރާއްޖޭގައި ހިދުމަތް އިތުރަށް ފުޅާކުރުމުގެ އިތުރުން ރާއްޖެއިން ބޭރުގައި ހިދުމަތް ދޭން ފެށުމަށް ވެސް ލިބުނު ރަނގަޅު ފުރުސަތެއް ކަމަށް އޭނާ ވިދާޅުވިއެވެ.
ބޭންކުގެ މި އަހަރުގެ އަމާޒަކީ 2018 ވަނަ އަހަރުގެ ތަސައްވުރުގައި ހިމެނޭ މުޖުތަމުއަށް އެހީތެރިކަން ފޯރުކޮށްދިނުމުގެ 60 މަޝްރޫއު އާއި ބޭންކިންގ ވިޔުގަ އިތުރަށް ފުޅާކޮށް، ރާއްޖޭން ބޭރަށް ހިދުމަތް ފޯރުކޮށްދިނުމެވެ.
މިދިޔަ އަހަރު ބޭންކް އޮފް މޯލްޑިވްސްއާ އައު 23000 ކަސްޓަމަރުން ގުޅިފައިވާ ކަމަށް އެ ބޭންކުން ބުންޏެވެ.
