އެމެރިކާގެ ޑިފެންސް ސެކްރެޓަރީ އަށް އިންޑޮނޭޝިއާގެ ސްޕެޝަލް ފޯސަސް އިން ހުނަރުވެރި ހަރަކާތްތަކެއް ދައްކާލައިފި

އިންޑޮނޭޝިއާ އަށް ވަޑައިގެންނެވި އެމެރިކާގެ ޑިފެންސް ސެކްރެޓަރީ އަށް އެގައުމުގެ "އިންޑޮނޭޝިއަން ސްޕެޝަލް ފޯސަސް" އިން ވަރަށް ތަފާތު އަދި އެހާމެ ހުނަރުވެރި ހަރަކާތްތަކެއް ދައްކާލައިފިއެވެ.

ވެރިރަށް ޖަކާޓާގައި އަސްކަރިއްޔާ އިން ދެއްކި ހަރާކާތުގައި އިންޑޮނޭޝިއާގެ ސިފައިން ވަނީ ހަރުފައިގެ ލޭ ބޮއެ، އަލިފާނުގައި ހިނގާ، ކޮންކްރީޓް ބްލޮކްތައް ހަލާކުކުރުން ފަދަ ހުނަރުވެރި ހަރަކާތްތައް ދައްކާލާފައެވެ.

މިހަރަކާތް ބައްލަވާލެއްވުމަށް ފަހު، އިންޑޮނޭޝިއާގެ ރައީސް ޖޯކޯ ވިޑޯޑޯ އާ ބައްދަލު ކުރެއްވުމަށް ވަޑައިގަތުމުގެ މަގުމަތީގައި އެމެރިކާގެ ޑިފެންސް ސެކްރެޓަރީ ޖޭމްސް މެޓިސް ވިދާޅުވީ އެމެރިކާގެ އަސްކަރިއްޔާއިން "އިންޑޮނޭޝިއާގެ އަސްކަރިއްޔާ ގުޅިގެން އެހެން އެއްވެސް ގައުމެއްގެ އަސްކަރިއްޔާ ނުބާއްވާ ވަރަށް އެކި އެކި އަސްކަރީ ހަަރަކާތްތައް ބާއްވާ ކަމަށެވެ."

އިންޑިއާ ކަނޑު އަދި ޕެސިފިކް ކަނޑުގެ ދެމެދުގައިވާ އިންޑޮނޭޝިއާ އަކީ އެ ސަރަހައްދުގައި އެމެރިކާގެ މެރިޓައިމް ގުޅުން ބަދަހި ކުރުމަށް ވަރަށް މުހިންމު ބައިވެރިއެކެވެ.

އެމެރިކާގެ ޑިފެންސް ސެކްރެޓަރީ ޖޭމްސް މެޓިސް ދެކުނު އިރުމަތީ އޭޝިޔާގެ ގައުމުތަކަށް ވަޑައިގެން އުޅުއްވަނީ އެ ސަރަހައްދުގެ ގައުމުތަކާ ގުޅުން ބަދަހި ކުރެއްވުމުގެ ބޭނުންފުޅުގައެވެ.