ރައީސް މައުމޫންއަށް މިލާން ކްރިކެޓް އެކަޑަމީއިން ރަން މެޑަލްއެއް އަރުވައިފި

ރާއްޖޭގައި ކްރިކެޓަށް ކުރީގެ ރައީސް މައުމޫން އަބްދުލް ގައްޔޫމު ކޮށްދެއްވާފައިވާ ހިދުމަތުގެ އަގުވަޒަން ކުރުމުގެ ގޮތުން އެމަނިކުފާނަށް މިލާން ކްރިކެޓް އެކަޑަމީގެ ފަރާތުން ރަން މެޑަލްއެއް އަރުވައިފިއެވެ.

ރައީސް މައުމޫނުގެ އޮފީހުގައި ބޭއްވެވި ރަސްމިއްޔާތެއްގައި އެމަނިކުފާނަށް ރަން މެޑެލް ހަވާލު ކޮށްދެއްވީ މިލާން ކްރިކެޓް އެކަޑަމީގެ ފައުންޑަރ އަދި ރައީސް ފަރުހަތު ޖަލީލްއެވެ. މި ރަސްމިއްޔާތުގައި އެ އެކަޑަމީއިން ވަނީ ރައީސް މައުމޫންއަށް ހަދާނީ ފިލައެއް ވެސް އަރުވާފައެވެ.

މި ރަސްމިއްޔާތުގައި ވާހަކަ ދައްކަމުން ފަރުހަތު ވިދާޅުވީ ރައީސް މައުމޫންއަށް މި ޝަރަފުއަރުވަން ނިންމެވީ އެ އެކަޑަމީގެ މަސައްކަތުގެ ދަށުން ކްރިކެޓަށް ބޮޑެތި ހިދުމަތްތައް ކޮށްދެއްވާފައިވާ ބޭފުޅުންގެ އަގުވަޒަންކުރުމުގެ ގޮތުން ކަމަށެވެ. ފަރުހަތު ވިދާޅުވީ އެ ލިސްޓުގެ އެންމެ ކުރީގައި ހިމެނިވަޑައިގަންނަވަނީ ރައީސް މައުމޫނު ކަމަށެވެ.

ރައީސް މައުމޫން ވަނީ މިލާން ކްރިކެޓް އެކަޑަމީއިން އެމަނިކުފާނުގެ އަގުވަޒަން ކުރެއްވުމަށް އެރުވި މެޑަލްއާ ހަދާނީ ލިޔުމަށް ޝުކުރު އަދާކުރައްވާފައެވެ. އެމަނިކުފާނު ވިދާޅުވީ އެ އެކަޑަމީއިން ކްރިކެޓް ކުޅުންތެރިން އުފައްދައި ރާއްޖޭގައި ކްރިކެޓް ކުރިއެރުވުމަށް ކުރައްވަމުންދާ މަސައްކަތް ފާހަގަކުރައްވާ ކަމަށެވެ.

ރައީސް މައުމޫންއަކީ ކްރިކެޓް ކުޅުއްވައި ކްރިކެޓަށް ނުހަނު ބޮޑު ޝައުގުވެރިކަމެއް ބަހައްޓަވަމުން އަންނަ ބޭފުޅެކެވެ. މި ރަސްމިއްޔާތުގައި އެމަނިކުފާނު ވަނީ ކްރިކެޓާއި ގުޅޭ ތަފާތު އެކި ވާހަކަތައް ވެސް ހިއްސާ ކުރައްވާފައެވެ. އެމަނިކުފާނުގެ ވެރިކަމުގައި ކްރިކެޓަކީ ވަރަށް ބޮޑު އަހަންމިއްޔަތުކަމެއް ދެވިގެން ރާއްޖޭގައި ކުރިއެރުވުމަށް މަސައްކަތްކުރެވުނު ކުޅިވަރެކެވެ. ހަމައެހެންމެ އެމަނިކުފާނުގެ ވެރިކަމުގައި ރާއްޖޭގެ ޓީމުތަކުން ވަނީ ސަރަހައްދީ ފެންވަރުގެ މުބާރާތްތައް ވެސް ކާމިޔާބުކޮށްފައެވެ.

މިލާން ކްރިކެޓް އެކަޑަމީ އަކީ 2009 ވަނަ އަހަރުން ފެށިގެން ރާއްޖޭގައި ހިލޭ ސާބަހަށް ކްރިކެޓް ކުޅުންތެރިން ތަމްރީނުކުރުމުގެ މަސައްކަތްކުރަމުން އަންނަ އެކަޑަމީއެކެވެ. އެ އެކަޑަމީއިން ތަމްރީނުވި ހަ ކުޅުންތެރިޔަކު ވަނީ މިހާތަނަށް ރާއްޖޭގެ ގައުމީ ޓީމަށް ކުޅެފައެވެ.