އަނިޔާވެރިކަން ނިންމާނީ ޝެއިހް އިމްރާންގެ ނުގުޑާ އަޒުމާ އެއްގޮތަށް: އިބޫ
އިމްރާންގެ ހިތްވަރުން ރައްޔިތުން މިއަދު ހިތްވަރު ލިބިގަންނަންޖެހޭ
ހިންނަވަރު ދާއިރާގެ މެމްބަރު އިބުރާހިމް މުހައްމަދު ސޯލިހު
ރައީސް އަބްދުﷲ ޔާމީންގެ އަނިޔާވެރިކަން ނިންމާނީ އަދާލަތު ޕާޓީގެ ރައީސް ޝެއިހް އިމްރާން އަބުދުﷲގެ ނުގުޑާ އަޒުމާ އެއްގޮތަށް ކަމަށް ރައްޔިތުންގެ މަޖިލީހުގެ މައިނޯރިޓީ ލީޑަރު ހިންނަވަރު ދާއިރާގެ މެމްބަރު އިބުރާހިމް މުހައްމަދު ސޯލިހު ވިދާޅުވެއްޖެއެވެ.
ގުޅިފައިވާ ސިޔާސީ ޕާޓީތަކުން އަންގާރަ ދުވަހުގެ ހަވީރު އެމްޑީޕީ ހަރުގޭގައި ބޭއްވި ހަރަކާތުގައި ވާހަކަ ދައްކަވަމުން އިބޫ ވިދާޅުވީ މިހާތަނަން ކުރި ސިޔާސީ މަސައްކަތުގައ ދިމާވި އެންމެ އިތުބާރު ކުރައްވާ ބޭފުޅަކީ ޝެއިހް އިމްރާން ކަމަށެވެ. މޭޑޭގެ ހަރަކާތްތައް މިހާރުވެސް ލޯ ކުރިމަތިން ސިފަވާ ކަމަށާއި، ރައީސް އަބްދުﷲ ޔާމީންގެ އަނިޔާވެރިކަން ނިންމާނީ އެދުވަހު މޭޑޭ ހަރަކާތުގައި ބައިވެރި ރައްޔިތުންގެ އުންމީދާ ޝެއިހް އިމްރާގެ ނުގުޑާ އަޒުމާއި އެކުގައި ކަމަށް އިބޫ ވިދާޅުވިއެވެ.
"ޝެއިހް އިމްރާން އަކީ އަޅުގަނޑު މި ސިޔާސީ ހަރާކަތައް ނުކުމެ ބައްދަލުވި، މީހުންތަކުގެ ތެރެއިން އެކުގައި މަސައްކަތް ކުރައްވަން ލިބުނު ފަރާތަކުގެ ތެރެއިން، އަޅުގަނޑު އެންމެ އިތުބާރު ކުރައްވާ އެއްބޭފުޅާ، ޝެއިހް އިމްރާނަކީ މީސްމީހުންގެ ހިޔާލު ހޯއްދަވާ، ކަންތައްތަކުގައި ލަފާ ހޯއްދަވާ ޓީމް ޕްލެއާރއެއް" އިބޫ ވިދާޅުވިއެވެ.
ރާއްޖޭގެ ތާރީޙުގައި ޝެއިހް އިމްރާންގެ ނަން ލިޔެވިގެންދާނެ ކަމަށާއި، ނުގުޑާފަދަ އަޒުމެއްގައި އިމްރާން ޖަލުގައި އޮންނަވާތާ 1000 ދުވަސް ވުމުން ރައްޔިތުން މިއަދު ހިތްވަރު ލިބިގަންނަންޖެހޭ ކަމަށް އިބޫ ވިދާޅުވިއެވެ.
މާޒީގެ ތެރެއަށް ނަޒަރު ހިންގަވައި ވާހަކަ ދައްކަވަމުން އިބޫ ވިދާޅުވީ އެމްޑީޕީ ، ޖުމްހޫރީ ޕާޓީ އަދި އަދާލަތު ޕާޓީ އެކުވެގެން ގާނޫނު އަސާސީ ދިފާއުގައި ކުރި މަސައްކަތަށް އިތުރުވި ބޮޅަކީ އަނިޔާވެރިކަމާއި ދެކޮޅަށް ކުރަން ފެށި މަސައްކަތް ކަމަށެވެ. އަނިޔާވެރިކަމާއި ދެކޮޅަށް މަސައްކަތް ފެށީ ހިޔާލުފާޅުކުރުމުގެ މިނިވަންކަން ނެތި، ސިޔާސީ ޕާޓީތަކަށް ހަރަކާތް ހިންގުމުގެ ފުރުޝަތު ހަނިވެ، ނޫސްވެރިކަމުގެ މިނިވަންކަން ގެއްލުމުން ކަމަށެވެ. ނަތީޖާއެއްގެ ގޮތުން އިދިކޮޅު ހަތަރު ލީޑަރުން އެކުވެގެން "ގުޅިފައިވާ ސިޔާސީ ޕާޓީތަކުގެ ހަރަކާތްތައް" ފަށާ އެކުގައި މަސައްކަތް ކުރަން ފެށުނު ކަމަށް ވެސް ވިދާޅުވިއެވެ.
