ތެލްއަވީވްގައި ހުންނަ އެމެރިކާގެ އެމްބަސީ، 2019 ވަނަ އަހަރު ނިމުމުގެ ކުރިން ގުދުސްއަށް ބަދަލުކުރާނެ ކަމަށް އެމެރިކާގެ ނައިބް ރައީސް މައިކް ޕެންސް ވިދާޅުވެއްޖެ އެވެ. 

އިސްރާއީލުގެ ގާނޫނު ހަދާ މަޖިލީހުގައި ވާހަކަ ދައްކަވަމުން ޕެންސް މިހެން ވިދާޅުވުމާއެކު މަޖިލީޙުގެ މެމްބަރުންވަނީ ކޮޅަށް ތެދުވެވަޑައިގެން އެކަމަށް ތާއިދު ކުރެއްވުމުގެ ގޮތުން އަތްތިލަބަޑި ޖައްސަވައިފަ އެވެ. 

ޕެންސްގެ ތަގުރީރު ފެށުނު ވަގުތު ފަލަސްތީނުގެ ގާނޫނު ހަދާ މަޖިލީހުގެ މެމްބަރުންވަނީ އަލް އަގްސާ މިސްކިތުގެ ހަރިންމަ ތެރޭގައި މުޒާހަރާ ކޮށްފައެވެ. ނަމަވެސް ސަލާމަތީ ބާރުތަކުންވަނީ ބާރުގެ ބޭނުންކޮށްގެން އެ މެމްބަރުން އެތަނުން ދުރުކޮށްފަ އެވެ. 

"އެމެރިކާ އޮތީ އިސްރާއީލާއިއެކު" ޕެންސް ވިދާޅުވިއެވެ.

"އަޅުގަނޑުމެން އިސްރާއީލާއިއެކު މި ތިބެނީ، ތިބޭފުޅުންގެ އަމާޒަކީ އަޅުގަނޑުމެންގެވެސް އަމާޒު. ތިބޭފުޅުން ގަބޫލުފުޅު ކުރައްވާ ހަމަތަކަކީ އަޅުގަނޑުމެން ވެސް ގަބޫލުކުރާ ހަމަތައް. ތިބޭފުޅުންގެ ހަނގުރާމައަކީ އަޅުގަނޑުމެންގެވެސް ހަނގުރާމަ."

"އަޅުގަނޑުމެން އިސްރާއީލާއެކު މި ތިބެނީ ނުބައިގެ މައްޗަށް ހެޔޮ ގޮތް އަޅުގަނޑުމެން ގަބޫލުކުރާތީ. ޝައިތާނީ ވިސްނުމުގެ މައްޗަށް ހެޔޮ ގޮތް ގަބޫލުކުރާތީ. އަދި އަނިޔާވެރިކަމުގެ މައްޗަށް މިނިވަންކަން ގަބޫލުކުރާތީ."

އިސްރާއީލުގައި ހުންނަ އެމެރިކާގެ އެމްބަސީ ގުދުސްއަށް ބަދަލުކުރުމަކީ އެމެރިކާގެ ރައީސް ޑޮނަލްޑް ޓްރަމްޕްގެ ވައުދަކަށްވާއިރު އެމްބަސީ ބަދަލުކުރަން ނިންމެވިކަމާއި ގުދުސްއަކީ އިސްރާއީލުގެ ވެރިރަށް ކަމަށް ބަލައިގަންނަ ކަމަށް ހާމަކުރައްވާފައިވަނީ މިދިޔަ އަހަރުގެ ޑިސެމްބަރު މަހުގެ ހަ ވަނަ ދުވަހުއެވެ.