އީޕީއެސް ސްކޫލުން ތައުލީމް ހާސިލްކުރި އެތައް ދަރިވަރުންނެއް މިއަދު ދައުލަތުގެ އިސް މަގާމުތަކުގައި އެބަ ތިއްބެވި އެވެ. އީޕީއެސްގެ ސްކޫލޫގެ ފުރާޅުގެ ދަށުން މަދަރުސީ ހަޔާތް ނިންމާލި އެތައް ދަރިވަރަކު ރާއްޖޭގެ އެކި ހިސާބުތަކުގައި އެބަ ތިއްބެވި އެވެ. މަދަރުސީ ހަޔާތުގައި ދިމާވި އެކުވެރިކަމާއި އެ ހަނދާންތައް ތާއަބަދަށް ދެމިހުރެ އެވެ.
އީޕީއެސްގެ އިސް ދަރިވަރުންނަށް އަންނަނީ ބޮޑު ދުވަހެކެވެ. އެ ސްކޫލަށް 50 ފުރޭ ރަންޔޫބީލް ފާހަގަ ކުރަން ދަނީ ތައްޔާރުވަމުންވެ. މި މުހިންމު، އަދި ތާރީޚީ އިވެންޓް ފާހަގަކުރުމަށްޓަކައި، ރާއްޖެ އާއި ރާއްޖޭން ބޭރުގައި ތިއްބެވި އީޕީއެސްގެ އިސް ދަރިވަރުން ފެބްރުއަރީ 1 ވަނަ ދުވަހު، މިހާރުގެ ބިލަބޮންގް ހައި އިންޓަނޭޝަނަލް ސްކޫލް (ކުރިން އީޕީއެސް ހިންގި އިމާރާތް) އަށް ވަޑައިގަތަށް އެދިވަޑައިގަންނަވަ އެވެ.
އީޕީއެސްގެ ރަންޔޫބީލްގެ ހަރަކާތްތައް އިންތިޒާމްކުރަން އެކުލަވާލާފައިވާ އެޑްވައިޒަރީ ކޮމެޓީގެ ޕަބްލިކް ރިލޭޝަން ކޯޑިނޭޓަރު މުހައްމަދު ސަލީމް ރާއްޖެއެމްވީއަށް ވިދާޅުވީ ފެބްރުއަރީ މަހުގެ އެއް ވަނަ ދުވަހު ބާއްވާ ބައްދަލުވުމަށް އީޕީއެސްއިން ތައުލީމް ހާސިލްކުރި ހުރިހާ ދަރިވަރުނަށް ހުޅުވާލެވިފައިވާ ދައުވަތެއް އޮތް ކަމަށެވެ. އޭނާ ވިދާޅުވީ އީޕީއެސްގެ ރަންޔޫބީލް ފާހަގަ ކުރުމަށް ކުރާނެ ކަންތައް ތަކާ ގުޅޭ ގޮތުން ތަފާތު ހިޔާލުތައް މިހާރުވެސް ލިބެމުން އަންނަ ކަމަށެވެ. އީޕީއެސް އިން 26772 ދަރިވަރުން ތައުލީމް ހާސިލްކޮށްފައިވާއިރު އެ ސްކޫލްގެ އަހަރީ ދުވަސް ފާހަގަ ކުރުމަށް ހިންގާނެ ހަރަކާތްތައް ނިންމާނީ ފެބްރުއަރީ އެއް ވަނަ ދުވަހުގެ ރޭ 8.30 ގައި ބާއްވާ ބައްދަލުވުމުން ކަމަށް އޭނާ ވިދާޅުވި އެވެ.
"ތީމް ސޯންގެއް ހެދުމުގެ ހިޔާލު އެބަ އުޅޭ. އީޕީއެސްގެ މޮނިއުމަންޓެއް ހެދުމުގެ ހިޔާލު އެބަ އުޅޭ. އީޕީއެސްގެ ފައުންޑޭޝަނެއް ވުޖޫދު ކުރުމާ ބެހޭ ހިޔާލެއް އެބަ އުޅޭ. އީޕީއެސްގެ ނަން ދިރިވުމާ ބެހޭ ހިޔާލެއް އެބަ އުޅޭ. ކުރީގައި ވެސް އޮތް ގޮތަކަށް ރާއްޖޭގެ އެކި ހިސާބުތަކުގައި ތިބި ދަރިވަރުންނަށް ތައުލީމް ހާސިލް ކުރަން އީޕީއެސްގެ ފައުންޑޭޝަނެއް ހަދާ މަދަދުގާރަކަށް ވާންވީތޯ، މި ކަހަލަ ބައިވަރު ހިޔާލު އެބަ އުޅޭ. އެކަމަކު ހުރިހާ ކަމެއް އެންޑޯޒް ކުރާނީ އެކެއް ފެބްރުއަރީގައި މި ބާއްވާ ބައްދަލުވުމުގައި އަޅުގަނޑުމެންގެ އިސް ދަރިވަރުން،" އޭނާ ވިދާޅުވި އެވެ.
އީޕީއެސް ސްކޫލް ފެށީ 21 ޖޫން 1968 ގައި ބޮޑު ފެންވަޅުގެއިންނެވެ. އޭރު ސުކޫލު ހުޅުވުމުގެ އެންމެ ބޮޑު މަގުސަދަކަށް ވެފައި އޮތީ އަތޮޅުތަކުން މާލެ އަންނަ ކުދިންނަށް ތައުލީމީ ފުރުސަތު ތަނަވަސްކޮށްދިނުމެވެ.
