ނަތަންޔާހޫ އާއި ބައްދަލުކުރަން ތިން ޚާނުން ދެކޮޅުހަދައިފި

ނިމިގެން ދިޔަ ހަފްތާގައި އިސްރާއީލުގެ ބޮޑުވަޒީރު، ބެންޖަމިން ނަތަންޔާހޫ އިންޑިއާއަށް ކުރެއްވި ރަސްމީ ދަތުރުފުޅުގައި ބޮލީވުޑްގެ ތަރިންނާއި ބައްދަލުކުރުމަށް ބޭއްވެވި ރަސްމިއްޔާތުގައި ބައިވެރިވުމަށް، ބޮޅިވުޑްގެ މަޝްޙޫރު ތިން ޚާނުން ދެކޮޅުހެދިކަން ހާމަވެއްޖެއެވެ.

އިންޑިއާގެ ނޫސްތަކުން ބުނާގޮތުގައި ޖަނަވަރީ 18 ވަނަ ދުވަހުގެރޭ ބޭއްވި ރަސްމިއްޔާތުގައި ބައިވެރިވުމަށް އާމިރު ޚާން އާއި ޝާހުރުކް ޚާން އަދި ސަލްމާން ޚާން ވަނީ ދެކޮޅު ހަދާފައެވެ. އެ ރަސްމިއްޔާތުގައި ބައިވެރިވުމަށް އެ ތިން އެކްޓަރުން ދެކޮޅު ހެދި ސަބަބެއް، އެ ފަންނާނުންގެ ފަރާތުން އަދި ހާމަކޮށްފައެއް ނުވެއެވެ. ނަމަވެސް، ރިޕޯޓްތައް ބުނާ ގޮތުގައި ތިން ޚާނުން އެ ރަސްމިއްޔާތުގައި ބައިވެރިވުމަށް ދެކޮޅު ހެދީ ނަތަންޔާހޫ އަކީ ޒަޔަނިސްޓަކަށް ވެފައި، އެމަނިކުފާނަކީ، ފަލަސްޠީނުގެ ރައްޔިތުންނާއި ދެކޮޅަށް ހިންގަމުންދާ އިންސާނިއްޔަތާއި ޚިލާފު، ހަނގުރާމައިގެ ޖަރީމާތަކުގެ އަޑީގައި ހުރި ފަރާތް ކަމަށް ވުމުންނެވެ.

ތިން ޚާނުންގެ މި ނިންމުމަށް އިންޑިއާ އާއި އެހެނިހެން ޤައުމުތަކުގެ ގިނަ ބަޔަކު ތަޢުރީފުކުރަމުންދާއިރު، ބައެއް ފަރާތްތަކުން ދަނީ މި ނިންމުމަށް ފާޑުވެސް ކިޔަމުންނެވެ.

ބުދަ ދުވަހުގެރޭ ބޭއްވި ރަސްމިއްޔަތުގައި އަމީތާބް ބައްޗަން ފަދަ ބޮލީވުޑްގެ ބޮޑެތި ތަރިން ބައިވެރި ވެފައިވާއިރު ތިން ޚާނުން ފިޔަވައި ބައެއް އެހެން ފަންނާނުންވެސް ވަނީ މި ރަސްމިއްޔާތު ބޮއިކޮޓްކޮށްފައެވެ.