ވިލާގެ ރިސޯޓްތަކުގައި ހުރި ބަނގުރާ ނަގަނީ ގާނޫނާ އެއްގޮތަށް: ކަސްޓަމްސް

ވިލާ ގްރޫޕްގެ ރިސޯޓްތަކުގެ ހުރި ބަނގުރާ މޯލްޑިވްސް ކަސްޓަމްސް ސާވިސްގެ ބެލުމުގެ ދަށަށް ގެންދަނީ ކޯޓު އަމުރާއި ޖިނާއީ އިޖުރާއަތުގެ ގާނޫނާ އެއްގޮތަށް ކަމަށް ކަސްޓަމްސް އިން ބުނެފިއެވެ.

ވިލާގެ ފަން އައިލެންޑްގައި ހުރި ގިނަ އަދަދެއްގެ ބަނގުރާ ކަސްޓަމްސްގެ ބެލުމުގެ ދަށަށް ގެންދިޔައީ ގާނޫނާ ހިލާފަށް ކަމަށާއި އެއީ މުދާ ފޭރުން ކަމަށް ވިލާގެ ގާނޫނީ ވަކީލުން ވިދާޅުވެފައިވާއިރު، އެކަމަށް ރައްދުދީ ކަސްޓަމްސް އިން ނެރުނު ބަޔާނުގައި ބުނެފައި ވަނީ ބޮންޑެޑް ވެއަރހައުސްތަކުން ރޯޔަލް އައިލެންޑް ރިސޯޓްގެ ނަމުގައި ދޫކުރި ބަނގުރާ ގަވާއިދާ ޚިލާފަށް ގެންގޮސްފައިވާ ރިސޯޓުތަކުން އެތަކެތި ކަސްޓަމްސްގެ ބެލުމުގެ ދަށަށް ގެނައުމަށްޓަކައި ހިންގޭ އޮޕަރޭޝަނުގައި އެތަކެތި ކަސްޓަމްސްގެ ބެލުމުގެ ދަށަށް ގެންދަނީ ކޯޓު އަމުރު ތަންފީޒް ކުރުމުގައި ޖިނާއީ އިޖުރާއަތުގެ ޤާނޫނުގެ ދަށުން ލިބޭ ބާރުގެ ދަށުން ކަމަށެވެ.

ވިލާގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ ހުސައިން ޝަމީމް ވިދާޅުވީ، ކްރިމިނަލް ކޯޓުން ދީފައިވާ އަމުރުގައި މުދާ ގެންދިއުމަށް ހުއްދަ ދީފައި ނޯންނާނެ ކަމަށާއި ހަމައެކަނި އެ އަމުރުގައި ބަޔާންކޮށްފައި ވަނީ ބަލައި ފާސްކުރުން ކަމަށެވެ.

ކަސްޓަމްސްއިން ނެރުނު ބަޔާނުގައި ބުނެފައި ވަނީ ބަނގުރަލާއި އޫރުމަސް ދިވެހިރާއްޖެއަށް ގެންނަންވާނީ އަދި ގެންގުޅެންވާނީ މިނިސްޓްރީ އޮފް އިކޮނޮމިކް ޑިވެލޮޕްމަންޓުން ކަނޑައަޅާ ގަވާއިދާ އެއްގޮތަށް ކަމަށާއި އެގަވާއިދާ ޚިލާފަށް އެތަކެތި އިމްޕޯޓްކޮށް ގެންގުޅުމަކީ ކުށެއް ކަމަށް ދިވެހިރާއްޖެއަށް ގެނައުން މަނާ ތަކެތީގެ ޤާނޫނުގައި ބަޔާންކޮށްފައިވާ ކަމަށެވެ. މި ޤާނޫނުގެ ދަށުން ހަދާފައިވާ ބަނގުރަލާއި އޫރުމަހުގެ ގަވާއިދުގައި ބުނާ ގޮތުން ރިސޯޓުތަކަށް ބަނގުރާ ދޫކުރެވޭނީ ހަމައެކަނި އެ ރިސޯޓެއްގައި ރަޖިސްޓްރީވެގެން ތިބޭ ބިދޭސީން ނުވަތަ އެތަނަށް ޒިޔާރަތްކުރާ ބިދޭސީންނަށެވެ. އަދި ޚިދުމަތްދޭ ސަރަޙައްދުން އެތަކެތި ބޭރަށް ގެންދާ ގޮތަށް އެތަކެތި އެއްވެސް ފަރާތަކަށް ދީ ވިއްކައި ހެދުމަކީ މަނާ ކަމެއް ކަމަށް އެ ގަވާއިދުގައި ބަޔާންކޮށްފައިވާ ކަމަށް ކަސްޓަމްސްގެ ބަޔާނުގައިވެއެވެ.

"ބަނގުރަލާއި އޫރުމަހަކީ ވަކި ޤާނޫނެއްގެ ދަށުން ކޮންޓްރޯލް ކުރެވި، ވަކި އުސޫލުތަކެއްގެ ދަށުން ޢަމަލުކުރަންޖެހޭ އެއްޗަކަށްވާއިރު، ޢާންމު ވިޔަފާރި މުދާހެން ބަނގުރަލާއި އޫރުމަސް އެއްތަނުން އަނެއް ތަނަށް ގެންދިއުމާއި އޭގެ ވިޔަފާރި ކުރުމަކީ ޤާނޫނު މަނާކުރާ ކަމެކެވެ." ބަޔާނުގައިވެއެވެ.

ވިލާގެ ރިސޯޓެއްގައި މިއަދު މުޒާހަރާކުރަނީ

ވިލާގެ ރިސޯޓްތަކުގައި ހުރި ބަނގުރާ ނެގުމުގެ އޮޕަރޭޝަން ކުރިއަށް ގެންދިއުމުގައި، ފަތުރުވެރިކަމުގެ ސިނާޢަތަށް ނުރަނގަޅު އަސަރެއް ކޮށްފާނެ ފަދަ އަދި ފަތުރުވެރިންނަށް ނުރަނގަޅު މަންޒަރެއް ސިފަވާ ގޮތަށް ނުވަތަ ނުރަނގަޅު މެސެޖެއް ލިބޭ ފަދަ ގޮތަކަށް ކަސްޓަމްސް އިން ޢަމަލުކުރަމުން ނުގެންދާކާ ކަމަށް ވެސް ބުނެފައިވެއެވެ. ނަމަވެސް، ހޮނިހިރު ދުވަހު ކަސްޓަމްސް އާއި ފުލުހުންގެ ބޮޑު ފައުޖެއް ފަން އައިލެންޑަަށް އެރި މަންޒަރާއި އެ ފައުޖުގެ ސަބަބުން ފަތުރުވެރިންނަށް ދަތިތައް ކުރިމަތިވި މަންޒަރު ފޮޓޯ އާއި ވީޑިއޯތަކުން ފެނިގެންދިޔައެވެ.

ކަސްޓަމްސްގެ ބަޔާނުގައި ބުނެފައި ވަނީ މި އޮޕަރޭޝަން ހިންގަމުން ދަނީ، ވީހާ ވެސް ބޮޑަށް މަޝްވަރާކޮށްގެން ސުލްޙަވެރިކަމާ އެކު ކަމަށެވެ. އެގޮތުން ބަލައިފާސްކުރުމުގެ ކުރިން، ކަސްޓަމްސްގެ ޤާނޫނީ ޒިންމާ އާއި ބަލައި ފާސްކުރަން ބޭނުންވާ ތަންތަނާއި، އެތަންތަން ބަލައި ފާސްކުރަން ބޭނުންވާ ސަބަބު ތަފްސީލްކޮށް ކިޔައިދެވިފައިވާނެ ކަމަށާއި ބަލައި ފާސްކުރަމުންދަނީ ހަމައެކަނި ބަނގުރާ ބަހައްޓާފައި ހުންނަ ސްޓޯރޭޖުތައް ކަމަށް ވެސް ކަސްޓަމްސްގެ ބަޔާނުގައި ބުނެފައިވެއެވެ.

"ޓޫރިސްޓުން އުޅޭ ސަރަހައްދުތަކާއި ރިސޯޓުތަކުގެ ކޮޓަރިތައް ބަލައި ފާސްކޮށްފައި ނުވާނެއެވެ. މިތަކެތި ކަސްޓަމްސްގެ ބެލުމުގެ ދަށަށް ގެނައުމުގައި އެއްވެސް ވަރަކަށް ބާރުގެ ބޭނުންކޮށްފައި ނުވާނެއެވެ. އަދި އެތަންތަނުގައި ހުރި ހުރިހާ ބަނގުރަލެއް ކަސްޓަމްސްގެ ބެލުމުގެ ދަށަށް ގެނައުމުގެ ބަދަލުގައި، ކަސްޓަމްސްގެ ބެލުމުގެ ދަށަށް ގެނެވެނީ ޤާނޫނާއި ގަވާއިދާ ޚިލާފަށް އެތަންތަނަށް ގެންގޮސްފައިވާ ކަމަށް ތުހުމަތު ކުރެވޭ ތަކެތި އެކަންޏެވެ" ބަޔާނުގައިވެއެވެ.

ޤާނޫނު ތަންފީޒް ކުރުމަށްޓަކައި ކަސްޓަމްސް އިން ކުރަމުންދާ މަސައްކަތްތައް ވަކި ބައެއްގެ ސިޔާސީ މަޤްސަދު ހާސިލް ކުރުމަށްޓަކައި، ރައްޔިތުންގެ މެދުގައި ނަފުރަތު އުފެދޭ ގޮތަށް ދޮގު ޚަބަރު ފަތުރައި، ޤާނޫނުގައި ސާފުކޮށް ބަޔާންކޮށްފައިވާ ކުށެއް އެއީ ކުށެއް ނޫން ކަން ޢާންމު ރައްޔިތުންނަށް ވިސްނައި ދިނުމަށްޓަކާ ބައެއް ފަރާތްތަކުން ކުރަމުންދާ މަސައްކަތްތައް ހަރުކަށި ޢިބާރާތުން ކުށްވެރިކުރާ ކަމަށް ވެސް ކަސްޓަމްސްގެ ބަޔާނުގައި ބުނެފައިވެއެވެ. އަދި ރާއްޖޭގައި ހިންގާ ވިޔަފާރި އާއި އިޤްތިސާދީ ޙަރަކާތްތަކަށް އަބަދު ވެސް އެއްބާރުލުން ދީ ވިޔަފާރިއަށް ފަހި އަދި ލުއިފަސޭހަ މާޙައުލެއް ޤާއިމުކޮށް ދިނުމަށް ކުރާ މަސައްކަތުގައި ކަސްޓަމްސް ދެމި އޮންނާނެ ކަމަށް ވެސް ބަޔާނުގައި ބުނެފައިވެއެވެ.