އެމެރިކާގެ ނައިބު ރައީސް ޕެންސް، މިސްރަށް ވަޑައިގެންފި
20 ޖެނުއަރީ 2018 | ހޮނިހިރު 18:31އެމަނިކުފާނު މިސްރަށް ވަޑައިގެންނެވީ، މެދުއިރުމައްޗަށް ކުރައްވާ ދަތުރުފުޅުގެ ފުރަތަމަ މަންޒިލެއްގެ ގޮތުގައި
އެމެރިކާ ނައިބު ރައީސް ޕެންސް (ކ) އަދި އެމެރިކާގެ ރައީސް ޓްރަމްޕް
އެމެރިކާގެ ނައިބު ރައީސް މައިކް ޕެންސް މެދުއިރުމަތީގެ ގައުމުތަކަށް ކުރައްވާ ދަތުރުފުޅުގައި، އެމަނިކުފާނުގެ ފުރަތަމަ މަންޒިލެއްގެ ގޮތުގައި މިސްރަށް ވަޑައިގެންފިއެވެ.
ނައިބު ރައީސް މައިކް ޕެންސް މެދުއިރުމަތީގެ ގައުމުތަކަށް ވަޑައިގަންނަވާއިރު، މިއީ ގުދުސްއަކީ އިސްރާއީލްގެ ވެރިރަށް ކަމަށް އެމެރިކާ އިން ގަބޫލު ކުރާކަން މިދިޔަ އަހަރު ޑިސެމްބަރު މަހު އިއުލާން ކުރުމަށް ފަހު، މެދު އިރުމައްޗަށް ވަޑައިގަންނަވާ އެމެރިކާގެ އެންމެ އިސް އޮފިޝަލެވެ.
މިސްރުގެ ވެރިރަށް ގާހިރާ އަށް ނައިބު ރައީސް މައިކް ޕެންސް ވަޑައިގެންނެވީ ހޮނިހިރު ދުވަހުއެވެ. އެމަނިކުފާނު މިސްރުގެ ރައީސް އަބްދުލް ފައްތާހު އަލް-ސީސީ އާ ވެސް ބައްދަލު ކުރައްވާނެއެވެ. ހަތަރު ދުވަހުގެ މުއްދަތައް އެމެރިކާގެ ނައިބު ރައީސް މެދުއިރުމައްޗަށް ވަޑައިގެންނެވިއިރު، މިސްރަށް ފަހު ނައިބު ރައީސް ޕެންސް، ޖޯޑަން އަދި އިސްރާއީލަށް ވެސް ވަޑައިގަންނަވާނެއެވެ. ނައިބު ރައީސް ޕެންސް އިސްރާއީލަށް ކުރައްވާ ދަތުރުފުޅުގައި އިސްރާއީލުގެ ބޮޑު ވަޒީރު ބެންޔަމިން ނަތަންޔާހޫ އާ ބައްދަލުކުރެއްވުމުގެ އިތުރުން އިސްރާއީލުގެ ގާނޫނު ހަދާ މަޖިލީހުގައި ތަގުރީރުވެސް ކުރައްވާނެއެވެ. އަދި ޖޯޑަން އަށް ނައިބު ރައީސް ކުރައްވާ ދަތުރުފުޅުގައި އެގައުމުގެ ރަސްގެފާނު އަބްދުﷲ އާ ވެސް ބައްދަލު ކުރައްވާނެއެވެ.
ނައިބު ރައީސް ޕެންސް މެދުއިރުމައްޗަށް ވަޑައިގަންނަވާއިރު، މި ދަތުރުފުޅު ކުރީގައި ޝެޑިއުލް ކުރެވިފައި އޮތީ މިދިޔަ ޑިސެމްބަރު މަހަށް ކަމަށްވާއިރު، އޭރު ނައިބު ރައީސް ޕެންސް މެދުއިރުމައްޗަށް ވަޑައިނުގެންނެވީ އެމެރިކާ އިން ގުދުސް އަކީ އިސްރާއީލުގެ ވެރިރަށް ކަމަށް ބަލައިގަތުމުން އުފެދުނު ފާޑުކިޔުންތަކާ ގުޅިގެންނެވެ.
ގުދުސްއަކީ އިސްރާއީލްގެ ވެރިރަށް ކަމަށް އެމެރިކާ އިން ގަބޫލު ކުރާކަން އިއުލާން ކޮށްފައި ވަނީ މިދިޔަ ޑިސެމްބަރު މަހު 6 ގައެވެ. އިސްރާއީލާއި ފަލަސްތީނާ ދެމެދު ސުލްހައިގެ މަގެއް ހޯދުމަށް ކުރެވެމުންދާ މަސައްކަތުގައި އެންމެ ނާޒުކު އަދި އުނދަގޫ މައްސަލައަކަށް ޖެރޫސަލަމްގެ މައްސަލަވެފައި ވަނިކޮށް، ޖެރޫސަލަމްއަކީ އިސްރާއީލުގެ ވެރިރަށް ކަމަށް ގަބޫލު ކުރާކަން އެމެރިކާ އިން އިއުލާން ކުރުމުން މައްސަލަ އިތުރަށް މިވަނީ ގޯސްވެފައެވެ. އެމެރިކާގެ މި ނިންމުމާއެކު މައްސަލައެއް ހައްލެއް ހޯދުމަށް އެމެރިކާ އިން އަދާކުރަމުން ދިޔަ މެދުވެރިއެއްގެ ދައުރު ވެސް މިވަނީ ނިމުމަކަށް އައިސްފައެވެ.
