ގިނީގައި ސައުދީގެ ޝައިޚަކު މަރާލައިފި
18 ޖެނުއަރީ 2018 | ބުރާސްފަތި 17:10ޝައިޚް ތްވައިޖްރީ މަރާލާފައިވަނީ އޭނާ ދިން ދީނީ ދަރުސެއްގައި ދެއްކި ހަރުކަށި ވާހަކަތަކަކާއި ގުޅިގެން ކަމަށްވޭ
އައްޝައިޚް ޢަބްދުލްއަޒީޒް ބިން ޢަބްދުލްމުޙުސިން އަލް ތްވައިޖްރީ
ހުޅަނގު އެފްރިކާގެ ޤައުމެއް ކަމަށްވާ ގިނީގައި ސައުދީ އަރަބިއާގެ ޝައިޚެއްގެ ގަޔަށް ބަޑިޖަހައި މަރާލައިފިއެވެ.
އައްޝައިޚް ޢަބްދުލްއަޒީޒް ބިން ޢަބްދުލްމުޙުސިން އަލް ތްވައިޖްރީ މަރާލާފައިވަނީ، ގިނީގެ އުތުރުގެ ސަރަޙައްދުތަކުގައި މިސްކިތް ބިނާކުރުމަށް އެ ޤައުމަށް ގޮސް އުޅުނު މިޝަންއެއްގެ މެންބަރެއްގެ ގޮތުގައި އެ ޤައުމަށް ގޮސް އުޅެނިކޮށެވެ.
ރިޕޯޓްތައް ބުނާގޮތުގައި ޝައިޚް ތްވައިޖްރީ މަރާލާފައިވަނީ ކަންތެބަލަންދޯގޫ ކިޔާ އަވަށެއްގައި ދީނީ ނަސޭހަތް ދިނުމަށް ފަހު އެ އަވަށުގެ މީހަކާއިއެކު ސައިކަލެއްގައި ދަނިކޮށެވެ.
މިކަމާއި ގުޅިގެން މިހާތަނަށް ހާމަކޮށްފައިވާ މަޢުލޫމާތަށް ބަލާއިރު، ޝައިޚް ތްވައިޖްރީއަށް ހަމަލާ ދީފައިވަނީ ދީނީ ނަސޭހަތް ދިންއިރު ޝައިޚް ދެއްކި ވާހަކަތަކަކާއި ގުޅިގެންނެވެ. ދީނީ ހަރުކަށި ވިސްނުމެއް ގެންގުޅޭ ޝައިޚް ތްވައިޖްރީގެ ދީނީ ނަސޭހަތުގައި ދައްކާފައިވަނީ ޝިކާރަކުރުމާއި ގުޅޭ ވާހަކަތަކެކެވެ. ކަންތެބަލަންދޯގޫ އަވަށަކީ ޒަމާނުއްސުރެ ޝިކާރަކުރުމަށް މަޝްހޫރު އަވަށެވެ.
85 އިންސައްތަ މުސްލިމު އާބާދީއެއް އޮންނަ ގިނީގައި 1990 ގެ އަހަރުތަކުއްސުރެ ދީނީ ހަރުކަށި ފިކުރު ފެތުރި، އެ ފިކުރަށް އޮންނަ ތާޢިދު ބޮޑުވި ނަމަވެސް، އެ ޤައުމުގެ އާދަކާދަ އާއި ޡަޤާފަތާއި ގުޅިފައިވާ ބައެއް ކަންކަމާއި ދެކޮޅު ފަރާތްތަކަށް މީގެ ކުރިންވެސް މިފަދަ ހަމަލާތައް ދީފައިވާ ކަމަށް ރިޕޯޓްތައް ބުނެއެވެ.
