ޗައިނާ ތެޔޮ ޓޭންކަރު އެކްސިޑެންޓް: 100 ކިލޯ މީޓަރަށް ވަނީ ތެޔޮފެތުރިފައި
ތެޔޮ ޓޭންކަރުގައި 136،000 ޓަނުގެ އަލްޓްރަ-ލައިޓް ކްރޫޑް އޮއިލް ހުރި
ޓޭންކަރު ގޮވައި އަޑިޔަށް ދިއުމުގެ ކުރިން ހަފްތާއެއްހާ ދުވަސްވަންދެން އަނދާފައިވޭ
ޗައިނާގެ ކަނޑުގެ ސަރަހައްދަށް އަޑިޔަށްދިޔަ އިރާނުގެ ތެޔޮ ޓޭންކަރުން ބޭރުވި ތެލުން ހަތަރު ބަޔަކަށް ބެހިފައިވާ ތެޔޮގަނޑުތަކެއް ކަނޑުމަތީގައި އުފެދިފައިވާއިރު 100 ކިލޯ މީޓަރަށް އެ ތެޔޮގަނޑުތައް ފެތުރިފައިވާކަމަށް ޗައިނާގެ އިދާރާތަކުން ބުނެފިއެވެ.
ސަންޗީގެ ނަން ދީފައިވާ މި ޓޭންކަރު ޖެނުއަރީ މަހުގެ 6 ވަނަ ދުވަހު ޝަންހާއީއާއި 260 ކިލޯމީޓަރު ދުރުން އަޑިޔަށް ގޮސްފައިވަނީ ކާގޯ ބޯޓެއްގައި ޖެހިއެވެ.
ތެޔޮ ޓޭންކަރުގައި އޭރު 136،000 ޓަނުގެ އަލްޓްރަ-ލައިޓް ކްރޫޑް އޮއިލް ހުރިކަމަށް ވެއެވެ.
އާދީއްތަ ދުވަހު ޓޭންކަރު ގޮވައި އަޑިޔަށް ދިއުމުގެ ކުރިން ހަފްތާއެއްހާ ދުވަސްވަންދެން އަނދާފައިވެއެވެ.
ޓޭންކަރުގެ 32 ކުރޫއިން މަރުވެފައިވާކަމަށްވަނީ ބެލެވިފައެވެ.
މީގެ ކުރިން ސެޓެލައިޓް ފޮޓޯތަކުން ފެނިފައިވާ ގޮތުގައި އޮތީ ދެ ތެޔޮގަނޑެކެވެ. ނަމަވެސް ޗައިނާގެ ސްޓޭޓް އޯޝެނިކް އެޑްމިނިސްޓްރޭޝަނުން ފަހުން ހާމަކުރި މައުލޫމާތަށްބަލާއިރު ތެޔޮ ފެތުރިފައިވާ ސަރަހައްދު ބޮޑެވެ.
ބޯޓުގައި އުފުލާފައިވާ ތެލާއި އަދި ބޯޓްގެ ބޭނުމަށް ބޯޓުގައި ހުރި ތެޔޮ އެކުވުމުން ކަނޑުގެ ދިރުމަށް ބޮޑެތި ގެއްލުންތަކެއް ލިބިގެންދާނެއެވެ.
ޓޭންކަރު އުފުލަމުން ދިޔައީ ކޮންޑެންސޭޓް ތެޔޮ ކަމަށްވާއިރު މިއީ އާއްމުކޮށް އުފުލާ ސާފު ނުކުރާ ތެލަށް ވުރެ ލީކުވެއްޖެ ނަމަ ތިމާވެއްޓަށް ނުރައްކާ ބާވަތެކެވެ.
ޕެނަމާގައި ރަޖިސްޓްރީކޮށްފައިވާ މި ބޯޓަކީ އީރާނުގެ ކުންފުންޏެއްގެ ބޯޓެކެވެ.
