އެވަރޓަންއަށް ވޮލްކޮޓް ސޮއިކޮށްފި

އާސެނަލްއަށް ކުޅުނު ފޯވަޑް ތިއޯ ވޮލްކޮޓް 20 މިލިއަން ޕައުންޑްގެ އެއްބަސްވުމެއްގެ ދަށުން ތިން އަހަރާއި ބައިގެ ކޮންޓްރެކްޓެއްގައި އެވަރޓަންއާ އެކު ސޮއިކޮށްފިއެވެ.

މިއީ އެވަރޓަން އިން ޖެނުއަރީ ޓްރާންސްފަރ ވިންޑޯގައި ގަތް ދެ ވަނަ ކުޅުންތެރިޔާއެވެ. އެވަރޓަން އިން ވަނީ ތުރުކީވިލާތުގެ ބެސިކްޓަސްއަށް ކުޅެމުން އައި ޔެންކް ޓޮސުން 27 މިލިއަން ޕައުންޑަށް ގަނެފައެވެ.

މީގެ 12 އަހަރު ކުރިން ސައުތުހެމްޕްޓަން އިން އާސެނަލްއާ ގުޅުނު 28 އަހަރުގެ ފޯވާޑް މިސީޒަނުގައި އިނގިރޭސި ޕްރިމިއަރ ލީގުގައި އާސެނަލް އަށް ކުޅެފައި ވަނީ އެންމެ ހަ މެޗެވެ.

ވޮލްކޮޓްގެ ސޮއި ހޯދުމަށް އޭނާގެ ކުރީގެ ކްލަބު ސައުތެމްޕްޓަން އިން ވެސް މަސައްކަތް ކޮށްފައިވެއެވެ.

އާސެނަލް އަށް 397 މެޗު ކުޅެ، 108 ލަނޑު ޖަހައިދީފައިވާ ވޮލްކޮޓާއި އާސެނަލްގެ ކޯޗު އާސެން ވެންގާއާ ދެމެދު ޚިޔާލުތަފާތުވުންތަކެއް އުފެދިފައިވާ ކަމުގެ އަޑުތަކެއް ފެތުރިފައިވެއެވެ.

އާސެނަލްއާ އެކު ވޮލްކޮޓް ހަދާފައިވާ އެއްބަސްވުމުގައި ބާކީ 18 މަސް ދުވަސް އޮތްއިރު، އާސެނަލްގެ ކޯޗު އާސެން ވެންގާ ވަނީ، ވޮލްކޮޓް އެޓީމުގައި މަޑު ކުރުމަށް އެދޭ ކަމަށް ބުނެފައެވެ. އެހެން ނަމަވެސް އޭނާ އަށް އެކްލަބުގެ ފުރަތަމަ އެގާރައިން ޖާގަ ދޭނެ ކަމުގެ އިޝާރާތެއް ވެންގާ ދީފައެއް ނުވެއެވެ.

އެވަޓަންގެ ކޯޗު ސެމް އެލާޑީސް ވަނީ، ވޮލްކޮޓަކީ އެކްލަބުގެ ސްކޮޑަށް އިތުރު ކުރަން އެންމެ ރަނގަޅު އެއް ކުޅުންތެރިޔާ ކަމަށާއި، އޭނާއަކީ އިދިކޮޅު ޓީމްތަކުގެ ގޯލަށް ނުރައްކާ ކުރާނެ ކުޅުންތެރިޔެއް ކަން ފާހަގަކޮށްފައެވެ.

ވޮލްކޮޓް ވިއްކާލުމަށް ފަހު ލިބޭ ފައިސާއިން އާސެނަލް އިން ބޭނުން ވަނީ ޖަރުމަނުގެ ބޮރޯޝިއާ ޑޯޓްމުންޑަށް ކުޅޭ ޕިއޭ އެމެރިކް އައުބަމެޔަންގ އަދި ފްރާންސް ބޯޑޯގެ ގޯވާޑް މަލްކޮމް ގެނައުމަށެވެ.

އާސެނަލްއިން ނެރުނު ބަޔާނެއްގައި ބުނީ ތިޔޯ ވޮލްކޮޓަށް ރަނގަޅު ކުރިމަގަކަށް އެދޭ ކަމަށާއި، އާސެނަލްގައި ހޭދަކުރި ދުވަސްތަކުގައި ކުރި މަސައްކަތަށް ޝުކުރު އަދާކުރާ ކަމަށެވެ.