އެމްއެމްޕީއާރްސީގެ ވައްކަމުގެ މައްސަލައިގެ ކޮޅު ފެންނަންދެން އެވާހަކަ ދައްކާނަން: ޑރ. ޑީޑީ
ނަހަލާލު ފައިސާ ގެއަށް ވެއްދި މީހާގެ މައްސަލަ ބެލޭ ތަނެއްވެސް ނުފެނޭ
އެމްޑީޕީގެ ކުރީގެ ރައީސް އަދި ކުރީގެ ފިޝަރީޒް މިނިސްޓަރ ޑރ. ޑީޑީ
އެމްއެމްޕީއާރްސީ ތެރެއިން ކުރި ވައްކަމުގެ ކޮޅު ފެންނަންދެން އެވާހަކަ ދައްކަވާނެ ކަމަށް އެމްޑީޕީގެ ކުރީގެ ރައީސް ޑރ. އިބްރާހިމް ދީދީ ވިދާޅުވެއްޖެއެވެ.
ގުޅިފައިވާ ޕާޓީތަކުން އެމްޑީޕީ ހަރުގޭގައި ހޯމަ ދުވަހުގެރޭ ބޭއްވި ޖަލްސާގައި ވާހަކަ ދައްކަވަމުން ޑރ. ޑީޑީ ވިދާޅުވީ ރާއްޖޭގެ ރައްޔިތުންގެ ތިޖޫރީ ފޫގޮއްސިކަމަށާއި، ތިޖޫރީ ވަގަށް ނަގައި ހުސްކޮށްފި ކަމަށެވެ. އެހެންކަމުން އެވާހަކަ ދޫކޮށްލެވެން ނެތް ކަމަށެވެ.
"އެމްއެމްޕީއާރްސީގެ ބިޔަ ބޮޑު ވައްކަމުގެ ޙާދިސާއަކީ ރައީސް އަބްދުﷲ ޔާމީނުގެ ވެރިކަމުގައި ހިނގައިދިޔަ ޙާދިސާއެއްކަން އެއީ އަޅުގަނޑު އެކަނި ދައްކާ ވާހަކައެއް ނޫން. ޚުދު އަބްދުﷲ ޔާމީން އަބްދުލްޤައްޔޫމް ވެސް ރައްޔިތުންގެ ކުރިމަތީގައި އިޢުތިރާފްވެފައިވާ ބޮޑު ބިޔަ މައްސަލައެއް،" ޖަލްސާގައި ވާހަކަ ދައްކަވަމުން ޑރ. ޑީޑީ ވިދާޅުވިއެވެ.
ރައީސް ނަޝީދުގެ ސަރުކާރުގައި ފިޝަރީޒް މިނިސްޓަރކަން ކުރެއްވި ޑރ. ޑީޑީ ވަނީ އެމްއެމްޕީއާރްސީ މައްސަލައިގެ ރިޕޯޓް އަދިވެސް އެންޓި ކޮރަޕްޝަން ކޮމިޝަނުން ހާމަކޮށްފައި ނުވާތީ އެކަމަށް ވެސް ފާޑުވިދާޅުވެފައެވެ. "އެ ނަހަލާލު ފައިސާ ގެއަށް ވެއްދި މީހާގެ މައްސަލަ ބެލޭ ތަނެއް ވެސް ނުފެނޭ"ކަމަށް ވިދާޅުވެ، އެމައްސަލަ ކުރިއަށް ނުދާތީ ޑރ. ޑީޑީ ވަނީ ކަންބޮޑުވުން ފާޅުކުރައްވާފައެވެ. ޚާއްސަގޮތެއްގައި ރައީސް ޔާމީންގެ އެކައުންޓަށް އެސްއޯއެފް ގެ އެކައުޓުން ޖަމާކުރި ފައިސާއަށް ވީގޮތް ވެސް އަދިވެސް އެނގިފައި ނުވާތީ އެކަމާއި ކަންބޮޑުވުން ފާޅުކުރެއްވިއެވެ.
"މިމައްސަލަ ބެލޭތަނެއް ނާދޭ. މިމައްސަލަ ބަލާނެ މުއައްސަސާއެއް މިޤައުމަކު ނެތް. އެހެންވީމާ، ރައްޔިތުންގެ ޒިންމާއެއް އެބައޮތް. މިއަދު މިރާއްޖޭގެ ވެރިކަމުގައި ހިނގަމުންދާ އެކިއެކި ޖަރީމާތަކަށް އަދަބު ދިނުމުގެ ހައްޤު، އަދަބު ދިނުމުގެ މިނިވަންކަން ރައްޔިތުންނަށް އެބައޮތް. އެ އަދަބު ދޭނެ އިރާދަކުރެއްވިއްޔާ. ރިޔާސީ އިންތިޚާބުގައި އަބްދުﷲ ޔުާމީނަށް އަދަބު ދޭނެ. ބޮޑުތަނުން އެމަނިކުފާނު ބަލިކޮށް، ވޯޓުން ތަޅާތިރިކުރާނެ" ޑރ. ޑީޑި ވިދާޅުވިއެވެ.
ގުޅިފައިވާ ޕާޓީތަކުން ކުރަމުންދާ މަސައްކަތްތަކާއި ގުޅޭގޮތުން ވާހަކަ ދައްކަވަމުން ޑރ. ޑީޑީ ވިދާޅުވީ ގުޅިފައިވާ ޕާޓީތަކުން ނެރޭ ކެންޑިޑޭޓަށް އިންތިޚާބުގައި ވާދަކުރެވޭނެކަމުގެ ފުރިހަމަ ޔަޤީންކަން އެބައޮތް ކަމަށެވެ. އަދި ގުޅިފައިވާ ޕާޓީތަކުން ކުރަމުންދާ މަސައްކަތްތަކުގައި މިހާރު ވެސް ކާމިޔާބީތައް ލިބެމުންދާކަން ފާހަގަ ކުރެއްވިއެވެ. ޑރ. ޑީޑީ ވިދާޅުވީ ގުޅިފައިވާ ޕާޓީތަކުން ރިޔާސީ ކެންޑިޑޭޓް ވަރަށް އަވަހަށް ނެރޭނެ ކަމަށާއި، އެއާއެކު ކެމްޕޭން މެކުހަށް ޖަހާފައި ކުރިއަށްދާނެ ކަމަަށެވެ. ކިތަންމެ ހަނި ދޭތެރެއަކުން ފުރުސަތު ލިބުނުކަމުގައި ވިޔަސް، ރައީސް ނަޝީދުގެ ނަންފުޅު މިއަހަރުގެ ރިޔާސީ އިންތިޚާބުގެ ވޯޓު ކަރުދާސްކޮޅުގައި އޮންނާނެ ކަމަށާއި، އެކަމާއިމެދު ޝައްކުކުރާނެ ޖާގައެއް ނެތް ކަމަށް ޑރ. ޑީޑީ ވިދާޅުވިއެވެ.
"ކިތަންމެ ބިރެއް ދެއްކިޔަސް، ކިތަންމެ ސިޓީ އުރައެއް ބެހިޔަސް، ދިވެހި ރައްޔިތުން މިތިބީ ފަހަތަށް ޖެހޭ ގޮތަކަށް ނޫން. ސިވިލް ސަރވިސްގެ މުވައްޒަފުންގެ މުސާރަ ބޮޑުކުރާ ނަމުގައި މިއަހަރުގެ ބަޖެޓްގައި ކޮންމެވެސް އަދަދެއް ހިމަނުއްވާފައި އޮތް ވާހަކައެއް މައުލޫމާތު ލިބޭ. އެކަމަކު އެބޭފުޅުން އެދައްކާހާ ދަޅައަށް ހެއްލިގެން މިރާއްޖޭގައި މިހިނގާ ވައްކަމާއި، ކޮރަޕްޝަނާއި އަނިޔާވެރިކަމަށް އާނއެކޭ ބުނެގެން ތިބޭކަށް އެބޭފުޅުންނެއް ވެސް ނެތް. އަދި ވެން މަސް ވެނަށް ކާންދޭ އުޞޫލުން އެބޭފުޅުންގެ އިތުރު ގަޑީގެ ފައިސާކޮޅު ކަނޑާލާފައި، ކަނޑާލި އަދަދަށް ވުރެ މަދު އެތިކޮޅެއް މުސާރަށް އިތުރުކުރީމާ އެއީކީ ހެޔޮފުޅުކަމުން ކޮށްދޭ މުސާރަ ބޮޑުކުރުމެއް ކަމަކަށް އެބޭފުޅުންނެއް ބަަލައެއް ނުގަނޭ،" ސިވިލް ސަރވިސްގެ މުސާރަ ބޮޑުުކުރުމާއި ގުޅޭގޮތުން ސަރުކާރުން ދައްކާ ވާހަކަތަކަށް އިޝާރާތްކުރައްވައި ޑރ. ޑީޑީ ވިދާޅުވިއެވެ.
ރައީސް ޔާމީންގެ ސަރުކާރަށް 4 އަހަރުވީ އިރުވެސް، އެމަނިކުފާނުގެ ސަރުކާރުން ފެއްޓި އެއްވެސް ތަރައްޤީގެ މަޝްރޫޢެއް ފެންނަން ނެތް ކަމަށް ޑރ. ޑީޑީ ވިދާޅުވިއެވެ.
