ވަރލްޑް ބޭންކު އިންސާފުވެރި ނޫންކަމަށް ބުނެ ޗިލީއިން ޝަކުވާ ކޮށްފި

ވަރލްޑް ބޭންކުން ޗިލީއާއިމެދު އިންސާފެއް ނެތި އެތައް އަހަރެއްވަންދެން އަމަލު ކޮށްފައިވާކަމަށް އެ ގައުމުގެ އޮފިޝަލަކު ތުހުމަތު ކުރައްވައިފިއެވެ.

ފޮރިން މިނިސްޓަރ ހެރަލްޑޯ މުނޯޒް ކުރައްވާފައިވާ ޓްވީޓެއްގައި ވިދާޅުވީ ފޭކް ޚަބަރުތައް ފޭކް ތަފާސް ހިސާބަށް ބަދަލުވަމުންދާ ކަމަށެވެ. ޗިލީގެ ފޮރިން މިނިސްޓަރ އިޝާރާތް ކުރައްވާފައިވަނީ ވަރލްޑް ބޭންކްގެ ޗީފް އިކޮނޮމިސްޓް ޕޯލް ރޯމަރ ވިދާޅުވި ވާހަކަ ފުޅަކަށެވެ.

ރޯމަރ ވިދާޅުވެފައި ވަނީ ސިޔާސީ ބޭނުމަށް ޗިލީގައި ވިޔަފާރީގެ ހާލަތު ދަށްކަމަށް ދެއްކުމަށް މައުލުމާތަށް ބަދަލުގެނެސްފައިވާކަމަގެ ނިޝާންތައް ފެންނަ ކަމަށެވެ.

ވަރލްޑް ބޭންކުންވަނީ ތަހުގީގެއް ހިންގުމަށް ގޮވާލާފައެވެ.

ޗިލީގެ ނޫހެއް ކަމަށްވާ އެލް މާކިޔުރިއޯއަށް ދެއްވާފައިވާ އިންޓަރވިއުއެއްގައި ވަރލްޑް ބޭންކްގައި ގައުމުތައް ރޭންކް ކުރުމުގައި އިސްކޮށް ހުންނަވާ އޮގަސްޓޯ ލޮޕެޒް –ކާލޮސް ވިދާޅުވީ މެތޮޑޮލޮޖީއަށް ގެނެވޭ ބަދަލުތައް ގެނެވެނީ ދެފުށް ފެންނަ އަދި ހުޅުވާލެވިފައިވާ ގޮތެއްގެ މަތިން ކަމަށެވެ. އަދި ސިޔާސީ ގޮތުން ވަކިފަރާތަކަށް ބުރަވެފައިވާ ކަމަށް ބުނާ ވާހަކަ ވަނީ ދޮގުކުރައްވާފައެވެ.

ޗިލީ ހިމެނެނީ ވަރލްޑް ބޭންކުގެ"ޑުއިންގް ބިޒްނަސް" ކޮމްޕެޓިޓިވްނަސް ރޭންކިންގައި 190 ގައުމުގެ ތެރެއިން 55 ވަނައިގައެވެ.

މި ރޭންކިންގއަށް ބަލާއިރު 2014 ވަނަ އަހަރު އެގައުމުގެ މިހާރުގެ ރައީސް މިޝޭލް ބަޗްލޭ މަގާމަށް ވަޑައިގެންނެވިއިރު އެ ގައުމު އޮތީ 34 ވަނައިގައެވެ.