ރައީސް ޓްރަމްޕް އަށް އެމަނިކުފާނުގެ ނަފްސާނީ ދުޅަހެޔޮކަމާ ބެހޭ ޓެސްޓެއް ހައްދަވަން ކެރިވަޑައިގަންނަވާނެބާ؟

އެމެރިކާގެ ރައީސްކަމަށް ޑޮނަލްޑް ޓްރަމްޕް ވަޑައިގެންނެވި ފަހުން ހެއްދެވި ފުރަތަމަ މެޑިކަލް ޓެސްޓް ހުކުރު ދުވަހު އެމަނިކުފާނު ހައްދަވައިފިއެވެ.

ރައީސް ޓްރަމްޕް އެމަނިކުފާނު މެޑިކަލް ޓެސްޓެއް ހެއްދެވިއިރު ރައީސް ޓްރަމްޕްގެ ނަފްސާނީ ދުޅަހެޔޮކަމާ މެދު ބައެއް ފަރާތްތަކުން ދަނީ ސުވާލު އުފައްދަމުންނެވެ. އަދި އެމަނިކުފާނުގެ ސިއްހީ ހާލުކޮޅު މިހާރު ހުރީ ރައީސްކަމުގެ މަގާމު އަދާނުކުރެއްވޭ ހާލަތެއްގައި ކަމަށް ބައެއް ފަރާތްތަކުން ދަނީ ބުނަމުންނެވެ. އެ ފަރާތްތަކުން އެމޭރުމުން ވާހަކަ ދައްކަމުން ދަނީ ސަރުކާރުގެ ސިޔާސަތުތަކާ މެދު އެކި ފަހަރު އެކި ގޮތްގޮތަށް ރައީސް ޓްރަމްޕް ވާހަކަފުޅު ދައްކަވާތީ އާއި ދާދި ފަހުން ރައީސް ޓްރަމްޕް ދެއްކެވި ވާހަކަފުޅެއްގައި އެމަނިކުފާނު އަޅައަޅައިގެން ބައެއް ބަސްތައް ވިދާޅުވުމާ ގުޅިގެންނެވެ.

ތަފާތު ވާހަކައަކަށް ބަލާލަމާތޯއެވެ. އެމެރިކާގެ ރައީސް ޑޮނަލްޑް ޓްރަމްޕާ ބެހޭ ގޮތުން ދާދިފަހުން ލިޔެފައިވާ ފޮތެއްގައި އެ މަނިކުފާނަކީ "ކުޑަކުއްޖެއް"ގެ ގޮތުގައި އެމަނިކުފާނުގެ މުވައްޒަފުން ދެކޭ ކަމަށް ވަނީ ލިޔެފައެވެ. "ފަޔަރ އެންޑް ފިޔުރީ: އިންސައިޑް ދި ޓްރަމްޕް ވައިޓް ހައުސް" އަކީ 200 އިންޓަވިއުއެއްގެ މައްޗަށް ބިނާކޮށް މައިކަލް ވުލް ލިޔުއްވާފައިވާ ފޮތެކެވެ. ރައީސް ޓްރަމްޕް ވިދާޅުވެފައި ވަނީ އެ ފޮތަކީ "ދޮގުން ފުރިގެންވާ" ފޮތެއް ކަމަށެވެ. ފޮތުގެ ވާހަކަތަކާ ގުޅިގެން ރައީސް ޓްރަމްޕް ގެ ސެކްރެޓަރީ އޮފް ސްޓޭޓް ރެކްސް ޓިލާސަން ވިދާޅުވީ ރައީސް ޓްރަމްޕްގެ ނަފްސާނީ ދުޅަހެޔޮކަމާމެދު އެމަނިކުފާނު ހިތްޕުޅުގައި ސުވާލެއް ނުއުފެދޭ ކަމަށެވެ.

ކޮންމެއަކަސް ރައީސް ޓްރަމްޕްގެ ފުރަތަމަ މެޑިކަލް ޓެސްޓް ހުކުރު ދުވަހު އެމަނިކުފާނު ހައްދަވާފައިވާއިރު އެ ޓެސްޓުގެ ނަތީޖާ އަކީ ކޮބައިތޯއެވެ. އެ ޓެސްޓުން ހާމަވީ ރައީސް ޓްރަމްޕް ހުންނެވީ "ވަރަށް ރަނގަޅު ސިއްހަތެއްގައި ކަމެވެ." މެރީލޭންޑް ސްޓޭޓްގެ ބިތީސްޑާގައި ހުންނަ ވޯލްޓާ ރީޑް ނެޝެނަލް މިލިޓަރީ މެޑިކަލް ސެންޓަރުގައި ތިންގަނޑިއެއްހާ އިރަށް ރައީސް ޓްރަމްޕް، އަސްކަރީ ޑޮކްޓަރުންނާ އެކު މެޑިކަލް ޓެސްޓް ހެއްދެވުމަށްޓަކައި ހޭދަ ކުރެއްވިއިރު، އެ ޓެސްޓާ ބެހޭ ގޮތުން ވައިޓް ހައުސްގެ ޑޮކްޓަރު ރޮނީ ޖެކްސަން ވިދާޅުވީ ޓެސްޓް ދިޔައީ "ވަރަށް ރަނގަޅަށް ކަމަށެވެ."

މުހިންމު ނުކުތާ އަކީ މިއީއެވެ. ރައީސް ޓްރަމްޕް ހެއްދެވި އެމަނިކުފާނުގެ މެޑިކަލް ޓެސްޓުގައި އެމަނިކުފާނުގެ ނަފްސާނީ ދުޅަހެޔޮކަން ވަޒަން ކުރާ އެއްވެސް ޓެސްޓެއް ނުވަތަ ސައިކިއެޓްރިކް ޓެސްޓެއް ނުހިމެނެއެވެ. އެކަން ޓެސްޓުގެ ކުރިން ވައިޓް ހައުސް އިން ވެސް ވަނީ ކަށަވަރު ކޮށްދެއްވާފައެވެ. ފާޑުކިޔާފަރާތްތަކުން ސުވާލު ކުރަމުން ދަނީ ރައީސް ޓްރަމްޕުގެ ނަފްސާނީ ދުޅަހެޔޮކަމާއެވެ. އެމަނިކުފާނުގެ ޖިސްމާނީ ދުޅަހެޔޮކަމަކާ ނޫނެވެ. ސުވާލަކީ ރައީސް ޓްރަމްޕް އަށް އެމަނިކުފާނުގެ ނަފްސާނީ ދުޅަހެޔޮކަމާ ބެހޭ އެއްވެސް ޓެސްޓެއް ހައްދަވަން ކެރިވަޑައިގަންނަވާނެތޯއެވެ. މިހާތަނަށް އެމެރިކާގެ އެއްވެސް ރައީސަކު އެ ރައީސެއްގެ ނަފްސާނީ ދުޅަހެޔޮކަމާ މެދު ރައީސްކަމުގެ ދައުރުގައި ޓެސްޓެއް ހެއްދެވި ކަމެއް އެނގިފައެއް ނުވެއެވެ.