ވަރަށް ލޯބިން، "ވަކިން ލޯބިން"ގެ ބޮޑުބައި ނިންމާލައިފި

ޑާކް ރެއިން އެންޓަރޓެއިންމަންޓްއިން މިހާރު އުފައްދަމުންދާ ފިލްމު، ވަކިން ލޯބިންގެ ބޮޑުބައި ޝޫޓްކޮށް ނިމިފައިވާކަމަށް ފިލްމުގެ އެއް ޕްރޮޑިއުސަރ މުޙައްމަދު އަލީ (މޮގަރ) ބުނެފިއެވެ.

ރާއްޖޭގެ އެންމެ ކާމިޔާބު އެއް ސްޓޫޑިއޯގެ ގޮތުގައި ގިނަ ބަޔަކު ޤަބޫލުކުރާ ޑާކް ރެއިންއިން ނިމިގެންދިޔަ އޯގަސްޓް މަހުގެ 9 ވަނަ ދުވަހު ޝޫޓިންގ ފެށި މި ފިލްމުގެ މަސައްކަތާއި ގުޅޭގޮތުން ރާއްޖެއެމްވީއާއި ވާހަކަދައްކަމުން މޮގަރ ބުނީ، ފިލްމުގެ 60 އިންސައްތަ މިޙާރު ޝޫޓްކޮށް ނިމިފައިވާ ކަމަށެވެ.

މޮގާ ބުނީ ޑާކް ރެއިންގެ އެހެން ފިލްމުތަކެކޭވެސް އެއްގޮތަށް މި ފިލްމުވެސް އުފައްދަމުންދަނީ ބެލުންތެރިންނަށް ކަމުދާނެ އެކި ރަހަތަށް ހިމަނައިގެން ކަމަށެވެ.

"ޑާކް ރެއިންގެ ހުރިހާ ފިލްމެކޭވެސް އެއްގޮތަށް ވަކިން ލޯބިންވެސް މި ހަދަނީ ވަރަށް ލޯބިން، ބެލުންތެރިންނަށް ކަމުދާނެ ރަހަތަށް ހިމަނައިގެން. ޑާކް ރެއިންއިން ހިފަހައްޓަމުން އަންނަ ރަނގަޅު ކޮލިޓީ މި ފިލްމުންވެސް ފެންނާނެ"

ޒުވާން ދެމަފިރިންގެ ކައިވެނި ރޫޅިގެންދިއުމުން، އެ ދެމީހުންނާއި، އެމީހުންގެ ދިރިއުޅުމާއި ގުޅިފައިވާ ފަރާތްތަކުގެ ހަޔާތަށް ކުރިމަތިވެގެންދާ ކަންތައްތައް ދައްކައިދޭ މި ފެމިލީ ޑްރާމާގެ މައި ރޯލުތަކުން ފެނިގެންދާނީ ޖުމައްޔިލް ނިމާލް (ޖުމަލް) އާއި މަރިޔަމް މަޖުދާ (މަޖޫ) ގެ އިތުރުން ނުޒުހަތު ޝުއައިބް (ނުޒޫ) އެވެ. މީގެ ތެރެއިން ޖުމައްޔިލް ފެނިގެންދާނީ އަޒާންގެ ނަންދީފައިވާ ކެރެކްޓަރއަކުންނެވެ. އަދި މަޖޫ ފެނިގެންދާނީ ނުހާގެ ނަން ދީފައިވާ ކެރެކްޓަރއަކުންނެވެ.

މީގެ އިތުރުންވެސް މި ފިލްމުގައި ގިނަ ފަންނާނުންތަކެއް ފެނިގެންދާއިރު އޭގެ ތެރޭގައި ޑާކްރެއިންގެ ފިލްމުތަކުން އާންމުކޮށް ފެންނަ ފަންނާނުންވެސް ހިމެނެއެވެ.

ވަކިން ލޯބިން އަކީ އައިޝަތު ފުއާދް ތައުފީގް އޭނާގެ ވާހަކައަކަށް ލިޔެފައިވާ ސްކްރީންޕްލޭއަކަށް އުފައްދާ ފިލްމެކެވެ. މޮގަރ އާއި އެކު މި ފިލްމު ޕްރޮޑިއުސް ކުރަނީވެސް އައިޝަތު ފުއާދް ތައުފީގެވެ. ޑާކް ރެއިންގެ ގިނަ ފިލްމުތަކެކޭ އެއްގޮތަށް މި ފިލްމުވެސް ޑައިރެކްޓް ކުރަނީ އަލީ ޝިފާއު (ޗިއްޕެ) އެވެ. އަދި ފިލްމުގެ ސިނަމަޓޯގްރަފީ އާއި ކެމެރާ ކުރުމުގެ މަސައްކަތް ކުރަމުންދަނީ ޗިއްޕެ އާއި އަޙުމަދު ޝިނާންއެވެ.

ވަކިން ލޯބިން ރިލީޒް ކުރުމަށް ހަމަޖެހިފައިވަނީ އަންނަ އަހަރުގެ މާޗް މަހުގެ 5 ވަނަ ދުވަހުއެވެ.