ސައުދީ ފުޓްބޯޅައިގެ ތާރީހުގައި އެންމެ ފުރަތަމަ ފަހަރަށް މެޗެއް ބެލުމަށް އަންހެނުން ދަނޑަށް ވަދެއްޖެއެވެ.
ޕްރިންސް އަބްދުﷲ ބިން ފައިސަލް އަލް ސައުދް 1956 ވަނަ އަހަރު ސައުދީގެ ފުޓްބޯޅަ ފެޑެރޭޝަން އުފެއްދުމަށް ފަހު މިދިޔަ ހުކުރު ދުވަހާ ހަމަޔަށް އެ ގައުމުގައި ކުޅޭ އެއްވެސް ފުޓްބޯޅަ މެޗެއް ބެލުމުށް އަންހެންނުނަށް ދަނޑަށް ވަނުމުގެ ހުއްދަ ދީފައެއް ނުވެއެވެ. އެހެން ނަމަވެސް ހުކުރު ދުވަހު ކިންގް ފަހްދު އިންޓަނޭޝަނަލް ސްޓޭޑިއަމްގައި އެ ގައުމުގެ އެންމެ ވާދަވެރި ދެ ޓީމު ކަމަށްވާ އަލް އަހްލީ އާއި އަލް ބަތިން ކުޅުނު މެޗަކާ އެކު މި މަންޒަރު އެއްކޮށް ވަނީ ބަދަލުވެގެން ގޮސްފައެވެ.
މި ދެ ޓީމު ބައްދަލުކުރި މެޗު ބެލުމަށް ގިނަ އަދަދެއްގެ އަންހެން ސަޕޯޓަރުން ވަނީ ދަނޑަށް ވަދެފައެވެ. އަންހެނުން ތިބުމަށް ހާއްސަ ކުރެވުނު ސަރަހައްދުގައި ސެކިޔުރިޓީ ބެލެހެއްޓުމަށް ވެސް ހަރަކާތްތެރި ވެފައި ވަނީ އަންހެނުންކަން ފާހަގަކޮށްލެވެއެވެ. ސައުދީ ސަރުކާރުން ގެނައި މި ބަދަލާ އެކު ގިނަ ބަޔަކު އަންނަނީ މިކަމަށް މަރުހަބާ ކިޔަމުންނެވެ. އެގޮތުން މި މެޗު ކުރިޔަށްދިޔަ ވަގުތު މިކަމަށް މަރުހަބާ ކިޔުމަށް ބޭނުންކުރެވުނު ހޭޝްޓެގް ޓްވިޓާގައި އެތައް ހާސް ފަހަރަކު ބޭނުން ކުރެވިފައިވެއެވެ. މި މެޗު ފެށުމުގެ ކުރިން މެޗުގައި ކުޅުނު ދެ ޓީމުން ވެސް ވަނީ އަންހެނުން ދަނޑަށް އަންނަ މިންވަރު އިތުރުކުރުމަށް ޓްވިޓާގައި ކެމްޕެއިން ހިންގާފައެވެ.
މި މެޗަށް ދިޔަ ޖިއްދާއަށް ނިސްބަތްވާ އަންހެން ސަޕޯޓަރެއް ކަމަށްވާ އުމުރުން 32 އަހަރުގެ ލަމްޔާ ޚާލިދް ނަސީރް އޭއެފްޕީއާ ވާހަކަ ދައްކަމުން ބުނީ މިއީ މުސްތަގުބަލަށް އެޅުނު ރަނގަޅު ފިޔަވަޅެއް ކަމަށާއި ބޮޑު ބަދަލެއްގައި ބައިވެރިވުމުގެ ފުރުސަތު ލިބުމުން ވަރަށް އުފާވާ ކަމަށެވެ. އެހެން ސަޕޯޓަރަކުން ބުނީ ބޭރުގެ އެހެން ގައުމުތަކުގައި އަންހެނުންނަށް ލިބެމުންދާ ފުރުސަތުތައް އެ ގައުމުގައި ވެސް ލިބިގެންދާތަން ފެނިގެންދިޔުމަކީ ވަރަށް އުފާވާ ކަމެއް ކަމަށެވެ.
ސައުދީ ސަރުކާރުން ވަނީ އަންނަ ހޮނިހިރު ދުވަހު ކުޅުމަށް ހަމަޖެހިފައިވާ މެޗަކަށާއި އަދި އަންނަ ހަފްތާގެ ބުރާސްފަތި ދުވަހު ކުޅުމަށް ހަމަޖެހިފައިވާ މެޗަށް ވެސް އަންހެން ސަޕޯޓަރުންނަށް ވަދެވޭނެ ކަމަށް ބުނެފައެވެ.
ފުޓްބޯޅަ އަށް ފޯރި ހުންނަ އަންހެނުންނަށް މީގެ ކުރިން ސައުދީ އަރަބިއްޔާގައި އޮތް ހަމައެކަނި ފުރުސަތަކީ ގޭތެރޭގައި ތިބެގެން ޓީވީ އިން މެޗު ބެލުމެވެ. އަންހެނަކު ދަނޑަށް ވަންނަން އުޅެފި ނަމަ އެމީހަކު ހައްޔަރު ކުރެއެވެ.
ހުސްވި އަހަރުގެ އޮކްޓޯބަރު މަހު ސައުދީ ސަރުކާރުން އިއުލާނު ކުރި އިސްލާހީ އެޖެންޑާގެ ދަށުން މިހާރު އަންހެނުންނަށް ފުޓްބޯޅަ ބަލަން ތިން ސްޓޭޑިއަމްއަކަށް ވަދެވޭނެއެވެ. ވެރިރަށް ރިޔާދް، ޖިއްދާ އަދި ދައްމާމްގައި ވާ ތިން ސްޓޭޑިއަމެއްގައި މިހާރު ވަނީ އާއިލާތަކަށް ޚާއްސަކޮށް އަންހެނުންނަށް މެޗު ބަލަން ވަދެވޭ ގޮތަށް ދަނޑުގައި ވަކި ސެކްޝަންތައް ކަނޑައަޅާފައެވެ.
އިސްލާހީ އެޖެންޑާގެ ދަށުން 2018 ވަނަ އަހަރުގެ ޖޫން މަހުން ފެށިގެން ސައުދީ އަރަބިއްޔާގައި އަންހެނުންނަށް ފުރަތަމަ ފަހަރަށް ޑްރައިވިންގ ލައިސަންސް ވެސް ލިބިގެން ދާނެއެވެ. އެކަމަށް ވާންޖެހޭ ތައްޔާރީތައް މިހާރު ކަމާ ބެހޭ އިދާރާތަކުން އަންނަނީ ކުރަމުންނެވެ.
