އިޒްރޭލުން ހިފާފައިވާ ހުޅަނގު އައްސޭރި (ވެސްޓް ބޭންކް) ގައި އިސްރާއީލުން ޔަހޫދީ އާބާދީތައް ވަޒަންވެރިކުރުމަށްޓަކައި 1100 އަށް ވުރެ ގިނަ ގެ ބިނާކުރުމަށް އިސްރާއީލުން ނިންމާފައިވާ ކަމަށް "ޕީސް ނައު" އެންޖީއޯ އިން ބުނެފިއެވެ.

ފަލަސްތީނާއި އިސްރާއީލްގެ މައްސަލައަށް "ޓޫ ސްޓޭޓް ސޮލިއުޝަނެއް" ހޯދުމަށް މަސައްކަތްކުރާ އިސްރާއީލްގެ "ޕީސް ނައު" އެންޖީއޯ އިން މީޑިއާތަކަށް ހާމަކޮށްފައި ވަނީ މުޅިން އަލަށް ޖުމްލަ 1122 ހައުސިން ޔުނިޓް ބިނާކުރަން އިސްރާއީލުން ސަރުކާރުން ނިންމާފައިވާ ކަމަށާއި މިކަމުގެ ސަބަބުން ފަލަސްތީނާއި އިސްރާއީލުން މައްސަލައަށް ހައްލެއް ނުލިބޭނެ ކަމަށެވެ.

ދާދިފަހުން އިސްރާއީލްގެ ޑިފެންސް މިނިސްޓަރު އެވިގްޑޯ ލިބާމަން ވިދާޅުވެފައި ވަނީ ޔަހޫދީ އާބާދީތައް ވަޒަންވެރިކުރުމަށްޓަކައި  2018 ވަނަ އަހަރު 1285 ހައުސިން ޔުނިޓް ބިނާ ކުރަމަށް އިސްރާއީލްގެ ކަމާބެހޭ ފަރާތްތަކުން އެޕްރޫޕް ކޮށްފައިވާ ކަމަށެވެ.

އިސްރާއީލާއި ފަލަސްތީނާ ދެމެދު ސުލްހައިގެ މަގެއް ހޯދުމަށް ކުރެވެމުންދާ މަސައްކަތުގައި އެންމެ ނާޒުކު އަދި އުނދަގޫ މައްސަލައަކީ ޖެރޫސަލަމްގެ މައްސަލަ ކަމަށްވާއިރު، ޖެރޫސަލަމަކީ އިސްރާއީލްގެ ވެރިރަށް ކަމަށް އެމެރިކާ އިން ގަބޫލު ކުރާކަން އިއުލާން ކުރުމުން ފަލަސްތީނާއި އިސްރާއީލްގެ މައްސަލަ އިތުރަށް މިވަނީ ގޯސްވެފައެވެ. އެމެރިކާގެ މި ނިންމުމާ އެކު މައްސަލައެއް ހައްލެއް ހޯދުމަށް އެމެރިކާ އިން އަދާކުރަމުން ދިޔަ މެދުވެރިއެއްގެ ދައުރު ވެސް މިވަނީ ނިމުމަކަށް އައިސްފައެވެ. އަދި ބައިނަލްއަގުވާމީ ދުނިޔެ އިން ދަނީ އެމެރިކާގެ އަމަލުތައް ކުށްވެރިކުރަމުންނެވެ.