ޤުދުސްގެ މައްސަލަ: ޓްރަމްޕްގެ ނިންމުން ނިންމީ ޔަހޫދީންގެ ނުފޫޒުން!

އިސްރާއީލުގެ ވެރިރަށަކީ ޤުދުސްކަމަށް ބަލައިގަނެ، ތެލްއަވީވުގައި ހުންނަ އެމެރިކާގެ އެމްބަސީ ޤުދުސްއަށް ބަދަލުކުރުމަށް އެމެރިކާގެ ރައީސް ޑޮނަލްޑް ޓްރަމްޕް ނިންމެވީ ޓްރަމްޕްގެ ކެމްޕޭނަށް ޚަރަދުކުރި ޔަހޫދީންގެ ފިއްތުންތަކާއި ނުފޫޒުން ކަމަށް އެމެރިކާގެ ނޫސްތަކުގައި ރިޕޯޓްކޮށްފިއެވެ.

ޤުދުސްއަށް އެމްބަސީ ބަދަލުކުރުމަށް ނިންމީ، އެކަމަކީ މެދުއިރުމަތީގެ ސުލްހައިގެ އެއްބަސްވުމެއް އެކުލަވާލުމަށް މުހިއްމު ކަމެއްކަމެއް ފެނިވަޑައިގަންނަވާތީ ކަމަށް ޓްރަމްޕްވިދާޅުވި ނަމަވެސް، މިނިންމެވުން އިއުލާން ކުރެއްވުމުގެ ކުރިންނާއި، ކެމްޕޭންގެ ތެރޭގައި އެކަމަށް ވައުދުވެވަޑައިގަތުމުގެ ކުރިން ޔަހޫދީ މަހުޖަނެއް ކަމަށްވާ ޝެލްޑަން އެޑެލްސަންއާއި އެތައް ފަހަރަކު ބައްދަލު ކުރެއްވިއެވެ. އެޑެލްސަންއަކީ ޓްރަމްޕްގެ ކެމްޕޭނަށް ބޮޑެތި ޚަރަދު ކުރެއްވި ބޭފުޅެކެވެ. އެގޮތުން ކެމްޕޭނުގެ މަސައްކަތް ކުރި ސުޕަޕެކަކަށް 20 މިލިއަން ޑޮލަރު ޚަރަދު ކުރިއިރު، އިތުރު ޚަރަދުތަކެއް ވެސް ކުރި ކަމަށް އަޑުތައް ފެތުރިފައިވެއެވެ.

ވެރިކަމާއި ހަވާލުވެވަޑައިގަތުމުގެ 10 ދުވަސް ކުރިން ޓްރަމްޕް ވަނީ، އިސްރާއީލުގެ ވެރިރަށުގެ ގޮތުގައި ޤުދުސް ބަލައިގަނެ، އެމެރިކާއިން އެކަން އިއުލާން ކުރާނެކަމުގެ ޔަޤީންކަން އެޑެލްސަންއަށް ދެއްވާފައެވެ. އަދި ވެރިކަމަށް ވަޑައިގެންނެވިފަހުން އެޑެލްސަން ގެންދިޔައީ ވައުދު ފުއްދުމަށް ޓްރަމްޕަށް ޕްރެޝަރ ކުރަމުންނެވެ.

ޔަހޫދީންގެ އިތުރުން ޔަޒަނިސްޓް ނަސާރާއިންގެ ފަރާތުން ވެސް ޓްރަމްޕަށް މިނިންމުން ނިންމުމަށް ނުފޫޒު ފޯރުވަމުން ދިޔަ ކަމަށް ނިއުޔޯކް ޓައިމްސް ބުނެއެވެ. އަދި ޤުދުސްއަށް އެމްބަސީ ބަދަލު ކުރުމަށް ނިންމައި، އެކަން އެންމެ ފުރަތަމަ އަންގާފައިވަނީ ވެސް ޔަހޫދީންނާއި ނަސާރާއިންގެ ބަޔަކަށް ކަމަށް ރިޕޯޓްތައް ބުނެއެވެ.

ޓްރަމްޕްގެ ކެމްޕޭނަށް ޚަރަދު ކުރާ ޝެލްޑަން އެޑެލްސަންއަކީ ޔަހޫދީންގެ އެކި ޖަމާޢަތްތަކަށް ބޮޑެތި ޚަރަދުކުރާ، ޔަހޫދީ މަހުޖަނެކެވެ. އޭނާއަކީ ލާސްވޭގަސް ސޭންޑްސްގެ ވެރިޔާއެވެ. އެކުންފުންޏަކީ ސިންގަޕޫރުގެ މެރީނާ ބޭ ސޭންޑްސް ވެސް ހިންގާ ކުންފުންޏެވެ.