އެންމެ އަގު މަތި ކުޅުންތެރިޔަކީ ނޭމާ، ރޮނާލްޑޯއަށް 49 ވަނަ

އިންޓަނޭޝަނަލް ސެންޓަރ ފޯރ ސްޕޯޓްސް ސްޓަޑީސް (ސީއައިއީއެސް) ފުޓްބޯލް އޮބްޒަވޭޓަރީއިން ހޮވި 2018 ވަނަ އަހަރުގެ އެންމެ އަގު މަތި ކުޅުންތެރިޔަކަށް ޕީއެސްޖީއަށް ކުޅެމުން އަންނަ ބްރެޒިލްގެ ތަރި ނޭމާ ހޮވިއްޖެއެވެ.

އެ އެސޯސިއޭޝަނުން ކުޅުންތެރިން މި ލިސްޓަށް ތަރުތީބުކޮށްފައިވަނީ އެ ކުޅުންތެރިންގެ އުމުރާއި ކުޅެމުން އަންނަ ޕޮޒިޝަނާއި ކޮންޓްރެކްޓުގައި ބާކީ އޮތް މުއްދަތު އަދި ވޭތުވެދިޔަ އަހަރު ދައްކާފައިވާ ކުޅުމުގެ އިތުރުން ގައުމީ ޓީމުގައި އެ ކުޅުންތެރިން ދައްކާފައިވާ ކުޅުމަށް ބެލުމަށް ފަހުއެވެ.

މި ލިސްޓުގެ އެއްވަނަ ނޭމާ ހޯދިއިރު އެ އެސޯސިއޭޝަނުން އަންދާޒާ ކުރާ ގޮތުގައި ނޭމާގެ އަގަކީ 213 މިލިއަން ޔޫރޯއެވެ. ނޭމާގެ ފަހަތުން މި ލިސްޓުގެ ދެވަނަ ލިބިފައިވަނީ ބާސެލޯނާއަށް ކުޅެމުން އަންނަ އާޖެންޓީނާގެ ކެޕްޓަން ލިއޮނެލް މެސީއަށެވެ. މެސީގެ އަގެއްގެ ގޮތުގައި އެ އެސޯސިއޭޝަނުން އަންދާޒާ ކޮށްފައިވަނީ 202.2 މިލިއަން ޔޫރޯއެވެ. ހަމައެހެންމެ މި ލިސްޓުގެ ތިންވަނަ 194.7 މިލިއަން ޔޫރޯގެ އަގަކާއެކު ހޯދީ ނިމިގެންދިޔަ 2017 ވަނަ އަހަރު އެންމެ ގިނަ ލަނޑު ޖެހި ކުޅުންތެރިޔާ ކަމަށްވާ އިނގިރޭސި ފޯވާޑް ހެރީ ކޭންއެވެ. ކޭންއަކީ މި ލިސްޓުގައި އެންމެ މަތިން ރޭންކު ކުރެވުނު އިނގިރޭސި ޕްރިމިއާ ލީގުގައި ކުޅެމުން އަންނަ ކުޅުންތެރިޔާއެވެ.

މި ލިސްޓުގެ ހަތަރުވަނަ ހޯދީ ޕީއެސްޖީއަށް ކުޅެމުން އަންނަ ފްރާންސްގެ ޒުވާން ފޯވާޑް ކިލިއަން އެމްބާޕޭއެވެ. އުމުރުން 19 އަހަރުގެ އެމްބާޕޭގެ އަގެއްގެ ގޮތުން 192.5 މިލިއަން ޔޫރޯ ކަނޑައެޅިފައިވާއިރު އޭނާއަކީ 20 އަހަރުން ދަށުގެ ކުޅުންތެރިންގެ ތެރެއިން އެންމެ މަތިން ރޭންކު ކުރެވުނު ކުޅުންތެރިޔާއެވެ.

ނިމިގެންދިޔަ 2017 ވަނަ އަހަރު ފީފާއިން ހޮވި ދުނިޔޭގެ އެންމެ މޮޅު ކުޅުންތެރިޔާގެ މަގާމު ހޯދި ރެއާލް މެޑްރިޑަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯއަށް މި ލިސްޓުން ލިބިފައިވަނީ 49 ވަނައެވެ. އޭނާގެ އަގެއްގެ ގޮތުގައި މި ލިސްޓުގައި ވަނީ 80.4 މިލިއަން ޔޫރޯއެވެ.

އިޓަލީގެ ލީގުގައި ކުޅޭ ކުޅުންތެރިންގެ ތެރެއިން މި ލިސްޓުގައި އެންމެ މަތިން ރޭންކު ކުރެވިފައިވަނީ 174.6 މިލިއަން ޔޫރޯގެ އަގަކާއެކު ފަސްވަނައިގައި ރޭންކް ކުރެވުނު ޔުވެންޓަސްގެ ފޯވާޑް ޕައުލޯ ޑިބާލާއެވެ. އަދި ޖަރުމަނު ބުންޑެސްލީގާގައި ކުޅޭ ކުޅުންތެރިންގެ ތެރެއިން އެންމެ މަތިން ރޭންކު ކުރެވުނީ 21 ވަނައިގައި ރޭންކް ކުރެވުނު ބަޔާން މިއުނިކްގެ ފޯވާޑް ރޮބަޓް ލެވަންޑޯސްކީއެވެ.

މި ލިސްޓުގައި އެންމެ މަތިން ރޭންކް ކުރެވުނު ގޯލްކީޕަރަކީ ބާސެލޯނާ އަދި ޖަރުމަނުގެ ކީޕަރު މާކް އެންޑަރ ޓާސްޓީޖެންއެވެ. ހަމައެހެންމެ އެންމެ މަތިން ރޭންކް ކުރެވުނު ޑިފެންޑަރަކީ ހަމަ އެ ޓީމަށް ކުޅެމުން އަންނަ ފްރާންސްގެ ޑިފެންޑަރު ސެމުއެލް އުމްޓީޓީއެވެ.