ހަތަރު މަސްދުވަހުގެ އިންޖަރީއަކަށް ފަހު އަލުން އެނބުރި ޓީމުގެ ފުރަތަމަ އެގާރައިން ޖާގައެއް ކަށަވަރު ކުރުމަށް ގިނަ މަސައްކަތްތަކެއް ކުރަން ޖެހޭ ކަމަށް ބާސެލޯނާއަށް ކުޅެމުން އަންނަ ފްރާންސްގެ ޒުވާން ފޯވާޑް އުސްމާން ޑެމްބެލޭ ބުނެފިއެވެ.

ޕީއެސްޖީއަށް ބަދަލުވި ނޭމާ ނެތްތަން ފޫބެއްދުމުގެ ގޮތުން ގެނައި ޑެމްބެލޭއަށް އަނިޔާވީ މިދިޔަ އަހަރުގެ ސެޕްޓެމްބަރު މަހުގެ ތެރޭގައި 2-1 ގެ ނަތީޖާއަކުން ގެޓާފޭ އަތުން ބާސާ މޮޅުވި މެޗުގައެވެ. އެ މެޗަކީ އޭނާ ބާސާއަށް ސްޕެނިޝް ލަލީގާގައި ކުޅެދިން ތިންވަނަ މެޗެވެ. މި މެޗުގައި އޭނާގެ ފަލަމަސްގަނޑަށް އަނިޔާވެ ދަނޑުން ބޭލިއިރު އެ އަނިޔާއަށް ފަރުވާ ހޯދުމުގެ ގޮތުން އޭނާ ވަނީ ފިންލޭންޑުގައި ސާޖަރީއެއް ވެސް ފުރިހަމަ ކޮށްފައެވެ.

އަނިޔާއިން ސަލަމާތް ވުމަށް ފަހު އޭނާ ބާސާއަށް އެންމެ ފުރަތަމަ މެޗެއް ކުޅެދިނީ ސްޕެނިޝް ކޮޕާޑެލްރޭގައި ސެލްޓަ ވީގޯއާ ދެކޮޅަށް ރަށުން ބޭރުގައި ބާސާ ކުޅުނު މެޗެވެ. މި މެޗު އޭނާ ފެށީ ބެންޗުން ކަމަށްވާއިރު މި ހަފްތާގެ އާދިއްތަ ދުވަހު ލެވަންޓޭ އަތުން 3-0 ގެ ނަތީޖާއަކުން އަމިއްލަ ދަނޑުގައި ބާސާ ކުޅުނު މެޗުގައި އޭނާވަނީ ފުރަތަމަ އެގާރައިގައި ހިމެނިގެން ކުޅެފައެވެ. އެހެން ނަމަވެސް އެ މެޗުގައި ވެސް އޭނާ 90 މިނެޓު ފުރިހަމަކޮށްފައެއް ނުވެއެވެ.

އޭނާ ބުނީ ޓީމުގެ ފުރަތަމަ އެގާރާއިން ޖާގައެއް ކަށަވަރު ކުރުމަށް ގިނަ މަސައްކަތްތަކެއް ކުރަން އެބަހުރި ކަމަށާއި އެހެން ނަމަވެސް އަނިޔާއިން ސަލާމަތްވެވުމުން ފުރަތަމަ ފިޔަވަޅު ފުރިހަމަ ކުރެވުނީ ކަމަށް ގަބޫލްކުރާ ކަމަށެވެ. އޭނާ ބުނީ ރިކަވަރ ވުމަށް ޓީމުން ކަނޑައެޅި މުއްދަތުގެ ކުރިން ރިކަވާ ވުމަށް ގިނަ މަސައްކަތްތަކެއް ކުރި ކަމަށާއި އެހެން ނަމަވެސް އެއީ ދަތި އަދި އުނދަގޫ މަސައްކަތްތަކެއް ކަމަށެވެ.

އޭނާ ބުނީ ބާސާއަކީ ދުނިޔޭގެ އެންމެ ބޮޑު އެއް ކްލަބަށްވުމާއެކު އެ ޓީމުގެ ފުރަތަމަ އެގާރައިން ޖާގަ ހޯދުމަށް ގިނަ މަސައްކަތްތަކެއް ކުރަން ޖެހޭކަން ގަބޫލްކުރާ ކަމަށާއި ބާސާއިން ގެންގުޅޭ ކުޅުމުގެ ވައްޓަފާޅިއަކީ އޭނާ ވަރަށް ގަޔާވާ ވައްޓަފާޅިއެއް ކަމަށެވެ. އަދި އިންޖަރީގެ ސަބަބުން ޓީމާއި ދުރުގައި ހުރި ދުވަސްކޮޅު ހިނގާފައިވާ ކަންކަން ދަސްކުރަމުންދާ ކަމަށާއި ސީޒަނުގެ ކުރިޔަށް ހުރި ބައިގައި އޭނާގެ ފަރާތުން މޮޅު ކުޅުމެއް ފެނިގެންދާނެ ކަމަށް ޑެމްބެލޭ ބުނެފައިވެއެވެ.

ޑެމްބެލޭ ބާސާއަށް ބަދަލުވީ މިދިޔަ ހޫނު މޫސުމުގެ ޓްރާންސްފާ މާކެޓުގައެވެ. އެގޮތުން ޖަރުމަނުގެ ބޮރޫޝިއާ ޑޯޓްމަންޑް ދޫކޮށްލުމަށް ފަހު އޭނާ ބާސާއާ ގުޅުނީ 105 މިލިއަން ޔޫރޯގެ އެއްބަސްވުމެއްގެ ދަށުންނެވެ. އަދި ޑެމްބެލޭގެ ސޮއި ހޯދުމުގެ ގޮތުން އެކިއެކި ބޯނަސްގެ ގޮތުގައި ބާސާއިން 42 މިލިއަން ޔޫރޯ ޑޯޓްމަންޑަށް ހުށަހަޅާފައިވެއެވެ. އޭނާގެ ރިލީސް ފީއެއްގެ ގޮތުގައި ބާސާއިން 400 މިލިއަން ޔޫރޯ ކަނޑައަޅާފައިވާއިރު އޭނާއަކީ ދުނިޔޭގެ ތިންވަނައަށް އެންމެ އަގުބޮޑު ކުޅުންތެރިޔާއެވެ.

 ފްރާންސްގެ ގައުމީ ޓީމުން ވެސް ޖާގަ ހޯދަމުން އަންނަ ޑެމްބެލޭ ބާސާއަށް މިހާތަނަށް ކުޅެދެވިފައިވަނީ އެންމެ ހަތް މެޗެވެ. އެހެން ނަމަވެސް ސީޒަނުގެ ކުރިޔަށްހުރި ބައިގައި އޭނާ ވެގެންދާނީ އެ ޓީމަށް މުހިންމު ކުޅުންތެރިޔަކަށެވެ.