އެމްޑީޕީގެ ކެންޑިޑޭޓެއް ރިޔާސީ އިންތިހާބަކަށް ނުނިކުންނާނެ، އޮއްޓަރު ހުރި ހަމަ އެކަނި ބޭފުޅަކީ ރައީސް ޔާމިން: ހޯމް މިނިސްޓަރު
8 ޖެނުއަރީ 2018 | ހޯމަ 02:09ގާސިމް ރާއްޖެއިން ބޭރަށް ވަޑައިގެންނެވީ މަކަރު ހައްދަވައިގެން ކަމަށް ސިފަ ކުރެއްވި
ހޯމް މިނިސްޓަރު އަޒްލީން ޕީޕީއެމްގެ ޖަލްސާގައި ވާހަކަ ދައްކަވަނީ
ކުރިއަށް އޮތް ރިޔާސީ އިންތިހާބުގައި ކުރީގެ ރައީސް މުހައްމަދު ނަޝީދަށް ކުރިމަތިނުލެއްވޭނެ ކަމަށާއި އަދި އެމްޑީޕީން ކެނޑިޑޭޓެއް ނުނެރޭނެކަން ސަތޭކަ ޕަސެންޓް ޔަގީންވާ ކަމަށް ހޯމް މިނިސްޓަރު އަޒްލީން އަހްމަދު ވިދާޅުވެއްޖެއެވެ.
ޕީޕީއެމްގެ "ރުމާލު 2" ޖަގަހައިގައި އާދިއްޔަ ދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުން ހޯމް މިނިސްޓަރު އަޒްލީން ވިދާޅުވީ ރިޔާސީ އިންތިހާބު އައިސް ޖެހޭއިރު ވެސް "އެއްކޮޅުން ވެސް، ދެކޮޅުން ވެސް" ކުރިމަތިލައްވަން ހުރިތަން ފެންނަނީ ހަމައެކަނި ރައީސް ޔާމިން ކަމަށެވެ. އަދި އެއީ ﷲގެ މިންވަރުފުޅު މެދުވެރިކުރެއްވި ގޮތް ކަމަށް އޭނާ ވިދާޅުވިއެވެ.
"ރާއްޖޭގެ ރިޔާސީ އިންތިހާބަށް ކުރިމަތިލައްވަން ރައީސް ޔާމިން ނޫން އޮއްޓަރު ހުރި މީހަކު ނެތް. ދިވެހި ރައްޔިތުންނަށް ﷲ މިންވަރުފުޅުން ކެނޑިޑޭޓެއްގެ ގޮތުގައި ހަމައެކަނި ފެންނަ ކެނޑިޑޭޓަކީ ރައީސް ޔާމިން، އެއްކޮޅުން ވެސް ދެކޮޅުން ވެސް،" އަޒްލީން ވިދާޅުވިއެވެ.
މިނިސްޓަރު ވިދާޅުވީ އިދިކޮޅު ލީޑަރުންގެ ތެރެއިން ވެރިކަމަށް ވާދަކުރެއްވޭނެ ބޭފުޅަކު ނެތް ނަމަވެސް ކޮންމެ ވެސް މީހަކު ނެރޭނެ ކަމަށް ގަބޫލު ކުރައްވާ ކަމަށެވެ. ނަމަވެސް އެމްޑީޕީގެ ކެނޑިޑޭޓެއް ރިޔާސީ އިންތިހާބުގައި ވާދަ ނުކުރައްވާނެކަން އެއީ ސަތޭކަ ޕަސެންޓް ޔަގީންވާ ކަމެއް ކަމަށް އަޒްލީން ވިދާޅުވިއެވެ.
އިދިކޮޅު ކެންޑިޑޭޓުންގެ ތެރެއިން ވެރިކަމަށް ކުރިމަތިލެއްވުމަށް އެންމެ ގިނަ ބަޔަކު ތާއީދު ކުރައްވަނީ ކުރީގެ ރައީސް ނަޝީދަށް ކަމަށްވިއަސް އެކަމާ ކަންބޮޑުވާން ނުޖެހޭ ކަމަށާއި އެމަނިކުފާނަށް ވެރިކަމަށް ކުރިމަތިނުލެއްވޭނެ ކަމަށް އަޒްލީން ވިދާޅުވިއެވެ.
"ތިޔަ ބޭފުޅުން އެއްވެސް ވަރަކަށް ވޮރީ ކުރައްވާކަށް ނުޖެހޭނެ. ދިވެހި ރާއްޖޭގެ ރިޔާސީ އިންތިހާބުގައި ކުރީގެ ރައީސް މުހައްމަދު ނަޝީދުގެ ނަންފުޅެއް ނޯންނާނެ. މިއީ އަޅުގަނޑު ބުނާތީއެއް ނޫން، ދިވެހި ރާއްޖޭގެ ގާނޫނު އަސާސީ އާއި ރާއްޖޭގެ ކޯޓުތަކާއި ރާއްޖޭގައި ހެދިފައިހުރި ގާނޫނުތައް އޮއްވަކާ އެކަމެއް ނުކުރެވޭނެ،" އަޒްލީން ވިދާޅުވިއެވެ.
ރައީސް ނަޝީދަކީ ސިޔާސީ މައިދާނުގައި ތަސައްރަފު ނުފުދޭ ބޭފުޅެއްކަން އެމަނިކުފާނުގެ ވެރިކަމުގައި ފެނިގެން ދިޔަ ކަމަށް އަޒްލީން ވިދާޅުވިއެވެ. އެގޮތުން އަޒްލީން ވިދާޅުވީ ރައީސް ނަޝީދުގެ ވެރިކަމުގައި ތައާރަފު ކުރެއްވި އާސަންދަ ނިޒާމަކީ ރައީސް އަބްދުﷲ ޔާމިން މޭސްތިރި ކަމުގައި އޭގެ ކުރިން އުފެއްދެވި "މަދަނަ" ޕްރޮގްރާމް ކަމަށެވެ. އަދި ވިދާޅުވީ ރައީސް ނަޝީދު ކުރެއްވި ކަމަކީ ރައީސް ޔާމިން އުފެއްދެވި "މަދަނަ" ޕްރޮގްރާމްގެ ނަން "އާސަންދަ" އަށް ބަދަލު ކުރެއްވުން ކަމަށެވެ. ހަމަ އެހެންމެ ރައީސް ޔާމިން ވެރިކަމަށް ވަޑައިގެންނެވުމަށް ފަހު ވެސް އާސަންދަގެ ނަން ބަދަލު ކުރައްވަން ރައީސް ޔާމިން ބޭނުންފުޅުނުވީ ކަމަށާއި އެމަނިކުފާނު ކުރެއްވި ކަމަކީ ރައްޔިތުންގެ ދަތިތައް ފިލުވައި ދެއްވުން ކަމަށް އަޒްލީން ވިދާޅުވިއެވެ.
އަޒްލީން އެ ވިދާޅުވާ "މަދަނަ" ޕްރޮގްރާމް އުފެއްދެވީ ރައީސް ޔާމިން ކޮން އިރަކު ކަމެއް އަދި އޭގެ ތަފްސީލެއް ވެސް އަޒްލީން ވިދާޅެއްނުވެއެވެ.
މީގެ އިތުރުން ޖަލު ހުކުމެއް އައިސްފަވާ ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހިމް ރާއްޖެއިން ބޭރަށް ފޮނުއްވުމަށް ސަރުކާރުން ހުއްދަ ދިނީ "ދެންމެ ދެންމެ ދުނިޔެ ދޫކުރައްވަފާނެހެން ހީވުމުން" ކަމަށާއި ނަމަވެސް ސިންގަޕޫރަށް ވަޑައިގެންނެވުމަށް ފަހު ޖަރުމަނަށް ވަޑައިގެންނެވީ ސަރުކާރަށް އަންގަވާ ވެސް ނުލައްވައި ކަމަށް އަޒްލީން މި ޖަލްސާގައި ވަނީ ވިދާޅުވެފައެވެ. އަދި ގާސިމް ރާއްޖެއިން ބޭރަށް ވަޑައިގެންނެވީ މަކަރު ހައްދަވައިގެން ކަމަށް އަޒްލީން ސިފަކުރެއްވިއެވެ.
" ޖަރުމަނަށް ވަޑައިގެންނެވީ ސަރުކާރަށް އަންގާ ވެސް ނުލައްވާ. އެހެންވީމަ މި ބޭފުޅުންގެ ވިސްނުންފުޅަކީ މަކަރު ހަދައިގެން ވެސް ރާއްޖެއިން ބޭރަށް ދެވޭތޯ. ދެން އަޅުގަނޑުމެން ވެސް ތިބޭނީ ނިކަން ވިސްނައިގެން،" އަޒްލީން ވިދާޅުވިއެވެ.
