ދައުރު ނިމުމުގެ ކުރިން އަދީބު މަރާލަނީތަ؟

ކުރީގެ ނައިބު ރައީސް އަހުމަދު އަދީބަކީ ރައީސް އަބްދުﷲ ޔާމީން ވެރިކަމަށް ގެނައުމަށް އެންމެ ބުރަކޮށް މަސައްކަތްކުރެއްވި އެއް ބޭފުޅެކެވެ. ވެރިކަމަށް ވަޑައިގަތުމަށްފަހު، މިއިން ޒަމާނަކު މިސަރަހައްދުގެ ޤައުމެއްގެ ވެރިއަކަށް ނުލިބޭވަރުގެ ބާރުތަކެއް ރައީސް ޔާމީނަށް ހޯއްދަވައިދެއްވައި، ޒުވާނުންގެ ސަރުކާރެކޭ ރައީސް ޔާމީން ވިދާޅުވާ ވިދާޅުވުމަށް ފަނޑުނަމަވެސް ކުލައެއް ޖައްސައިދެއްވީ އަހުމަދު އަދީބުކަމާއިމެދު ޝައްކުކުރާނެ މީހަކު މިދިވެހި ރާއްޖެއަކު ނުހުންނާނެއެވެ.

އަދީބު ހުންނެވީ ރައީސް ޔާމީނަށް ވަފާތެރިކަން މަތީގައެވެ. އެހެން ނޫންނަމަ އަމިއްލަ ސިޔާސީ ޕާޓީއެއް އުފައްދަވައިގެން ރައީސް ޔާމީނާއި ފެޔަށް ވަޑައިގަންނަވަން އަދީބަށް އެއްވެސް ކަމެއް ނޫނެވެ. މުޅި ކެބިނެޓް އޮތީ 'ބްރޯ' އޭ ކިޔައި ގޮވަގޮވައެވެ. އެހެން ނަމަވެސް އަދީބު ހުންނެވީ ރައީސް ޔާމީނާއިއެކުގައެވެ. ރައީސް ޔާމީނު ވިދާޅުވިއްޔާ ވިދާޅުވިހާ ކަމެއް ކުރައްވަމުގެން ގެންދެވިއެވެ. އަދީބަކީ ޒުވާން ބޭފުޅެއްކަމަށްވުމާއިއެކު، ރައީސް ޔާމީން އެމަނިކުފާނުގެ މެންޓަރ އަކަށް ވެގެން އެކުރެއްވި ކަންތައްތައް އެހެރީ ފެންނާށެވެ.

މިހުރިހާ ކަމެއް ވެ ނިމުމުން، ރައީސް ޔާމީން ބޭނުންފުޅުވީމާ އަދީބު އެހުންނެވީ ޖަލުގައެވެ. އަދީބުގެ ބަހުންނަމަ، އެ "ހުންނެވީ ރައީސް ޔާމީން ބެހެއްޓެވި ހިސާބު'ގައެވެ.

އަދީބު ޖަލުގައި އެއުޅުއްވާ ހާލާއިމެދު ކަންބޮޑުނުވާ މީހަކު މިހާރު ހުރިހެނެއް ހިއެއް ނުވެއެވެ. އެއް ޒަމާނެއްގައި އަދީބުގެ އެންމެ ބޮޑު ހަތުރުންނަށްވި ރައީސް ނަޝީދާއި، ޤާސިމް އިބްރާހިމާއި، ރައީސް މައުމޫންވެސް މިހާރު އެތިއްބެވީ އަދީބުގެ ޙިމާޔަތުގައެވެ. އެބޭފުޅުންނަށް އަދީބު މެދުވެރިކޮށް ދުއްތުރާތައް ކުރެއްވީ ސީދާ ރައީސް ޔާމީންކަން އެބޭފުޅުންނަށްވެސް އެނގިވަޑައިގަންނަވާތީއެވެ. އަދި ހަމަޔާއި އިންސާފަށް އެބޭފުޅުންވެސް ލޯބިކުރައްވާތީއެވެ.

ރައީސް ނަޝީދު ވިދާޅުވީ އަދީބަސް ބޭސް ފަރުވާ ލިބެން ޖެހޭނެކަމަށާއި، އެމަނިކުފާނަށް ބޭސްފަރުވާ ނުދީ ބެހެއްޓުމަކީ އިންސާނިއްޔަތާއި ޚިލާފުކަމެއްކަމަށެވެ.

އެމްޑީޕީގެ ޗެއަރޕަރސަން ހަސަން ލަތީފު ވިދާޅުވީ އަދީބަށްކޮށްދޭން ޖެހޭ ބޭސްފަރުވާ ކޮށްނުދީ އެހިންގާ ޖަރީމާތަކުގައި ޒިންމާވާ ފަރާތްތައް ޖަވާބުދާރީކުރެވޭ ދުވަސް އިރާދަކުރެއްވިއްޔާ އަންނާނެކަމަށެވެ.

ޤާސިމް އިބްރާހިމް ވިދާޅުވީ ބޭސްފަރުވާގެ ފުރިހަމަ ހައްޤު ލިބުން ލަސްވެ، ފަސްވުމުން ލިބޭ ހިތްދަތިކަން ތަޖުރިބާކުރައްވާފައިވާކަމަށެވެ. އަދި އެހެން ޤައިދީންނެކޭ އެއްފަދައިން ކުރީގެ ނައިބު ރައީސް އަދީބަށް ބޭސްފަރުވާގެ ފުރިހަމަ ހައްޤު ލިބިދޭން ޖެހޭނެކަމަށް ޤާސިމް ވިދާޅުވިއެވެ.

ޕީޕީއެމްގެ ރައީސް މައުމޫން ފެކްޝަންގެ ޑެޕިއުޓީ ލީޑަރު އާމިނަތު ނާދިރާ ވިދާޅުވީ އަދީބު ޖަލުގައި އިންނެވުމަކީ ދިރިހުރުމުގެ ހައްޤުން މަހްރޫމް ވާން ޖެހޭ ކަމެއް ނޫންކަމަށެވެ. އަދި ދާދިފަހުން ބޭއްވި ހަފްލާއެއްގައި ވާހަކަ ދައްކަވަމުން ސަރުކާރުގެ ކޯލިޝަން ޕާޓްނަރ އެމްޑީއޭގެ ލީޑަރު އަހުމަދު ސިޔާމް މުހައްމަދު ވިދާޅުވިފަދައިން މިސަރުކާރަކީ "ކުޅެދޭ މީހުން ނުކުޅެދޭ މީހުންނަށް ހަދާ" ސަރުކާރެއްކަމަށް ނާދިރާ ވިދާޅުވިއެވެ.

އަދީބަށް ދޭން ޖެހޭ ބޭސްފަރުވާ ދިނުމަށް ގޮވާލަމުން ދާ އަޑުވެސް ރައީސް ޔާމީނަށް އިވިވަޑައިނުގަންނަވަނީ ކަންފަތުން މަޑު ނަގަން ޖެހުމުންކަމަށްވެދާނެއެވެ. ކަންފަތް ސާފުކުރައްވާށެވެ. ދައުލަތަށް ގިނަ ދުވަހު ޝަރަފުވެރި ޚިދުމަތްތަކެއް ކުރެއްވި ދިވެހި މަޔަކާއި ދިވެހި ބަފަޔަކަށް ލިބިފައިވާ، މި ދިވެހި ދައުލަތުގެ ވަޒީރުކަމާއި ނައިބު ރައީސްކަންކުރެއްވި އަހުމަދު އަދީބު ޖަލުގައި އެހަނގުރާމަކުރައްވަނީ މަރާއެވެ. ރައީސް ޔާމީންގެ ހިތްޕުޅުގައި އިންސާނިއްޔަތުގެ ކަންފުޅެއް ނެތަސް، ކަންފަތުގައި މަޑު ހުއްޓަސް، ދިވެހިންގެ ހިތުގައި އިންސާނިއްޔަތުކަން އެބަހުއްޓެވެ. އަދި ކަންފަތުގައި މަޑެއްވެސް ނެތެވެ. އެހެން ކަމުން ދިވެހިންގެ މައްޗަށް މަނިކުފާނު ވެރިކަން ކުރައްވާނަމަ ދިވެހިން ދައްކާ ވާހަކަ އަޑު އައްސަވާށެވެ.

ޙާލު ދެރަނަމަވެސް، އަދީބު ފެންނަނީ ހިތްވަރު ގަދަކޮށް

ސަރުކާރުގެ އަމަލުތައް ހުރި ގޮތުން ސިފަވަނީ މިދައުރު ނިމުމުގެ ކުރިން އަދީބުގެ ދުވަސް ދުއްވާލަން މަސައްކަތްކުރާހެންނެވެ. ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފު ވިދާޅުވީ ސަރުކާރުން އަދީބުދެކެ އެހާ ޖެހިލުންވަނީ ހިންގާފައިވާ ޖަރީމާތަކުގެ ވާހަކަ އަދީބު ކިޔައިދެއްވަފާނެތީކަމަށެވެ. ބަންދުގައި ހުންނެވިއިރު އަދީބުއާއި އެކު ދެކުނު ވާހަކަތަކުން މަހުލޫފުވަނީ އެތައް ކަމެއް މިހާތަނަށް ފަޅާއަރުވާލައްވާފައެވެ. އަދި އަދީބު ލައްވާ ރައީސް ޔާމީން ކުރެއްވި ކަންތައްތައް އެމަނިކުފާނަށް އަމިއްލަފުޅަށް އެނގިވަޑައިގަންނަވާނެތީ އަދީބު މިނިވަންކުރަން ނުވަތަ ބޭސްފަރުވާއަށް ދޫކޮށްލައްވަންވެސް ފަސްޖެހެނީކަމަށް މަހުލޫފު ވިދާޅުވިއެވެ.

އަދީބުގެ ސިއްހީ ހާލަތުގެ ވާހަކަ އަޅުގަނޑު ކިޔައިނުދިނަސް، އާއިލާގެ ބޭފުޅުން ކިޔައިނުދިނަސް، ފޮޓޯތަކުން އެފެންނަނީއެވެ. ޖާނުން ވަރުގަދަކޮށް ހުންނެވި ބޭފުޅާގެ ހަށިގަނޑަށް އައިސްފައިވާ ބަދަލުތައް ބައްލަވާށެވެ. ގްލަކޯމާގެ ސަބަބުން ލޯވަޅުވަދެފައިވާއިރު، ސިއްހީ ހާލު ގޯސްވެ، ބޯކޮށާލަން އެވަނީ ޖެހިފައެވެ. އައިނު ބަދަލުކުރަން ޖެހިފައިވާއިރު، އެކަން ކޮށެއް ނުދެއެވެ. ކެންސަރަށް ސްކްރީންކުރަން ޖެހުމުން އެކަންކޮށެއް ނުދެއެވެ. އަދީބުގެ އެތެރެހަށީގައި އެވަނީ ސިސްޓެއް އުފެދިފައެވެ. ކިޑްނީގައި ހިލަ އުފެދިފައެވެ. ލޮލަށް ގްލަކޯމާ ޖެހިފައެވެ. ކެންސަރުގެ ބިރު ބޮޑުވެފައެވެ. ގައިމު ޖަލަށް ވަޑައިގެންނެވި އިރު ހުންނެވީ ހެޔޮ ހާލުގައެވެ. އެހެންކަމުން ސަރުކާރުން މަސައްކަތްކުރަނީ އަދީބު މަރާލަންކަމަށް މީހުން ނުބުނެ ތިބޭނެތޯއެވެ؟

ރައީސް އަބްދުﷲ ޔާމީނެވެ. ޝަރުޢީ ދާއިރާއަށް ނުފޫޒު ނުފޯރުވާކަމަށް ވިދާޅުވާއިރު، އަދީބަށް ބޭސްފަރުވާއަށް ރާއްޖެއިން ބޭރަށް ނުދެވޭނެކަމަށް މަނިކުފާނު ވިދާޅުވިފަހުން އެކަން ކުރިއަށް ނުގޮސްގެން އުޅެނީ އެއީ ނުފޫޒު ނުފޯރުވާތީތޯއެވެ؟ ތާކުންތާކު ޖެހޭ ވާހަކަ ދައްކަވާށެވެ. އިދިކޮޅު ފަރާތްތަކުން ބުނާ ގޮތުގައި އެބޭފުޅުންގެ ވެރިކަމުގައި މަނިކުފާނު ހުންނަވާނީ ޖަލުގައެވެ. އަދީބަށް މަނިކުފާނު ތިޖައްސަވާ ޙާލު އެހެން ބަޔަކު މަނިކުފާނަށް ޖައްސައިފިއްޔާ މަނިކުފާނު ވިދާޅުވާނީ ކީކޭތޯއެވެ؟ މަނިކުފާނުގެ ބޭސްފަރުވާއާއި ޖެހުމުން އެކަން ކުރާނީ މާލޭ ސިޓީ ކައުންސިލުންތޯ ނުވަތަ ދިވެހި ބަހުގެ އެކަޑަމީއިންތޯ ނުނިންމިގެން އެކަން ކޮށްނުދީފިއްޔާ މަނިކުފާނު ވިދާޅުވާނީ ކީކޭތޯއެވެ؟